Meng thun 2008, tuk danak dak The Maris - Vũng Tàu hu ba tabiak ngak ye hatai sahaneng ba ragu ragam tame dom bruk du lich jeng hu po đầu tư sahneng tal. Min, dalam 2 thun tapa, tuk labik phức hợp hu ngak tabiak tantu cambaih laih ye hatai sahaneng nan meng hu peih ngak. Mboh lac di mbang padeih le meng blaoh, haong dom bruk ilamo, ragu ragam… The Maris - Vũng Tàu dui pachreih hu jaik 25.000 mbang tuai mai me-in. Saai Hùng, tuai daok pak Bình Dương hu mbaok tame bruk ragu ragam di “Harei pataom phố tasik The Maris” khan lac:           

“Meng dahlau mai dahlak hu nao ravang me-in di ban Vũng Tàu biak rilo mbang, min ini lac mbang camriep dahlak mboh hu sa bruk hu peih ngak biak gheih makre saong praong prang yau ini, biak gheih mekre tuk tuk hu sa san khau jaik takai tasik”. 

Tui ong Bùi Ngọc Tuấn, Tổng yam ndok The Maris – Vũng Tàu, jak jeng di “Harei pataom Phố tasik The Maris” dalam mbang padeih meng blaoh lac meng hu labaih 30 bruk ngak ilamo karei di gauk. Abih di nyu nan lac, melam ragu ragam “daoh haong tasik hijao” di sân khấu danao caluai vô cực, hu mbaok di dom urang daoh danei angan dui pachreih hu labaih 25.000 tuai mai maong iek:

“Urak ini bruk caong hu pang, hu maong iek, hu ma-in ragu ragam di tuai damuai biak glaong, min urang oh hu labik piah ma-in. Tui nan, kol dahlak daok kuhria peih dom mbang pakacah di dom ban nhạc, peih mbaok meng ban nhạc sinh vien dalam taneh ia pataom mai The Maris parang ma-in. Tapa nan meda hu jai thuong yaok thun, pagap yau thun 2025 lac sinh vien dalam taneh ia, thun anak lac sinh vien dom taneh ia Đông Nam Á, Châu Á… ini lac hatai sahaneng di The Maris meng tuk peih ngak danak dak”. 

Ong Đậu Thế Anh, Taong Yaom ndok Hồ Mây Park brei thau, yaok melam sanecar yaok adit di Binek May Park jeng hu danak dak daoh tamia pamere tuai damuai. Patui veik jak jeng ini, tui kuhria dalam bilan 5 ini, Binek Mây Park meda tabiak mbaok danak dak “đại nhạc hội” angaok sân khấu nhạc ia. Ong Đậu Thế Anh brei thau:

“Harei pataom daoh tamia meda lac sa pandap du lich, lac jalan nao di bruk patagok du lich urak ini saong harei hadei. Meng di urak ini, dom doanh nghiep njauk paglaong pandap du lich daoh tamia ini. Anak tal, tui kuhria dalam bilan 5 ini, binek Hồ Mây Park meda brei tabiak mbaok bruk daoh tamia saong meda hu biak rilo urang daoh mai pak ini piah daoh di san khau nhac ia angaok ceik, tui kuhria, bruk ini meda dui pachreih hu meng 5 tal 7 ribau tuai damuai”. 

Tui yaok pataom di Sở Du lịch tỉnh Bà Rịa - Vũng Tàu, tukvak le 30/4 meng blaoh di labik Hồ Tràm tui kuhria raok hu labaih 145.000 mbang tuai, tagok 39% dut saong tukvak ini thun blaoh. Tui ong Trịnh Hàng, Yam ndok Sở Du lịch tỉnh Bà Rịa - Vũng Tàu, anak tal Sở meda patui veik ba tabiak jalan ka tinh pambuak haong doanh nghiep piah peih ngak dom tour. Abih di nyu nan lac, dalam bilan 9 anak tal meda pambuak haong dom tour meng Hàn Quốc, Nhật Bản, dom tour dunya hu yaom sahui glaong… piah ka tuai mai tal Bà Rịa - Vũng Tàu rilo jang. Tỉnh Bà Rịa - Vũng Tàu caong khin dom doanh nghiep di dalam ban daok yam takai nao gam haong kanja palei, ngak tabiak dom danak dak, dom kadha praong gah ragu ragam..., pambak tabiak angan je du lich, piah dui pachreih tui damuai mai ma-in dak harei dak rilo jang:

“Kol dahlak jeng caong lac dom doanh nghiep tapa dom kadha âm nhạc, dom harei pataom…, ngak tabiak dom danak dak khang kadang jang piah dui pachreih tuai damuai mai tal Bà Rịa - Vũng Tàu, brei mboh Bà Rịa - Vũng Tàu lac labik tal salamat, dui chreih saong lagaih haong bruk du lich dalam zaman ini”.

Meda ndem lac, dom harei pataom praong, melam đại nhạc hội tapen tasik lac dom pandap bahrau di du lich Bà Rịa - Vũng Tàu meda khik takai tuai damuai di anak tal. Bruk ngak ini oh lac dui pachreih du lich, bo daok pamaong tal rahra meng jalan ngak bahrau ngan haong rilo bruk ngak lagaih dui pachreih hu rilo rahra saong tuai damuai./.