Đạ Chais ieu lac xa bhum atah bayah, atah di pasak huyen Lạc Dương jaik 60km, rahra rilo di nyu meng lac urang bangsa takik hu jaik 86%, bruk ngak nong hu ngak rilo abih di ini. Tukvak blaoh tapa, xa  Đạ Chais hu peih ngak dom danak dak padang balai, sang bac, gom truac saong jalan mbak dalam palei pala piah duh ka bruk ngak mbang saong raidiuk di Bhap bini Rahra.

Ong Bon Tô Ha Diêng, umo 55 thun, Akaok Kapul urang taha praong thun ralo umo di xa urak ini daok lac sa urang naih gheih di kapul ilamo kong caing palei Đưng K’Si. Meng Danak dak Khik ramik palei ilamo bhap bini pagam haong patagok jirah rivang bangsa K’Ho blaoh bo raidiuk di baoh sang ong saong dom baoh sang rahra dak harei dak hu tani tanat jang. Hadei tukvak tagok apuh, mikva dalam kapul ilamo kong caing ramik tukvak piah duh, tacei ba tuai damuai jirah rivang duah thau ka ilamo urang bangsa K’Ho, me-in ragam ragu bhap bini bangsa. Dalam baoh sang kayau tui thaik thaot meng kal di urang bangsa K’Ho hu yaom 500 trieu dong, ong Ha Diêng brei thau:“Drei lac sa urang Ndang, urang bhian ndom mayai lac urang Ndang ngak dahlau rahra bhap bini ngak tui hadei. Drei ngak habar piah hu Pathau khan jak ba rahra, dom rairah dam dara, dom kamuan anek saih ngak siam jalan ngak di Ndang, sarak hukum di Karja, abih di ngu nan lac oh ngak suan ka hukum taneh riya, hukum adat diuk pasang dalam baoh sang. Oh hu hukum halei ye drei pathau khan ka rahra ngak tui".

Piah ngak Danak dak jalan ngak pakat Negar patrun kathaot karo kajap, xa Đạ Chais hu sangka padang dom bruk patagok di baoh sang rahra; taong yaom piah daong ka dom baoh sang kathaot, jaik kathaot, baoh sang mbang tui sarak karja; daong khak drak, phun, pajaih; brei kat BHYT… ka rahra raidiuk kan kandah dalam bhum. Tapa nan, dak harei dak takik jang dom baoh sang kathaot, paglaong raidiuk, ilamo, ndap nda ka mikva. Ong Kơ Să Ha Khiên, Phaok Akaok UB Bhap bini xa Đạ Chais, huyen Lạc Dương ndom meyai lac: “Dom thun jaik ini raidiuk di rahra jeng hu patagok bahrau, dalam nan pataom tame bruk ngak bein kaphe saong pacang khik glai. Dalam nan mboh dom thun bahrau blaoh, jeng hu So ilamo saong Uy mbang bhap bini huyen Lạc Dương jeng hu buh jien tame padang palei ilamo, di jalan ngak ba xa drei patagok saong pamedeih ilamo meng kal di urang bangsa K’Ho.”

Mbang pato tacei bol lin ban sit Lạc Dương hu brei 1,7ha piah padang mblang brei ka bol lin pasram pagam saong patagok bruk ngak mbang. Labik ini jeng padang ngak labik pasram bol lin haong rahra, labik pala drak, raong glang; pagam haong Kapul dam dara bhum palei ngak bruk pala dom janih phun katut harei ngak jeng kadung jien ka dom bruk ngak di labik ini. Langiu di nan, kein laba meng bruk patagok bruk ngak mbang hu ba tame pabak ka urang jakar, bol lin rahra. Ong Mu Ha Thiêm, Phaok Urang Politik Mbang Pato Tacei Bol lin ban sit Lạc Dương brei thau: “Tuk padang bruk ini ye khol dahlak hulin jeng roh duah saong bac megru meng dom sang bein piah duah hu dom janih bangu, janih njam patam lagaih haong taneh langik jeng yau lac kein lagaih di jien padai di labik piah khol dahlak hulin meda padang bruk ngak hu siam lagaih, piah ngak yau habar ka yaok hadei bilan pala ye brei kein lagaih ka adei sa-ai bol lin hu bruk piah bac pasram ka bruk patagok bruk ngak mbang, jeng yau lac hadei yaok mbang Khol dahlak hulin hu bruk duah jien piah pandar ka dom bruk di labik ini.”

Yaom lac daok rilo kan kandah, min tui akaok sahneng, bruk ngak hadah krah, salih bahrau, pakat uy, karja saong dom mbang dom gah di bhum palei hu daong mikva urang bangsa takik ngak mbang patagok siam lagaih dom bruk pala kaphe, habei bhong, pala njam, bangu dalam sang majam hanyol… Gam saong bruk khik ramik saong patagok yaom kaom ilamo meng kal pagam saong yitvu, jirah rivang sinh thai, daong prein, kein lagaih patagok karo kajap ka ngak mbang patagok kinh te xa hoi di bhum palei.