Phun húng chanh daok hu angan ieu lac njam tần kapan hala, dương tử tô atau njam pahe bilau. Húng chanh lac janih phun hareik, diuk lavik thun, glaong meng 20 tal 50 cm. Dhar phun hu bilau sit, racam saong mbau pahe. Hala hu rilo ia, hình trái xoan bhian tamuh tapak gauk. Jhih hala hu “răng cưa” min oh haluak. Dua mbaok di hala hu sambo hijao saong hu bilau. Bingu sambo ngu bhong, tamuh di akaok dhar atau di jhung phun. Baoh húng chanh biak sit, hu sambo nâu. Yaok baoh hu sa asar.

Urak ini, janih phun ini hu blei tame saong pala di grauk dom tinh, ban dalam taneh ia drei. Bhian di nyu, dom urang ngak gah jru tavao pandar hala phun húng chanh ngak jru piah taong ruak. Meda hu paik hala húng chanh hadei di 1 bilan pala. Hadei di tuk paik tok buh khak saong pruh ia ginup, phun meda tabiak hala luac thun.

Jalan ngak: pandar hala atau dhar húng chanh mada rao hacih saong pandar. Jeng meda pandar hala hu pambu thu blaoh.

Jalan khik piah: ngan haong hala húng chanh thu njauk hu khik piah di labik thu, lahei.

Tui Đông y, húng chanh hu tính ấm, hang saong oh hu jru mek, daong taong ruak suh laar, pandiak kayua phong hàn. Tui sa roh duah di Jabat Đông y, Viện Vi trùng brei mboh, dom janih hu dalam hala húng chanh hu prein pacang anek ruak biak khang. Meng dom kein lagaih ini, hala húng chanh bhian hu pandar piah taong ruak pandik tarakaong, ralai labar, sruh laar atau patuk kayua pandiak phong hàn, lahik sap, patuk atau taong ruak athur kaik.

Langiu di nan, dom janih dinh dưỡng hu dalam hala húng chanh biak glaong, daong paglaong prein pacang caga ruak ka rup pabhap, pacang gilac veik haong dom janih ba tal ruak kik. Abih di nyu nan lac dom janih limonene hu dalam hala hu kein piah ngak samu veik acid dalam tung pruac, daong taong ruak ợ pandiak saong trào ngược dạ dày thực quản. Taphia di nan, nyu daok ba mai kein lagaih piah pacang laka, daong khik ka kalik, patakik veik bruk praong tagok di tế bào ung thư kalik saong tế bào ung thư tasau.

Húng chanh daok hu saok klik piah tauk, jru som saong mek ia piah manyum. Tui ruak saong makna ba tal ruak bo pandar karei di gauk. Húng chanh bhian hu pandar that saong hu pandar takik di nyu sa harei lac meng 10 tal 16 gram.

Phun húng chanh meda ngak brei dị ứng cak rok. Kayua yau nan ye, urang oh njauk gauk haong dom janih di jru, siam di abih lac oh pandar nyu. Bruk siam lagaih saong tukvak pandar daok tui prein yava rup pabhap di yaok manuac urang. Kayua yau nan ye, dahlau di tuk pandar, urang ruak njauk sua tangi panuac di bác sĩ./.