Kam kum: Uranaih tuk njauk kam kum ye meda pandiak, haok aia idung, pandik tarakong, patuk, dhung phal, pandik rup pabhap. Dalam nan, uranaih biak kan ciuk tuk gar idung, haok aia idung meda njauk dui atah jang dom kadha karei. Meyah oh hu mong iek, taong ruak ka nyu njauk ye ruak meda ngak jang barah phổi, barah cơ tim, barah glo akaok, barah cơ, tiêu cơ vân, suy jalan suak yava...

Pacang caga kum di uranaih caong khin njauk khik pandiak ka ranaih tuk langik tasik salih bilan (abih di nyu lac dom ranaih bahrau caih memek), abih di nyu lac di dom labik yau palak takai, palak tangin, cakoi, akaok. Uranaih tuk njauk kam kum meda mboh pandiak, gar idung, pandik tarakong, patuk, dhung phal, pandik laghah rup pabhap. Juai caik ranaih taom gaok haong rilo urang, abih di nyu lac dom urang daok brei mboh njauk kum. Brei ranaih menyum aia ấm, juai blei mbang dom pandap mbang mek tabiak meng tu la-ar yau kem, aia khar.

Viem jalan suak java:

Ruak njaom mbak khuan jalan suak yava bhian rah tabiak di tuk salih bilan, tuk langik la-ar, ndo am dalam langik trun biar. Uranaih meda njauk ruak ini jaik 6 tal 8 mbang dalam thun. Ruak njaom mbak tapa jalan cambuai, aia tabah, taom gaok meng tangin saong dom pandap panda piah mbang menyum. Uranaih meda njauk pandiak glaong, pandik akaok, la-ar abih rup, pandik rup pabhap; pandik tarakong, patuk, glaih glar; lah mbang, kan suak yava, aih craoh... Tok mboh dom kadha nan, amaik ame njauk ba ranaih nao tal dom balai iek ruak piah pasang iek pren yava saong taong mek ruak.

Pandiak tamuh mban:

Pandiak tamuh mban di uranaih bhian ngak tabiak meng virus sởi atau virus rubella. Ruak hu ngak tabiak meng virus sởi daok iew lac mban bhong, ruak ngak tabiak meng virus rubella daok iew lac mban đào. Pandiak tamuh mban bhian njaom mbak tapa jalan suak yava, tuk uranaih suak yava gam haong halaw khí haong urang ruak. Ini lac ruak njaom mbak kayua virus nan ye tok meda taong mek dom kadha brei mboh ruak. Tuk njauk pandiak tamuh mban mban uranaih hu mboh glaih glar, pandik akaok, haok aia idung, pandik tarakong, viêm kết mạc meta, niêm mạc di tarakong meda hu tamuh dom tanut darah sit. Tuk mboh uranaih hu brei mboh dom kadha medhil lac njauk pandiak tamuh mban, amaik ame njauk ba nao tal balai iek ruak piah hu pasang iek ruak saong chẩn đoán ka nyu njauk ruak kayua lac nyu mbuan meluk haong ruak pandiak tabiak darah.  Taphia di nan, juai brei ka nyu taom gaok rilo haong môi trường mbuan ba tal ruak, ngak brei pa-atah haong uranaih, urang prong njauk ruak pandiak tamuh mban, sởi,…

Ngak brei hacih sa-at rup pabhap, bhian rao tangin haong japon piah pacang caga ruak.

1. Kluak vaccine pacang caga ruak ka uranaih (ngan haong dom janih ruak hu vaccine pacang caga yau kum, sởi,…).

2. Grap tanat dinh duong, brei ka uranaih mbang ka nyu ginup duong chat: asal tapung, asal đạm, asal limek, vitamin saong khoáng chất, mbang rilo baoh karaoh piah daong ka rup pabhap patagok vitamin, paglaong pren pacang caga. 

3. Ngak brei hacih sa-at rup pabhap, bhian rao tangin haong japon, ngak brei hacih idung, tarakong yaok harei meng aia sa-ra.

4. Ngak brei hacih sa-at alam môi trường, puh ramik sang danaok, môi trường diuk rai jaik taphia hacih sa-at, laneng lanoi.

5. Khik ấm karanaih tuk nao angaok radaih, tuk nao tabiak langiu di tuk melam, njauk caik hatai ngak brei khik ấm palak takai, palak tangin, cada, cakoi, akaok.

6. Juai brei ka uranaih taok gaok rilo haong urang daok brei mboh lac njauk dom janih ruak njaom mbak yau kum, jalan suak yava, aih craoh,…

Tuk uranaih hu dom kadha medhil lac njauk ruak ye caong khin ba chip nao tal dom balai iek ruak piah pasang iek ruak, juai caik pak sang blaoh ta-eng brei taong mek ruak./.