Ruak Barah ling tagei ieu lac sa janih uranaih njauk njom anek ruak laka barah ling di takai tagei. Ruak pandik ling tagei di uranaih rah tabiak kayua mai meng rilo makna, dalam nan rilo di nyu lac kayua pahacih tagei pabah oh siam oh lagaih. Kayua oh pahacih sa-at tagei pabah njauk cara ngak ka anek ruak, pandap mbang labaih pataom tame, lavik harei nyu gam khang. Dom janih nyu gam khang nan hu anek ruak ndam gam di mbaok tagei ngak laka ling vil taom dan tagei di uranaih.

Ling tagei anek naih barah bhong tuk tamuh tagei ieu lac bruk anak meta, bhian gaok di tukvak uranaih tamuh tagei thaok di dalam umo labaih 6 bilan. Asal kadha ini ieu lac kayua takai tagei tamuh tagok ngak trak damak ka ling, ngak ka ling barah bhong.

Langiu di nan, pandik tagei ling tagei barah bhong meda kayua gaok laka tuk tagei dhuk gaok gauk, memeh pandap mbang, kaik kakau tangin… ngak ka ling tagei barah bhong saong gaok mai ngak brei ka nyu pandik.

Anek naih pandik tagei barah ling tagei bhian hu mboh yau ye:

Anek naih barah ling biak mbuan nduac darah tuk braoh cah tagei.

Ling kurang sambo bar atau juk, oh hu mboh that.

Ling hu dom janih paka ndam gam atau bak dom janih patih oh bhian.

Anek naih pandik ling ngak mbau pabah kayua ling barah hu laneh.

Dalam mbaok saong ling hu mboh laka.

Anek naih barah takai tagei, ngak mbuan kadun ling ngak tagei megei.

Ruak pandik ling di anek naih hu rabha jeng dua paka

Tuk anek naih pandik ling ye amaik ame brei pahacih sa-at tagei pabah uranaih ka siam lagaih, braoh tagei, talung pabah meng ia sara di sang 2 mbang sa harei. Ia sara ngak takik pandik, takik bruk njom anek ruak saong jhul tagok bruk pasiam ling tagei.

Meyah mboh ling tagei biak pandik ralo jang ye brei ba anek naih nao tal labik taong ruak piah hu pasang iek ruak saong pang panuac kakei saong taong padam ruak.

Piah pasiam brei ka bruk pandik ling kayua njom anek ruak, anek naih meda pandar jru caga ruak, caga pandik… Amaik ame oh ta-eng brei ka anek menyum jru, brei njauk pang panuac kakei di bac si ieik ruak.

Tuk anek naih pandik ling barah bhong ye njauk caik hatai brei mbang huak ka siam mekre piah daong ka dom bruk pacang ruak, daong jhul tagok bruk pasiam veik ling tagei. Tui di nan tuk uranaih gaok ruak barah ling ye brei ka uranaih mbang rilo janih pandap nda mbang hu rilo janih xơ, ikan hồi atau dom janih ikan lamek karei (yau ye ikan klik, ikan darei…) ia riak meng tulang, ia tuk ralow menuk, ia tuk bingu njam cải hijao, ia tea hijao…

Oh mbang dom janih pandap khang, pandap mbang rilo greng atau hu rilo saradang, kayua meda ngak ka ling tagei barah trak jang, ngak pandik saong laka ling tagei.

Piah ka ruak pandik ling tagei di anek naih oh patambak praong, amaik ame brei tacei ba ka anek naih braoh tagei takik abih 2 mbang yaok harei, abih di nyu lac hadei tuk mbang saong dahlau tuk nao ndih piah brei oh daok janih nerak ndam gam saong anek ruak.

Njauk mbang ralo njam hijao saong baoh kayau rilo vitamin piah ralo prein yava di ling tagei.

Piah caga pahacih dom janih ndap nda brei ka anek naih bhian ba tame pabah, caga ia anek ruak njom tame ling tagei. Njauk baa nek naih nao pasang iek ruak tagei yaok 6 bilan/mbang piah roh duah dalau jeng ye padam ruak din drah ka dom janih ruak tagei.