Tame yaok akaok thun, sa-ai Nguyễn Mai, daok di xa Hoa Lac, ban Ha Noi gilac duah thau angaok dom blah web ka than vak thun tal di drei saong baoh sang di drei. Iek tapa dom blah web, sa-ai mboh hu sa asal kadha pachreih, dalam nan hu lang yah ndom ka than vak thun athak Athaih brei ka thun thak di drei. Sa-ai hu pambuak talei phon ginum biai haong po tai khoan nan mong iek ye hu langyah ginup abih dom cuang kandah, saong meyah caong khin hu jalan diuk rai siam gheih ye njuak blei baoh koong phong thuy ngan haong yaom 2 trieu ndong. Oh huac kanda hagait, sa-ai Mai chuyen khoan chip. Blaoh Yau nan min, cang miat miat oh mboh baoh koong phong thuy mai tal tangin drei, tuk sa-ai vak tin gilac meng thau po tai khoan nan pacang cak tin nhan di drei.

Meng bahrau blaoh, sa-ai N.H. di Ha Noi jeng hu urang bleik abih 2,5 trieu ndong jien phi ngak adat meng atah tuk tagok blah web duah jit vu "pok patuk yah bla". Sa fanpage caik angan dreh yau sa baoh baha daniey angan ba tagok thaik binguk ngak adat cambat biak gheih ghang, hu gam ba-ar “brei thau kong ndeik” ngak ka manuac sia jia tui. Tok hadei di dom minit chuyen khoan, urang njauk cagat njauk pacang cakak, fanpage jeng lahik tui.

Jaik abih dom kol urang bleik pagat meda khan brei thau cambaih laih dom asal kadha akaok mereip gam haong dom panuac salam biak siam gheih yau brei panuac javap jaleiy oh abih jien, mong ien than vak patuah jamo oh abih jien atau langyah dom patuk jhak – siam dalam thun angaok bleh web piah pachrei dom urang hu hatai caong khin duah thau ka hatai jia. Meng di nan, dom urang kanjah jhak ini katung dui  dom urang njauk bleik ngak adat, blei ndap phong thuy... ngan haong yaom jien meng dom trieu tal dom pluh trieu ndong. Gaok mai, meyah urang halei oh ginup jien, kaol nyu daok brei patrun yaom, tui jalan ngak bruk “tui hatai jia”, nduac dom danak dak pachreih dalam tukvak katut panak piah pachreih dom urang njauk cagat chuyen jien. Saong yau nan lac hu biak rilo urang hu jeng anek moi ka urang cagat urang bleik saleik.

Makna ngak ka rilo urang njauk cagat angaok blah web hu brei thau lac kayua anak meta hu mboh rilo urang njauk cagat oh huac oh kanda hagait, dom urang ini tuk halei jeng saneng tal bruk caong khin hu sron mbuan salamat, caong khin hu jien padai min gilac oh saneng tal bruk pacang caga khaol bleik saleik kaol cagat.

Tui Trung ta Lê Anh Tuấn, Phaok akaok duk jabat 5, Cuc An ninh mang online saong pacang cakak kaol kanjah jhak pandar jamraik ngak kong pakat glaong, Mentri Kong an brei thau: “Dom urang ini hu ba tabiak rilo jalan ngak taong tame hatai jia, bruk samar drah di sa binah manuac urang bhap bani caong khin pandar yaom jien sit piah likau patuah jamo akaok thun. Gam di nan, kaol nyu daok dak padang dom blah website, fanpage; kaol nyu pandar AI piah cakak pagam dom thaik bingik di dom labik peih ngak bruk kakuh likau, agama piah taong tame hatai jia di yaok urang bol blaoh peih ngak bruk bleik saleik.

Ngan haong bruk daong di ilamu kong nghe AI ini, dom urang ini daok cakak pagam padang ngak dom video clip kakuh likau, ngak jeng dom tai khoan ao piah patagok manuac urang tui mong tui iek. Hadei di tuk urang mabuh bleik salih abih jien atau brei mboh ka bruk huac kanda ye dom tai khoan ini meda palai lahik”. Yaom lac hu thau yau nan, hatai caong khin likau sron mbuan, salamat, patuah jamo, jien padai nan lac hatai saneng di taong abih manuac urang. Yau nan min, tuk bo bruk bleik saleik cagat kong nghe glaong dak harei dak tarung tarang saong paglaong, ye bhap bani njuak hu bruk tinh tao, mong iek ka nyu cambaih laih saong duah thau ka nyu cambaih laih piah plaih jien lahik ruak daok meng akaok thun.

Kayua yau nan ye, jabat karja hu pachreih dahlau:

- Bhap bani njauk paglaong akaok saneng, njauk duah thau ka cambaih laih bruk ngak agama njauk haong me tin di ndoan, juai sup mbaok sup meta jia tame bruk ngak mboi toan, langyah than vak, ba mai sron mbuan angaok blah web.

- Njauk duah thau ka cambaih laih saong ka nyu njauk angan je dom urang ngak dahlau di tuk peih ngak taong abih bruk hagait giao dich angaok blah web.

- Bhap bani njauk paglaong akaok saneng pacang caga, oh payua jien rik daong, rik brei pambuak pagam tal hatai jia, tal bruk ngak agama tame dalam dom tai khoan oh thau cambaih laih asal halau gha di nyu. Meyah hu jeng urang njauk gat njauk bleik, ye bhap bani njauk nao tal jabat kong an khan brei thau piah hu bruk daong saong langyah samar drah./.