Bimao kalik nyaom mbak meng asau mangiu nan lac janih ruak bhian gaok, abih di nyu lac dalam vaktu langik tasik pandiak am, bilan hajan atau tukvak salih bilan.

Dom janih bimao ngak jeng ruak angaok anek asau, mangiu ye meda diuk saong cak rok angaok kalik, mbuk, bilau saong cakau. Tuk anek athur raong njauk nyaom ruak bimao, ralo bimao nyu meda daok kandong angaok bilau, kalik atau dalam moi truong vin taom dhar bimao, meng nan nyaom mbak tapa manuac urang tuk hu taom gaok jaik taphia.

Anek manuac meda nyaom mbak bimao angaok kalik meng anek asau, mangiu tapa rilo jalan rilo jalan taom gaok karei di gauk. Dom bruk ngak bhian randap yau kuan asau, mangiu, brei ka anek athur raong ndih gam sa baoh me-neng, bah bilau… jeng meda ngak ka mbao tu bimao meng bilau atau kalik anek athur ndam gam tame kalik anek manuac.

Bimao jeng meda nyaom mbak oh tapak tapa dom ndap nda pandar yau aphui, blah lang nih di anek athur, ndap nda ndam bak bilau, san sang atau tham ciu hu pagam balau anek athur. Meyah kalik manuac hu inem saluah sit atau he mien jit patrun, ye mbuan si nyaom mbak tagok bimao.

Inem mbuan brei thau abih nan lac dom lika vin angaok kalik gam haong dom catuak pagap tau: thaik binguk vin atau thaik binguk mbau duc; Mbaok vin taom dhar pambok glaong jang labik kalik jaik taphia; angaok mbok hu kakah kalik thu; meda hu tamuh dom mun aia sit.

Dom inem saluah bhian pambak prong blaoh ngak jeng baoh vin biak karrei.

Tamuh katal nan lac kadha bhian mboh. Urang ruak bhian mboh katal rilo jang tuk tabiak aia huak atau tuk langik pandiak.

Tuk medhil kanda lac nyaom ndik tagok bimao kalik, urang ruak njauk nao tal labik iak ruak bhian iek ruak gah kalik piah pasang iek ruak saong taong mek padam ruak ka nyu njauk.

Piah patakik bruk nyaom mbak bimao di angaok kalik mai meng anek athur raong, dom urang ilamu brei panuac kakei dahlaau bhap bani njauk ngak tui dom bruk ngak hadei ini:

Pasang iek pren yava tui njauk tukvak masa ba tabiak ka anek athur raong: Asau mangiu njauk ba nao pasang iek ruak pren yava tui tukvak drei ba tabiak di dom labik iek ruak ka anek athur. Meyah pasang mboh inem juh bilau atau hu laka di kalik, njauk ba anek athur nao pasang iek ruak piah samar drah dil samu taong iek ruak.

Khik haci hacih ka anek athur raong: Bruk menei gei saong rami ramik bilau ka asau, ta-yao daong patrun bruk nyaom mbak bimao. Urang raong njauk menei gei ka anek athur tui njauk tukvak, khik ka van ro haci hacih saong pambu ka nyu thu aphui, blah lang ndih ala pandiak.

Takik taom gaik biak jaik: Yaom lac biak ranam anek athur min tapi urang raong juai pok cum anek athur, brei ka anek athur ndih gam sa baoh ghe me-neng atau caik ka anek athur lah mbaok lah tangin. Hadei di ma-in haong anek asau, mangiu njauk rao tangin hacih meng jabon.

Duah mboh saong taong mek ruak avan: Meyah angaok kalik hu mboh dom baoh laka vin, katal hu kakah, ye mikva njauk nao pasang iek ruak, juai ta-eng drei nao blei jru menyum piah mek ruak. Bruk samar duah mboh ruak oh lac tok daong taong mek ruak ka nyu siam laghaih blaoh daok ngak brei patrun bruk pambak tapa manuac urang karei dalam sang.

Paglaong hatai saneng pacang caga ruak: Raong anek athur nan lac hatai takre di rilo baoh sang saong ba mai rilo kein laghaih gah glo akaok. Yan nan min, piah grap tanat khik siam ka pren yava, urang raong njauk caik hatai tal bruk rimik hacih saong pacang caga ruak ka anek athur gam haong anek manuac.

Binah prong dom urang njauk ruak bimao kalik nyaom mbak meng asau, ta-yao ye jeng meda taong mek abih ruak meyah duah mboh avan saong pandar jru njauk. Kadha njauk ndom nan lac bhap bani njauk paglaong akaok saneng ka bruk mbuan nyaom mbak ruak meng anek athur raong, langiu di nan peih ngak dom bruk piah pacang caga ruak ka nyu laghaih./.