Gan njom lamek meda rah tabiak meng rilo makna karei gauk. Dalam nan, raidiuk saong bruk mbang huak oh siam mekre ieu lac janih makna praong abih. Langiu di nan, dom janih ruak yau ye me-ik saradang, srau kadau salih lipid dalam darah, lamek bhi atau ruak barah baoh hatai gan kayua virus jeng meda daong ngak tagok bruk mbuan njauk ruak gan njom lamek.

Bruk hu makna dalam tuk gan njom lamek meda hu pasiam rilo abih meyah urang ruak salih bruk mbang huak saong khik tani tanat bruk daok dang hu ilamo.

Bruk mbang huak njauk lagaih oh sa janih lac brei patrun lamek pataom dalam gan blaoh daok daong ka luac jalan pasiam dom te bao gan njauk kan kandah. Kayua nan, padang bruk mbang huak njauk ilamo lac sa dalam dom jalan ngak hu makna daong pasang iek saong pasiam ruak.

Parilo mbang njam hijao saong baoh kayau that: Urang mabuh ruak baoh gan njom lamek brei kayua pabak dom janih njam hijao ralo tame dalam huak yaok harei yau njam kai, njam bina, njam bangu kai hijao, karot atau dom janih njam hu hala hijao. Dom kaya mbang ini hu rilo janih xo daong pasang iek saradang dalam darah saong patakik patak pataom lamek dalam gan.

Langiu di nan, baoh kayau that yau baoh medan, kruac bung, kuac, baoh yau atau baoh kiwi jeng pabak hu rilo vitamin C saong janih pacing oxy hoa hu lagaih ka prein yava gan. Min, urang ruak brei patakik dom janih baoh kayau biak yamein piah plaih tagok saradang dalam darah.

Palih ruah halau ndam siam mkre: Dom urang ilamo gah dinh duong pachreih kakei urang ruak brei caik dahlau dom halau protein takik janih lamek yau ye ikan, ralo menuk ada klak kalik, ritak mbong dau phu, dom janih ritak atau ia tấu takik janih lamek. Iakan tasik yau ikan hoi, ikan darei atau ikan kun hu rilo axit lamek omega-3, daomng patakik barah saong pasiam bruk srau kadau lipid darah – sa dalam dom kadha hu pambuak tal baoh gan njom lamek.

Patakik dom janih kaya mbang rilo janih lamek saong kaya mbang hân menyek: Kaya mbang janih hu ralo mamek menyek, kaya mbang samar, ahar yamein, kaya mbang hu ngak dahlau atau dom kaya mbang rilo menyek lamek jeng lac dom kaya mbang urang njauk ruak baoh hatai gan njom lamek brei patakik mbang. Urang ruak brei caik hatai dom bruk ngak kaya mbang siam mekre jang yau tuk, tahaneh atau am.

Pasang iek saradang saong tinh bot: Mbang biak rilo saradang saong rilo tapung mada ngak tagok triglyceride dalam darah, ngak patak pataom lamek dalam baoh hatai gan. Dom janih kaya mbang yau ahar keo, ia yamein, ia taiy ia tasau, ahar mi patih atau lisei thaoh mbang biak rilo jeng mbuan ngak tagok ruak gan njom lamek.

Urang ruak brei palih ruah dom janih ngu coc baoh karoh daok tamo asar yau brah lut, yen mach atau ahar mi tamo piah pabak nang luong ka rup pabhap. Dom kaya mbang ini hu rilo janih xo daong tani tanat halan darah nduac saong daong luac jalan salih janih lamek.

Patakik alak tapai: Bruk menyum alak tapai mbie bhian meda ngak pataom ralo lamek dalam gan saong ngak ka ruak tamuh samar jang.

Menyum ginup ia: Ia hu makna dalam bruk daong luac jalan jalih janih saong daong rup pabhap tathuak dom janih jhak tachauk. Yaok harei brei menyum meng 1,5-2 lit ia.                                    

Taphia langiu bruk pasiam bruk mbang huak, urang njauk gan njom lamek jeng brei pagam haong bruk daok dang hu ilamo piah mek hu siam lagaih pasiam sia jang. Dom urang ilamo pachreih kakei brei khik tani tanat takik abih 30 minit pahat rup yaok harei yau nao tablak takai samar, juak radaih atau luai ia.

Pataom taong abih lac: Baoh hatai Gan njom lamek lac ruak rah tabiak rilo min meda hu pasiam meyah urang ruak srap gap salih bruk daok dang saong padang bruk mbang huak njauk lagaih. Bruk mbang huak hu ganap dinh duong pagam haong bruk pahat rup bhian brei daong patrun bruk pataom lamek dalam baoh hatai gan, daong pasiam chuc nang gan saong daong pacing khik prein yava suai atah./.