Jaik dom janih ruak pandik idung pandik tarakaong di anek anaih ralo di nyu mai meng virus dan haong hasit kayua anek ruak dalam darah liên cầu khuẩn tamuh tabiak. Bier halei dom janih virus ini njom tame dalam rup tapa idung haong tarakong, nyu ngak cuang dalam idung, ngak ka ia caga ruak oh pacang ruak hu. Hu yau nan ngak ka anek ruak mbuan lagaih mbak tame jeng ruak.

Uranaih pandik barah idung tarakaong hu dom bruk brei mboh yau:

Hadei di 1 – 3 harei kuhria meng tuk virus tame rup pabhap, uranaih mboh chruh la-an, hu: glak idung; pandik tarakaong, pandik dalam tarakaong, tarakaong barah bhong; dal idung, chrai ia idung; Patuk; glaih glar.

Langiu di nan, manuac ruak pandik bak rup; Pandik akaok, alah mbang huak. Dom janih ruak yau nan ngak ka anek naih susah dalam rup dan haong nyu bhian dui atah meng 7-10 harei atau suai jang.

Tui ruak kayua hagait, mada uranaih mboh karei di gauk, yau ye: Uranaih pandik idung tarakaong kayua virus, pandiak mbang dreih virus, patuk, aih craoh, pandik merah bhong meta, chraiy ia idung… Uranaih pandik idung tarakaong kayua darah liên cầu khuẩn brai darah kapul A: Pandiak glaong (angaok 38.5 độ C), tarakaong barah bhong, amidan njar ia jangaih takoi bong barah pandik…

Ruak pandik idung pandik tarakaong di anek anaih kayua njom njauk ia virus ruak prah dalam langik di urang patuk, glak, chraiy ia idung atau ndom mayai.

Piah daong brei ka bruk caga ruak, urang ngak amaik ame caik hatai dom cara yau ye: Pasram brei ka anek naih randap bhian rao tangin meng sabon padam anek ruak. Caga juai brei ka anek naih jaik manuac ruak jeng ye urang mboh dreih urang ruak pandik idung pandik tarakaong. Pahacih brei ka saat labik daok, labik anek anaih ma-in. Caga juai brei anek anaih main ndap main di urang karei. Bier halei patuk, glak atau chraiy ia idung, anek anaih njauk mek ba-ar pacang pabah dan haong idung, blaoh pabik ba-ar tame bai rah dan haong rao sa-at cih tangin.

Klauk jru caga ginup saong njauk saka dom jru vaccine ka uranaih tui pato tacei; Bhian pahacih sa-at idung saong pabah ka uranaih meng ia jru sara. Ngak tui jalan ilamu barau jeng ye brei ka anek naih menyum ginup ia yaok harei. Caga juai uranaih ba tangin tagok mbaok, dalam nan njauk caik hatai gaok idung saong pabah. Khik pandiak dalam rup uranaih bien halei hu langik la-an, dalam nan hu takoi, tada, plak takai saong plak tangin. Khik brei saat hacih labik daok di uranaih, juai tasah, juai dhun mun jeng ye sak pakao

Anek naih ruak pandik idung pandik tarakaong njauk brei mbang menyum ginup tui ilamu, bruk ini biak hu yaom glaong, amaik ame meda brei salih janih kaya pandap mbang yaok harei meng dom janih pandap mbang lamar, mbuan si mameh mbuan luan, min njauk ginap prein kaya ka uranaih. Gam tui di nan, brei ka uranaih mbang tui hatai caong khin, rabha jeng rilo var mbang dalam harei haong kaya pandap mbang takik jang dut haong yaok var piah khik kajap bruk uranaih hu mbang trei bo oh biak trei. Amaik ame njauk caik hatai juai kateik anek naih mbang biak rilo, kayua ngak ka anek naih mbok kan daman saong huac di mbang. Langiu di nan, piah daong ka uranaih kurang patuk, amaik ame meda brei manyum ia dalako, kruac aik, laya… Dom janih ini gam karo salamat gam siam ka tarakaong saong trun dom bruk ngak kan daman dalam rup ka anek naih./.