Langiu di bruk halang độc tố, gan daok hu labik dang praong dalam bruk ngak brei saradang saong dom axit béo jeng năng lượng, pandap dinh dưỡng nao raong dom labik karei dalam rup.

Di urang siam mekre, lamek tok hu 2- 4% teik trak di gan. Tuk lamek ini tagok labaih 5% teik trak di gan, lac gan njaom lamek.

Urang mbuan njauk gan njaom lamek lac: bhian mbang dom janih pandap mbang hu rilo menyek, lamek, saradang, mbang kurang đạm. Dom menuac lamek, takik ngak bruk, njauk dom ruak viêm gan B, C, pandar dom janih jru hu tác dụng phụ jeng meda njauk gan njaom lamek…

Ruak gan njaom lamek bhian tamuh tabiak haong dom ruak srau kadau chuyển hóa yau me-ik saradang, tagok darah, lamek labaih kilo, srau kadau lipid darah…

Tukvak camereip, gan njaom lamek oh ngak kan kandah hagait tal bruk ngak di dom labik dalam rup saong prein yava di urang ruak. Min meyah oh hu pasiam veik samar, gan njaom lamek meda trak jang, ba tal dom ruak praong jang yau ye: xơ gan, suy gan cấp, tabiak darah jalan tiêu hóa, ung thư gan...

Ba tal patrun bruk ngak di gan: Tuk lamek labaih di mô gan rilo, dom tế bào gan bhian njauk kateik tagok. Meng nan ngak kan kandah tapak tal prein chuyển hóa saong pataom veik di gan. Meyah oh hu langyah, ba tal bruk ini dui atah ngak brei bruk ngak di gan nyu trun.

Gan njaom lamek dui atah meda ngak brei glaih glar, kan kandah tal dom labik karei dalam rup, lah mbang… Meng nan ngak ka prein miễn dịch di rup pabhap nyu trun biar, mbuan njauk ruak nhiễm trùng.

Ngak kan kandah tal tim mạch: gan njaom lamek meyah dui atah gam gam, meda ba tal xơ vữa động mạch, dom ruak tim mạch. Tuk ngak jeng tal xơ vữa, mbuan ngak brei pandik akaok, ndih oh hu, takik kanal hadar.

Ruak gan njaom lamek hu parabha jeng 3 pakat: gan njaom lamek pakat I, gan njaom lamek pakat II saong gan njaom lamek pakat III.

Dom ruak di gan oh hu jalan tamuh tabiak meyah yaok urang drei hu jalan diukrai khang kadang. Jaik abih dom ruak di gan meda hu taong thit abih, abih di nyu lac di tukvak bahrau ruak, taong ruak njauk saong gam gam, kayua yau nan ye, mikva brei khik ramik prein yava di gan biak siam, meng bruk lac:

Nao pasang iek prein yava tui njauk tukvak ba tabiak piah samar thau lac ruak; pasram pahat rup dom janih njuan njac dalam 30 minit yaok harei yau ye caluai ia, juak radaih, dance sport...; takik menyum alak, mbia; tui iek bruk teik trak di rup pabhap.

Bruk mbang huak brei siam, lagaih, saong meda mbang tui jalan brei ka menuac njauk ruak gan njaom lamek: pandar dom janih pandap hu vitamin C saong E, dom janih pandap hu prein khik caga gan, daong halang, giải độc, daong prein ka bruk ngak di gan, hu rilo dalam njam hijao, asar paloi, ngũ cốc tamo asar saong baoh kayau yau cam quýt.

Mikva njauk mbang rilo njam patam, baoh kayau, pandap mbang hu chất xơ piah patrun bruk gan njaom lamek. Dom pandap daong ka gan samar siam veik, lac: cần tây, cà rốt, rau mùi, tea hijao, tea bingu cúc, tea bạc hà, cam, patei, kruac... Pandap mbang oh hu năng lượng yau tảo, rong biển, bimao jeng biak siam ka dom urang njauk ruak gan njaom lamek. Takik mbang pandap mbang hu rilo cholesterol yau ye: tung pruac, kalik athur, lòng đỏ baoh menuk./.