Ong Lê Văn Lý, sang daok di mbon Đức Mẹ dalam palei Quảng Thành 2, xã Nghĩa Thành, huyện Châu Đức, tỉnh Bà Rịa – Vũng Tàu brei thau, 10 thun dahlau, sang ong hu mboh tangin tame harak pambuak bruk haong Pasak aia hacih, vệ sinh alam môi trường palei pala piah hu pandar aia hacih. Yau nan min, kayua labik mbon ceik glaong, aia nduac oh khang nan ye sang ong takik pandar tal halaw aia ini. Lavik lavik nao, sang ong oh pandar tal halaw aia ini tra bo salih tapa pandar aia bingun kuac piah gam pandar dalam sang gam mek aia pruh ka dom sào phun mbang baoh.

 Tui ong Lý, kayua ia nduac oh khang nan ye tuk peih van, aia oh nao tapa đồng hồ min chỉ số jeng nduac. Nan ye, jaik 100 baoh sang dalam labik ini salih tapa pandar bingun kuac: “Jaik abih bhap bani di labik ini daok dalam pasak mbon Đức Mẹ, aia pandar oh nduac truh, dahlau diah tuk harei ye oh hu aia nan ye rilo urang tame đồng hồ aia bo oh pandar hu. Meyah takik sang pandar ye patuah mai daok hu aia, daok rilo urang pandar ye oh hu aia. Tacei tame aia mac tok sa tukvak mek pagam ye mikva mboh aia nduac oh truh nan ye njauk salih karei. Pasak aia hacih tok ngak bơm cao áp nan ka meng patuah hu aia tani tanat, daok oh yau nan ye mikva di labik ini tok thau pandar aia bingun kuac”.

Dalam huyện Châu Đức hu jaik 4.500 baoh sang oh pandar aia mac kayua Pasak aia hacih, vệ sinh môi trường palei pala pabak brei. Daok di dom labik hu takik bhap bani daok, labik mbon ceik… jaik abih bhap bani tok pandar aia bingun khoan. Makna di nyu lac kayua mikva palei pala oh randap pandar aia mac, langiu di nan, di dom labik ini halaw aia tok caik ka bruk ngak nong, takik hu pandar. 

Huyện Đất Đỏ hu 4 baoh binek nan lac: Đá Bàng, Suối Môn, Sở Bông saong binek Lồ Ồ pabak brei aia ka mikva dalam xã: Long Tân, Phước Long Thọ, Láng Dài, ban sit Đất Đỏ. Urak ini aia daok veik dalam binek biak takik. Daok dalam tukvak tabung glaong pandiak bhang nan ye bruk pandar aia tagok khang. Yau nan min, huyện Đất Đỏ oh rah tabiak bruk kurang aia, aia tok nduac oh khang dalam vaktu tabung glaong. Anak bruk yau nan, huyện hu pathau khan, jak ba mikva pandar aia patak pataom, hu jalan ngak piah pataom khik aia dalam tukvak takik manuac urang pandar. Ngan haong aia pruh ka bruk ngak nong, mikva njauk pandar dom jalan ngak bahrau, patak pataom. Tui ong Trần Văn Dũng, Phaok duk Ngak nong saong patagok palei pala huyện Đất Đỏ, suai lavik huyện hu danak bruk buh jien tame ngak 10 km jalan aia hacih piah pambuak pagam tame dom labik mbon ceik glaong, takik bhap bani daok: “Ngan haong dom labik atah labik daok ye tỉnh jeng hu sangka saong pasang iek, hu jalan buh jien tame ngak jalan mbrong ba aia bahrau. Meyah hu UBND tỉnh brei ngak ye huyện meda buh jien tame ngak brei ka labik atah labik daok di bhap bani yau xã Láng Dài (labik Land), tapen ceik di xã Long Mỹ. Pasak aia hacih jeng hu mong iek jaik 10 km jalan mbrong ba aia nao tame dalam dom labik ini”.

Urak ini Pasak aia hacih saong vệ sinh môi trường palei pala tỉnh Bà Rịa – Vũng Tàu daok peih pandar 7 sang mac pabak aia, dalam nan hu 2 sang mac aia ngầm haong công suất ba tabiak jaik 53.400 m3/harei melam. Pasak daok pabak brei meng 55.000 tal 57.000 m3 sa harei melam.

Ong Nguyễn Lưu Thuyên, Phaok akaok Pasak aia hacih saong sa-at alam palei pala tỉnh Bà Rịa – Vũng Tàu brei thau, piah khik kajap bruk pabak aia pandar ka bhap bani, yaok harei jabat njauk blei tame meng 2.000– 3.000 m3. Tui kuhria, tapa bilan 5, Pasak meda blei tame rilo jang jaik 3000m3, piah pabak ka bruk pandar ia tagok glaong di bhap bani. Ong Thuyên daok brei thau lac, suai lavik meda pok panuac tagok tỉnh brei buh jien tame ngak rilo jang jalan ba aia di dom labik: “Suai lavik ye pok panuac tagok dom jabat chức năng di tỉnh brei buh jien tame pasiam veik dom sang mac pabak aia daok hu peih ngak, buh jien tame peih prong jalan mbrong piah ba aia nao tal labik atah dhua. Pambuak pagam haong dom sang mac aia tui quy hoạch di tỉnh”.

Tui Pasak aia hacih saong sa-at alam palei pala Bà Rịa – Vũng Tàu, bruk pandiak bhang daok dui atah, kayua yau nan ye Pasak hu panuac kakei dom gah du lich, bhap bani njauk hu jalan ngak piah khik aia di tuk melam, pandar aia tuk harei piah ka bhap bani saong tuai damuai hu ginup aia pandar./.