Barah jalan tiet nieu baong ia ma-ik ieu lac janih ruak hu tamuh rilo, meyah oh hu taong ruak atau sangka prein yava ka njauk, barah jalan tiet nieu meda ngak tabiak bruk kan ciuk yau me-ik pandik, me-ik nyu harao, pandik labik tung ala, ia me-ik vik atau ia me-ik mbau.

Langiu di bruk menyum jru tui patacei di bac si, bruk mbang huak menyum ia saong bruk daok dang njauk lagaih jeng daong hu brei ka bruk padam ruak saong abih ruak drah aval. Rilo janih kaya mbang atau bruk randap daok dang mbang huak meda ngak pachreih bang quang, ngak ka bruk njom ruak jeng trak jang.

Kayua yau nan ye, urang ruak brei sangka plaih mbang dom kaya mbang saong ia menyum dalam tukvak taong ruak.

Takik menyum kophi: Dom janih ia menyum hu caffeine meda ngak pachreih bang quang, ngak tagok bruk mboh jal me-ik saong ngak ka dom jalan tiet nieu baong ma-ik kan jang.

Juai menyum mbie, alak saong ia menyum hu alkol: Dom janih ia menyum ini hu gas bhian hu janih caffeine, janih ngak yamein, gas saong dom janih ia kaya kan karei. Dom janih ini meda ngak pachreih niem mac bang quang, ngak tagok bruk mboh jal me-ik saong ngak ka dom bruk me-ik pandik, me-ik harao mboh cambaih laih jang.

Patakik dom janih mbang hu mbau hang pandiak: Dom kaya mbang hang pandiak yau amraik, amraik kalu, wasabi atau dom janih hang meda ngak pachreih baong ma-ik bang quang saong nieu dao.

Patakik kaya mbang hu ngak blaoh dahlau: Dom janih kaya mbang hu ngak blaoh dahlau atau kaya mbang samar bhian hu rilo janih lamek oh siam, sara saong dom janih papaok pacang di nyu. Dom kaya kan ini mbuan ngak patrun bruk pasiam di rup pabhap tuk daok ruak. Salih tame di nan lac, urang ruak brei caik dahlau dom kaya mbang that, takik menyek lamek saong rilo janih xo piah daong prein yava jalan tiet nieu.

Sangka njauk piah ruak samar abih:

Langiu bruk patakik pandar dom kaya mbang saong bruk randap meda ngak trak jang bruk barah jalan tiet nieu baong ia ma-ik ye urang ruak jeng brei menyum ginup ia yaok harei piah daong ngak brai ia me-ik saong daong tathuak anek ruak tabiak truh jalan baong ia ma-ik tiet nieu.

Langiu di nan, bruk pahacih sa-at rup pabhap hacih sa-at, nao me-ik njauk tuk saong ngak njauk tui pato tacei taong ruak di bac si jeng hu makna dalam bruk pasang iek ruak.

Barah jalan tiet nieu baong ia ma-ik ieu lac ruak meda hu taong ruak siam lagaih meyah mboh ruak aval saong sangka njauk janih kadha di nyu. Kayua yau nan ye, tuk mboh dom bruk yau me-ik pandik, me-ik harao, me-ik tabiak darah atau pandik labik tung ala, mikva brei taong ruak aval dom labik y te piah hu pasang iek ruak saong taong ruak dil samu, plaih caga brei ka bruk ruak tamuh tambak karei oh caong khin./.