Yaok masup aval page, sa-ai Đặng Văn Khanh, urang daok di palei Dik, xa Bắc Bình, tinh Lam Dong (labik huyen Bắc Bình, tinh Binh Thuan klak) gilac jal val haong bruk pahacih var ro, srap gap kaya mbang ka labaih 400 drei tapai.

Sa-ai Khanh brei thau, meng dahlau diah ngak hamu padai daok ralo kan kandah, urak ini salih tapa raong tapai mboh lagaih haong baoh sang.

Labik var ro hu sa-ai padang khang kajap. Meng 30 drei tapai meng akaok meti, tal ini var tapai di sang sa-ai hu labaih 400 drei. Langiu di raong tapai New Zealand, baoh sang sa-ai daok raong tapai sambo bau, pajaih tapai hu rilo di bhum palei. Oh lac pablei tapai pajaih, labik raong di sa-ai Khanh daok pabak tapai mek ralo pablei hu yaom meng 80 – 90 ribau dong sa kilo saong 140 ribau dong sa drei tapai pajaih.

“Mikva mai blei pajaih adei jeng pablei, ngan haong yaom 140.000 dong sa drei”.

Atah di nan oh dom, labik ngak ralo, pablei ralo limo bambu sa pandiak di baoh sang sa-ai Bá Hữu Nhi jeng daok jal val haong bruk thik ralo saong bambu ralo, srap gap raok darak pasar Tet. Sa-ai Nhi brei thau, khin ka limo sa pandiak bangi ye bruk camreip lac brei ruah ralo that (bahrau thik), hadei nan lac bruk pandam saong bambu. Saong hu makna abih lac brei khik kajap salamat hacih sa-at ka ralo. Patui yaok janih ralo limo bo hu yaom pablei karei gauk, biar abih lac 400.000 dong sa kilo saong glaong abih lac 650.000 dong sa kilo.

“Akaok meti brei bambu iek, hadei nan urang mai blei ye drei yaih khan rah rah.”

Di jalan palei Dik Bình Hòa, xa Bắc Bình sap ieu gauk di dom adei sit bak kadung tapuk nao bac; atah atah lac dom sruh radaih li-ua daok ngak taneh srap gap trun pajaih mbang padai Đông Xuân…Taong abih ngak jeng sa thaik thaot chreih chrai ka raidiuk bahrau di palei Cam ini.

Xa Bắc Bình, tinh Lam Dong hu padang meng bruk pagam ban sit Chợ Lầu, xa Phan Rí Thành saong 2 xa hu rilo bhap bini Cam lac Phan Hiệp saong Phan Hoà (tinh binh Thuan klak).

Jaik di ini, langiu di jien mek tame meng bruk pala baoh gara - thanh long, ngak padai, raong limo, pabe… mikva urang bangsa Cam xa Bắc Bình daok bac megru, roh duah, salih jalan sahaneng “ngak dom bruk hu” tapa “ngak dom bruk darak pasar caong khin”; peih rilo bruk raong glang, peih tadai kuan pablei…ba mai kein laba, daong parilo jien mek tame ka baoh sang, tani tanat raidiuk.

Nao pagam haong patagok kinh te, mikva Cam xa Bắc Bình daok khik piah saong patagok dom ilamo siam gheih, adat cambat karei di bangsa drei, tapa bruk khik ramik dom inem mek sajarah (kalan Po Patao At, kalan Po Nit, kalan Po Klaong Kasat..), khik tani tanat raya bhap bini (Kate, Ramawan, Rija Nagar…), khik tamik bruk ngak meng tangin, khan ao bhap bini… Saong pagam ilamo haong patagok jirah rivang bhap bini, ba ilamo jeng sa labik pambak karo kajap ka raidiuk saong kinh te bhum palei.

Ong Hắc Văn Quang Huy, Akaok jabat Kinh te xa Bắc Bình, tinh Lam Dong brei thau, bhum palei patui likau pakat tinh pato tacei dom so, dom gah pambuak padang peih ngak piah paglaong yaom kaom harei Kate di kalan Po Nit. Daok palei ngak lan jeng daok kham merat peih ngak Danak dak Khik ramik saong patagok bruk ngak lan bhap bini di urang Cam palei Gaok.

“ Gam haong bruk ngak di karja palei, khol dahlak jeng hu pathau khan piah ka dom urang thau ka bruk hu makna di bruk khik ramik saong patagok bruk ngak di mukkei caik veik. Bruk ini oh lac bruk piah langyah bruk ngak  bo daok hu asal kadha ilamo di bhap bini bangsa. Tui danak dak di tinh ye bhum palei brei tabiak dom tanut pakat, danak dak tame sa jalan ngak, quy hoach pandar taneh di huyen (Bắc Bình klak) tal thun 2030, kuhria tal thun 2050 saong hu tinh mbaoh tangin. Khol dahlak hu brei panuac quy hoach padang Pasak Parang ndap nda lan Cam pambuak haong bruk parang iek bruk ngak lan saong adaoh tamia bhap bini Cam.”

Daok bhum urang bangsa Cam xa Bắc Bình, tinh Lam Dong harei ini, bruk eik lipa, oh lagaih hu jhul atah, salih di nan lac sa thaik thaot palei pala hadah hadai, ginup meda hu dom salih taong abih ka raidiuk daok dang dalam rahra. Nan lac bruk brei mboh ka bruk jum prein saong kham merat uak drei tagok di mikva piah ba palei Cam patagok karo kajap palei pala taneh ia negar./.