Mai tal xã Mỹ Lợi A dalam dom harei ini, kol dahlak biak tatuak drei tuk mboh dom salih bahrau di bhum taneh dauk ia meng kan. Dua jalan praong nao tame xã Mỹ Lợi A lac tỉnh lộ 861 saong huyện lộ 79 urak ini hu pok glaong, peih praong tuh nhựa tapak, radaih ô tô nao mai biak lagaih. Rah tui dua gah jalan lac dom baoh sang praong patui gauk, daok dalam dom bein phun mbang baoh, luac thun ndam bingu tabiak baoh. Mỹ Lợi A harei ini hu salih bahrau mbaok mata, rahra hu labik daok tani tanat, sahanang hatai ngak mbang.

Urang pan akaok Đảng ủy, UBND xã Mỹ Lợi A khan lac, raidiuk rahra tagok yau urak ini lac meng hu bruk pala phun mbang baoh, abih di nyu lac phun durain hu daong ka mikva oh daok kan kathaot. Njauk ndem lac, meng tuk salih tapa pala phun mbang baoh, raidiuk di rahra pak ini hu yam tagok kaya mada. Amuk Cao Thị Chính, urang ngak nong  xã Mỹ Lợi A brei thau:

 “Dahlau deih, dahlak pala phun ổi, hadei ini meng pala phun durain. Pala durain mboh jeng hu, jien mek tame glaong jang pala ổi. Mboh bilan ini baoh jeng hu, thun ini mboh ngak mbang siam jang dom thun dahlau, drei pala phun mboh hu baoh biak bui sambai. Mikva thei jeng tani tanat jang dahlau”.

Tui Yaok pataom di UBND xã Mỹ Lợi A, dalam xa hu labaih 3.000 sang rahra haong 10.000 urang. Tal urak ini, hu labaih 30% sang kaya mada, labaih mateh lac dom sang ginup meda, tok daok hu 37 sang kathaot, meblah 1,17% dut saong abih tih rahra di xã. Jak jeng ini hu bruk rik tame di phun durain pablei baoh. Ong Nguyễn Tấn Đạt, Phó akaok UBND xã Mỹ Lợi A daok brei thau lac:

“Yaom kinh te di phun durain biak glaong jang dom phun mbang baoh karei dalam xã. Kayua yau nan ye, mikva salih dom janih phun pala karei yau ye phun panat, kruac bhung tapa pala durain. Piah hu jalan pablei tabiak baoh durain, xa jeng hu pambuak haong gah chức năng tut angan ma so bhum pala, tacei pato ilamo - kỹ thuật ka mikva pacang jit ruak ka phun durain, abih di nyu nan lac pacang caga ruak thu hala. Daok bruk pacang caga ia njom mbak ye kol dahlak jeng hu jalan ngak”.

Urang jakar, urang ndang, dam dara, urang dahlau deih ngak bol lin lac dom urang ba akaok nao dahlau dalam bruk pakacah gauk ngak mbang di palei. Tal urak ini, dalam xa hu 170  urang ndang sinh hoạt di 10 chi bộ; 100% urang jakar, urang ndang jeng hu tanut raidiuk meng mbiah tagok, rilo urang ndang lac urang ngak nong naih joi, lac kreih camin ka rahra ngak tui.

Tuk mai veik haong raidiuk yaok harei, dom urang dahlau daih ngak bol lin xã Mỹ Lợi A ba tangin tame ngak mbang di bhum taneh sang drei ngan haong bruk pala phun durain. Tal urak ini, raidiuk di urang dahlau daih ngak bol lin hu tani tanat, oh daok sang halei kan kandah. Ong Nguyễn Thanh Cảnh, Akaok Kapul urang dahlau deih ngak bol lin xã Mỹ Lợi A ndem lac:

 “Dom thun jaik ini, palei hu rilo salih bahrau, kinh te cak rok patagok. Urang ngak nong saong urang dahlau daih ngak bol lin meng hu kinh te bein bo praong abih lac phun durain. Raidiuk di jaik abih urang dalam kapul dahlau daih ngak bol lin saong urang ngak nong jeng tani tanat. Ngan haong kapul urang dahlau daih ngak bol lin oh daok sang kathaot, sang jaik kathaot, bo jaik abih lac kaya mada”.

Urak ini, Mỹ Lợi A lac labik hu bein phun durain praong abih di gah barak jalan roya 1 di huyện Cái Bè. Nan ye Đảng bộ xã khang hatai pambuak haong dom janih phun ini tui jalan paglaong chat luong, nang suat piah pabak ka bruk pablei tabiak negar langiu. Tui urang pan akaok palei, mayah yaom durain tani tanat yau urak ini, 5 thun tal, rahra pak ini thei jeng lac urang kaya mada. Ong Nguyễn Giáp Tý, Bí thư Đảng ủy xã Mỹ Lợi A brei thau:

 “Jalan ba tabiak di Đảng bộ dalam tukvak anak tal lac bruk ngak nong lac kinh te praong di xa. Xa brei ba phun durain ngak phun pala praong di xa saong tukvak anak tal tui  tacei pato di huyện ủy - UBND huyện ye xa hu  thau lac phun ini jeng bahrau jaik di ini, min kol dahlak jeng hu kakei, salih ilamo KHKT ka rahra piah pamaong tal bruk lac sa mblang taneh min jien mek tame rilo jang”.

Xã Mỹ Lợi A, huyện Cái Bè, tỉnh Tiền Giang daok di angaok jalan cak rok patagok, bruk pala phun durain pablei baoh tabiak negar langiu hu daong ka urang ngak nong di palei salih rai. Nan lac dom jak jeng dalam bruk pala drak, kak kajap haong mblang hamu, kak kajap haong puh cakak, pandar dom ilamo ky thuat bahrau pambuak haong sahneng duah bahrau di rahra hu ba gauk ngak kaya mada di bhum taneh palei drei./.