Mikva daok di Khu phố 1, Phường 6, Quận 11, TP.HCM tuk bau tal angan amuk Phùng Kim Phụng ye meda lac thei jeng anit ranam kayua amuk tuk halei jeng abih hatai daong ka puk paga. Thun ini umo jaik 60 thun, urang kumei bangsa Low hu jaik 20 thun umo Đảng jeng daok kham merat hu mbaok tame bruk palei, ngak rilo bruk. Amuk lac UV Thường vụ Kapul urang kumei Phường 6, phaok akaok dhar kapul urang kumei Khu phố 1, saong lac akaok "kapul urang pathau khan sap Low" di phường.

Baoh sang daok angaok jalan Tạ Uyên di amuk Phụng hu jeng labik pagul sanya di rilo mikva bangsa Low, mai tangi sua ka bruk blei thẻ BHYT, bruk mesraiy phun jien, bruk ngak harak khai sinh ka anek atau ngak harak kết hôn. Lac akaok "kapul urang pathau khan sap Low" di Phường 6, yaok mbang nao họp mai, amuk Phụng khan brei abih gauk thau meng sap Low:

" Drei ndom menyai meng sap Low ka urang thau, bruk ngak yau habar, makna yau habar meng dui pachreih hu. Jaik abih mikva hu anek taco harei nao ngak bruk, daok veik urang taha, urang praong thun nao họp bo sap Yuan oh cambaih, nan ye drei ndom menyai meng sap Low ka urang thau piah mai sang khan veik brei anek taco thau, yau nan abih gauk meng hu mbaok tame ginup dom bruk ngak, yau ye tuan dok, pathau khan pacang khuah padam khuah…"

Dalam Phường 6, Quận 11 hu tal 82% menuac lac urang Low. Nan ye bruk padang "kapul urang pathau khan sap Low" haong 25 urang pathau khan hu ba mai siam lagaih, daong ka mikva urang Low samar thau dom bruk bahrau abih; gam haong nan, khan brei urang jakar thau dom bruk daok ngak suh sah bhap bini. Tapa nan, pathau khan dom sarak, jalan ngak di Đảng, hukum di Karja tal bhap bini, abih di nyu lac mikva urang Low daok dalam Phường.

Tui bruk ba tabiak di Kapul urang kumei Phường 6 lac “Bac megru tui Wa yaok adit”, dom menuac dang bruk lac urang Low ba gauk lang tabiak dom panuac ndom gheih di Wa Hồ meng dua – dua sap Yuan – Low.

Langiu di nan, dalam dom harei roya praong, atau dom bruk ngak di palei, dom menuac dalam "kapul urang pathau khan sap Low" lang dom kadha vak meng sap Low piah ba tagok bản tin di Phường. Amuk Lạc Thị Liên, daok di Khu phố 1, urang dalam kapul pathau khan sap Low Phường 6, Quận 11 khan lac:

"Drei jak ba adei sa-ai kumei dalam palei hu mbaok tame, jeng bui sambai saong hu thau rilo bruk jang., Dalam sang tuk hu bruk hagait kandah gauk ye meng drei nao họp gam gam nan ye thau un sabar, pato pakai anek hu siam jang. Nao họp drei krein randap rilo adei sa-ai kumei dalam nan, drei ieu tame kapul, nao họp bui sambai lo."

Meng bruk rik prein di "kapul urang pathau khan sap Low", Kapul urang kumei Phường 6 jak ba hu rilo urang ngak pahla saong rahra, yaok 3 bilan hu alin hadiah 1.000 ổ bánh mì chay, 500 klaok ia nước suối (atau hộp ia tasau) brei ka adei sa-ai kumei sang kan kandah, urang ngak gaok kan kandah, dalam nan rilo meng lac urang Low. Langiu di nan, daok hu peih ngak siam bruk “Baoh sang pambuak talei anit ranam", "Baoh sang phun hijao", dui pachreih hu urang tame daong brei khan ao, takhaok dép, katap daok bahrau labaih 95% brei ka bhap bini, tui jalan ngak lac "Menuac hu daong ka menuac kan". Amuk Phan Thị Thu Hà – akaok kapul urang kumei Phường 6, Quận 11 brei thau:

" Kapul lac ba akaok nao dahlau di phường, kham merat hu mbaok tame dom bruk ngak, yau ye lang tapa sap Low angaok dom blah Facebook atau fanpage ka bruk ngak di urang kumei. Yaok adit, kapul jeng hu lang Chỉ thị 05, dom dalikan, dom panuac ndom gheih di Wa Hồ tapa sap Low, meda pabak sap tame tra. Langiu di nan, dom anai jeng hu jak ba dom urang ngak pahla daong ka dom sang kan kathaot, dom menuac kan kandah dalam phường, brei pandap Tết, daong jien bac, daong jalan ngak mbang duah jien…"

Langiu di Phường 6, dahlau nan Quận 11 hu padang "kapul urang pathau khan sap Low" di Phường 13 thun 2020 haong dom bruk ngak siam lagaih. Rilo mikva urang Low brei thau, dahlau daih dalam rilo mbang họp, bruk khan brei thau abih meng sap Yuan ngak ka rilo urang Low thau oh cambaih, oh ginup. Meng di tuk dom kapul pathau khan hu tabiak rai, bruk khan meng sap Low hu ba chreih chrai ka abih gauk. Meng nan, dom asal kadha pathau khan hu mikva urang Low thau cambaih, bruk peih ngak jeng hu siam lagaih rilo./.