Tuk langik pandiak pa-uh bloh hu hajan meda ngak brei ka dom ruak njaom mbak tapa jalan ia

Cảm cúm. Ruak bhian ngak brei pandik akaok, pandik rup saik, pandiak, patuk saong glaih glar. Ruak bhian dui atah dalam 5 tal 7 harei. Piah patrun pandiak, pandik akaok, pandik rup pabhap, urang ruak brei padeih padei mbiah tal tuk abih pandiak,  brei mbang pandap mbang mbuan ralai saong brei menyum rilo ia. Langiu di nan, mikva njauk klauk vắc xin cúm piah caga ruak.

Pandiak tabiak darah. Urang njauk ruak pandiak tabiak darah bhian mboh rup pandiak, glaih, pandik akaok, pandik meta, pandik talang, khin taglaoh ta-ok, pandik tian meng labik pasak tagok, sraiy darah di labik dhung, labik takai tagei atau mboh jum jhuk, tagok baoh ia mangaok rup. Tuk njauk ruak, mikva njauk nao tal labik y tế piah hu iek ruak saong taong ruak. Piah pacang ruak, mikva brei gam gam pametai lăng quăng meng gum sir dom pakaong ia, palao ikan tame dom pandap caik ia praong. Langiu di nan, brei kak kamo tuk ndih, cuk khan ao tangin atah.

Ruak langiu kalik. Tui bác sĩ Lâm Nguyễn Thùy An, ini lac sa dalam dom ruak bhian gaok di bilan hajan. Tuk njauk ruak, mangaok kalik hu dom baoh ia tapaok kakah, jhih ndaong tagok, pambak praong tabiak, meda hu dom tanut bhong meriah atau baoh ia. Rilo labik mikva daok ieu lac ruak laka. Tuk mikva khik oh hacih sa-at, laka jeng ndah tabiak saong njaom mbak meng urang ini tapa urang daih. Kayua yau nan ye, meyah njauk hajan, ia dauk, mikva brei rao ka nyu  hacih, uak thu kalik.

Ruak jalan tung pruac. Tuk njauk ruak jalan tung pruac bhian ba tal aih craoh, taglaoh ta-ok, pandiak. Ruak oh cang menyum jru min nyu meda thit eng. Tuk njauk ruak, urang ruak brei mbang menyum siam, pambuak haong pasram pahat rup pabhap yaok harei. Meyah njaom vi trùng ye brei nao taong ruak di sang iek ruak. Nan ye mikva brei gam gam rao tangin meng sabon dahlau di tuk mbang huak, hadei di tuk nao ruak tian saong plaih atah labik njaom ruak.

Pandik cambaoh talang talaih. Gam haong hajan ia sua, langik bian salih bilan, dom ruak gah talang talaih jeng bhian gaok. Urang ruak mboh pandik dom talang talaih dom labik yau tangin, bara, ta-uk..., dom labik pandik nan kan megei, abih di nyu lac di tuk mesup, dah page. Bác sĩ An kakei lac, mikva brei bhian pasram pahat rup pabhap piah pacang plaih ruak dalam bilan hajan. Langiu di nan, mikva brei mbang menyum siam, lagaih saong menyum rilo ia piah khik bruk “trơn tru” di dom talang, talaih ./.

Urang lang: M. Phuong – 08/09