Dom harei ini, rahra di bhum Tây Nguyên daok glaih glar yam tapa mbang pandiak bhang, thu lagu biak trak damak. Di bhum kreih xã Măng Bút, huyện Kon Plông, tỉnh Kon Tum nhiệt độ glaong jang kuhria rah tapa rilo thun. Yaom lac langik oh lagaih min dom mblang hamu padai ia di urang Xơ Đăng di pak ini jeng daok hijao makre. Saai A Thuỷ, daok di palei Măng Bút brei thau, gam haong halau ia meng kraong Đăk Snghé saong Nước Cheng pruh la-an ka mblang hamu, meng thau salih bahrau dalam pala drak, phun padai oh lac brei nang suat glaong bo daok lac jeng pandap panda ba jien tame ka rahra:“Mikva palei Măng Bút rilo meng ngak padai ia. Pala saong drak khak meng khak kubau, khak hoá học. Dahlau daih oh ka hu jalan ngak yau nan, min urak ini mikva salih jalan sahaneng bahrau piah cak rok patagok siam jang dut saong dahlau deih. Padai dahlau daih drei ngak mbang min urak ini mikva hu padai, hu pablei mek jien mek tame gam gam”.

Tukvak ngak brei madeih, daong ka Măng Bút cak rok patagok lac meng thun 2009 tuk jalan Tỉnh lộ 676 hu padang ngak pambuak xa haong gah langiu. jalan mai tal xa mbuan lagaih meng bilan hajan tal bilan pandiak hu pachreih ba bruk pablei salih saong jhul bruk ngak mbang cak rok patagok. Meng bruk ngak sa janih phun padai ia, labaih 1.260 sang mikva bangsa Xơ Đăng dalam xa urak ini pala hu gam phun caphe, phun jru, cak rok patagok khang bruk raong glang. Meng nan, jien mek tame yaok tui akaok manuac di rahra Măng Bút thun 2023 hu labaih 34 triệu 600 ribau dong. Taphia di nan, rilo bruk ngak pambuak gauk di rahra saong hợp tác xã, doanh nghiệp hu peih ngak daok daong paglaong jien mek tame saong pasiam veik raidiuk di rahra. Ong A Vinh, Phó akaok UBND xã Măng Bút, huyện Kon Plông, tỉnh Kon Tum brei thau, xa daok peih ngak rilo jalan ngak cambaih laih pamaong tal bruk lac puac thun 2024 mek hu ginup 19 asal kadha dalam padang ngak palei pala bahrau ngak salah Sarak Nyaom roya Đảng bộ xã ba tabiak:“Jalan patagok kinh tế - xã hội di xã Măng Bút thau lac cakrok padai bhong di 6 palei gah dalam. Pala sâm talei urak ini hu Hợp tác xã jru tavao saong Du lịch Măng Bút daok pambuak bruk haong rahra pala, raong ikan tầm di palei Đăk Trun. Pala caphe di bhum taneh laar, raong kubau. Doanh nghiep pambuak gauk duah jalan pablei tabiak jru tavao saong dom janih pandap panda kaya nong karei ka rahra”.

Gam haong kham marat cak rok patagok kinh te, Đảng bộ, kanja saong dom kapul nyaom di xã Măng Bút, huyện Kon Plông jeng caik hatai sangka tal bruk pato magru, patagok dom ilamo cach mang meng kan di puk palei. Inem mek sajarah Cách mạng jayah Măng Bút tuk halei jeng lac labik tal di rahra, abih di nyu nan lac rai ranaih dalam xã.  Pambuak atah ilamo pachreih bac, Măng Bút hu rahra abih tih labaih 4.400 urang ye urak ini hu labaih 1.000 anek saih meng mầm non tal THCS saong xã oh daok bruk anek saih klak bac. Hu 10 thun kak kajap haong bruk pato pakai di xã Măng Bút, gru pato Nguyễn Văn Đức, Akaok Sang bac Phổ thông bangsa gam bac gam daok pakat I - II Măng Bút 1, brei thau:“Labik ini lac bhum taneh pachreih bac. Meng dom labik bac di puk palei tal sang bac dom adei kham marat nao bac, pagap yau labik bac Đăk Y Pai atah di ini tal 12 mbaik jalan min dom adei jeng tabiak mbang, daok, bac di ini biak siam. Anek saih di xã Măng Bút nao bac đại học tamat blaoh biak rilo. Urak ini hu klau pluh dom gru pato mầm non lac menuac di palei. Ngan haong pakat  I, pakat II di sang bac jeng jaik mateh lac menuac daok pak ini”.

Yam tagok meng kan kandah, Đảng bộ, kanja saong rahra xa biak kan kandah Măng Bút di huyện Kon Plông, tỉnh Kon Tum daok khang takai yam, jhul kadun likuk eik lipa, kathaot rambah. Ilamo cách mạng meng kan saong ilamo pachreih bac di rahra Măng Bút lac labik pambak tame khang kajap, lac prein khang ka bruk cak rok patagok di bhum taneh pak ini./.