Abih mon ngak bruk biar harei, sa-ai Nguyễn Thanh Tùng, urang ngak di Công ty TNHH Pandap panda Thái Sơn samar drah peih radaih nao raok hadiuk di Công ty TNHH Jik pet Kim Hồng (khu chế xuất Linh Trung, phường Bình Chiều, TP.HCM). Dua hadiuk pasang ndom klao bui sambai blaoh nao gar darak blei pandap mbang, ginum gauk ka bruk daa dom ayut sahabat mai labik drei daok trọ mbang menyum dalam dom harei lễ 30/4 saong 1/5.
Sa-ai Tùng brei thau, tuk lễ ini, công ty brei padeih 4 harei min sa-ai oh nao halei atah. Kayua palei daok atah, diuk pasang oh nao palei, tok daok veik saong ngak pandap mbang menyum dalam sang haong dom ayut sahabat pak di labik daok trọ. Sa-ai jeng oh kuhria nao du lịch, nao ma-in atah tuk jien padai daok kan kandah saong mboh oh chreih chai kayua lac tuk lễ ini, manuac sia tabiak jalan nao ma-in biak rilo.“Hu vaktu piah xả stress hadei di tukvak ngak bruk glaih glar. Blaoh hu tukvak piah nao rivang dom ayut sahabat di drei. Drei jeng hu pagul sanya dom ayut sahabat dalam labik trọ mai duk trọ mbang lẩu, ngak pandap mbang menyum hasit mbia saong daoh karaoke”.
Daok ngan haong sa-ai Đặng Đình Chiến, urang ngak di Công Ty TNHH Theodore Alexander HCM, TP Thủ Đức, sa-ai maong akaok padeih lễ piah hu rilo tukvak mong iek amaik ame taha. 2 thun ini, amaik ame di sa-ai meng Nghệ An tame ini piah jaik anek taco. Nan ye, tukvak ini, ong amuk daok mong akaok dom anek taco meng Nghệ An tame ini rivang ma-in blaoh abih gauk dalam sang hu pataom mbaok. Min urak ini amaik di sa-ai Chiến labuh ruak trak, anek taco daok salih gauk mong iek, dalam tuk diuk pasang sa-ai ngak urang ngak, daok tăng ca piah hu jien raong anek mbang bac, nan ye hu takik tukvak daok taphia amaik ame: “Drei caong khin kuhria bruk sang, hu harei padeih piah taom gaok ong amuk. Harei padeih lễ dui atah ye dom kamuan jeng hu padeih bac, nan ye pajeng trun ong amuk piah sang taom gauk. Dahlau diah ong amuk daok ranaih ye tukvak padeih rilo harei kuhria ba ong amuk nao ma-in pak halei nan ka chreih bui, min urak ini ong amuk taha abih paje”.
Ngan haong dom urang ngak hu hadiuk hu pasang, hu anek sit, daok rilo kuhri kuhria, naong triak, ye bruk nao ma-in dalam dom harei padeih lễ nan lac sa bruk atah dhua.
Min ngan haong sa urang oh ka hu hadiuk yau shipper Bùi Văn Tùng di hãng pajeng ba Ninja Van, tuk padeih lễ tok khin hu daok di sang padeih padei piah pabak veik pein yava ka rilo harei ngak bruk glaih glar. Sa-ai Tùng ndom lac, bruk jao pandap dalam dom harei pandiak bhang yau apui di TP.HCM biak glaih glar, sa-ai tok kham merat jao pandap ka tuai njauk tukvak nan ye luac harei tok nduac di langiu jalan. Tuk lễ ini, sa-ai Tùng hu padeih 2 harei, kayua yau nan ye sa-ai tok caong khin hu padeih padei, pabak veik pren yava piah ngak bruk:“Caong khin daok di sang padeih padei atau nao nao labik ma-in halei jaik di ini piah ka glo akaok nyu laneng lanoi. Bruk ngak shipper glaih glar rilo. Nao tal tuai peih pandap tabiak mong iek, njauk hatai ye mek oh njauk ye ba-yar veik. Lễ ini oh nao halei, tok khin daok sang piah ndih atau nao labik halei jaik di sang”.
Daok sa-ai Đào Thắm, urang ngak di Khu công nghệ cao, TP.Thủ Đức ye dom thun ini mai, bruk ngak oh mbuan laghaih kayua công ty hu takik đơn hàng, tal akaok thun 2024 meng hu tani tanat hasit. Rai diuk kan kandah, min sang sa-ai daok kham merat patak pataom jien padai piah pasiam veik baoh sang di palei, nan ye oh saneng tal bruk nao me-in lễ. Sa-ai oh khin padeih lễ rilo harei, tok brei padeih hareii puac adit piah ka urang ngak hu padeih padei piah pabak veik pren yava nan lac siam paje. Tukvak ini dom thun dahlau, sa-ai jeng hu nao palei piah rivang amaik ame, min thun ini oh nao:“Nao palei huac gar radaih. Lễ ini padeih rilo harei nan ye rilo urang jeng jak gauk nao palei, tuk tagok mai veik ye gar radaih pandiak tra. Nan ye caik ka kaol anek nyu pakacah blaoh ka. Urak ini daok sang ôn bài thi ka anek, brei anek nao siêu thị, labik ma-in bui sambai jaik di labik daok oh nao halei atah ”.
Kuhria nao palei rivang sang, ba dom anek nao ma-in ka nyu bui sambai... atau lac tukvak piah padeih padei, ngak brei glo akaok laneng lanoi hadei di dom harei ngak bruk glaih glar, piah pabak veik pren yava, pataom mbaok manuac urang dalam sang nan jeng biak hu makna haong dom urang ngak dalam dom harei lễ 30/4 saong 1/5. Nan lac harei bo dom urang ngak hu mbang tui bruk bui sambai jayak, harei taneh aia tự do saong độc lập, jeng yau urang ngak dak padang saong khik caga quyền lợi ka drei hu jak jeng./.
Viết bình luận