Mala halui phun hijao dalam mblang bein sang bac THCS Tô Vĩnh Diện, ban sit Buôn Hồ, tỉnh Đắk Lắk, sa nyaom anek saih daok puac tapuk jaik sa sruh radaih tải sambo kanjik hu angan ieu lac “gilang tapuk bilan xuân”. Yaom lac langik pandiak pa-uh, sap yava meng rilo bruk me-in bui sambai di vil val nan daok rahtabiak, dom adei jeng daok caik hatai puac yaok blah tapuk.

Bahrau puac blaoh baoh Ariya “Em cứ sống một cuộc đời của cỏ”, adei H Sơ Mi MLô, anak saih bac tal 7A3 mek sa blah biaar vak dom hatai sahaneng di drei ka baoh tapuk blaoh ba tal labik di urang khik iek biyar veik piah taduan pandap. H Sơ Mi Mlô khan lac, adei mboh sruh radaih gilang tapuk nao mai ini biak makre, angaok nan hu biak rilo janih tapuk saong hu gam dom pandap ma-in biak chreih chrai.

"Adei biak takre gilang tapuk ini kayua hu rilo tapuk piah puac saong hu rilo janih piah roh duah, piah bac. Adei mai ini puac tapuk, thau hu rilo ilamu siam lagaih ka bruk bac taa saong tapa ini ngak ka glo akaok hu hadah hadai".

Oh lac hu alin saong hu puac tapuk, dom adei anek saih daok hu taduan dom pok pandap hu makna saong hu ba drei tame rilo bruk main bui sambai yau ye main cờ vua, cih thaot, ngak tò he, ngak kanduh tapuk meng carton,… Saai Phạm Khánh My, daok di ban Buôn Ma Thuột, tỉnh Đắk Lắk, urang khik iek radaih “Gilang tapuk bilan xuan” brei thau: meng hatai caong daong ka dom uranaih di dom  bhum kan kandah, bhum atah biyah pak Tây Nguyên hu puac tapuk rilo jang, meng thun 2020 Công ty xã hội Bồ Công Anh (daok di ban Buôn Ma Thuột) pambuak haong dom urang ngak pahla peih ngak danak dak haong angan ieu lac “Gilang tapuk mai tal puk palei”. Hadei di labaih 2 thun, “gilang tapuk” ini dak harei dak lagaih jang tuk hu sruh radaih tai sit hu ramik ngak gheih mekre, pajeng yaok janih tapuk, pandap alin, pandap ma-in nao tal grauk dom puk palei, dom labik sang bac di bhum atah biyah di dom tỉnh Đắk Lắk, Gia Lai, Kon Tum, Đắk Nông. Meng ini, “Gilang tapuk mai puk palei” hu saliih angan ieu bahrau lac “Gilang tapuk bilan Xuân”.

Jeng tui saai Phạm Khánh My, tal urak ini, sruh radaih “Gilang tapuk bilan Xuan” hu duh ka labaih 50 labik sang bac di dom bhum palei, daong ka labaih 15.000 adei sit hu puac tapuk saong ba drei tame dom bruk ma-in. Gam haong nan, mban khik ramik hu jao alin labaih 12.000 baoh tapuk ka dom tủ tapuk caik di dom tal bac pak yaok sang bac hu peih bruk ngak.

"Piah ka dom adei puac tapuk, angaok radaih tuk halei jeng caga dom paok pandap piah pachreih bac. Tuk dom adei bac blaoh vak hatai sahaneng di drei piah thau lac dom adei hu puac tapuk halei oh, drei pataom mek harak vak dom hatai sahaneng nan saong alin pandap ka dom adei, lac siphau, but, kalam atau pandap hagait hu di angaok radaih, dalam nan tapuk jeng meda alin brei".

Tui ong Trương Hoài Anh, Yam ndok Sở Thong tin saong Truyền thông tỉnh Đắk Lắk, meng hu bruk yam takai nao gam di dom jabat, dom kapul nyaom, dom doanh nghiệp, Harei tapuk saong ilamo puac tapuk yaok thun hu rilo tapuk jang hu ba tal dom sang bac, gilang tapuk di dom bhum atah biyah dalam tinh, rik daong tame bruk cak rok patagok ilamo puac tapuk di dom puk palei. Gam haong jalan puac tapuk yau meng kan, bruk pandar salih so, số hóa dalam  cak rok ilamo puac tapuk meda ngak brei pambak tabiak rilo jang dalam rahra, abih di nyu nan lac uranaih, anek saih.

" Dalam zaman kong nghiep 4.0 ye caong lac yaok urang cak rok jang, oh lac dalam tapuk meng kan bo dom jalan ngak, dom janih tapuk piah ka ilamo hu pambak tabiak dalam raidiuk, dalam rahra, ngak jeng sa xã hội bac megru. Piah ngak hu bruk ini, ye tỉnh, huyện, xã saong taong abih dom pakat kanja meng trung ương tal puk palei jeng hu mbaok tame peih ngak, pambak tabiak bruk puac tapuk jeng  bruk ngak yaok harei dalam rahra". 

Meng dom gilang tapuk meng tinh tal puk palei, tu tapuk hukum, tu tapuk labik bưu điện – ilamo xã, tu tapuk đồn Biên phòng, gam haong dom gilang tapuk nao mai hu ba tal yaok puk palei, yaok sang bac di Đắk Lắk, nyu ngak brei patagok kein lagaih, duh ka bruk puac tapuk di rahra, abih di nyu nan lac uranaih, anek saih bhum atah biyah, bhum tapen negar, bhum biak kan kandah. Tapa nan, daong ngak  ka ilamo puac tapuk dak harei dak hu pambak tabiak./.