Tui panuac Gru jru.CKII Trần Nguyễn An Huy, Akaok Khoa Noi hatai baoh saong daong ataong ruak di Sang iek ruak Hoàn Mỹ Sai Gon, tagok darah saong ndot quy jang hu sa gaok agha lac gan arak darah, ngak jhak tal bruk darah nduac dalam rup lac hatai baoh saong glo akaok. Makna ngak darah tagok glaong di hatai baoh kayua xơ vữa meng cholesterol pataom ralo atau darah ghuai ngak xơ vữa di gan arak darak. Dalam nan, ndot quy meda rah tabiak kayua dua makna lac tabiak darah atau kurang darah glo, ralo abih lac kurang darah glo.

Bruk brei mboh ndot quy: Di labik glo gaok rambuac, urang ruak bhian mboh yau ni:

- Vaiy cambuai, kan ndom atau ndom oh njauk baoh panuac.

- Mboh njak rup, glaih glar, oh veih hu mateih rup pabhap.

- Pandik akaok biak trak, mek aok, having akaok, nao si labuh.

- Kurang mata maong biak takatuak, bhian rah tabiak di sa gah mata.

- Glo akaok oh hadah hadai, oh hadar hu atau oh thau urang karei ndom mayai hagait.

- Tuk mboh urang ruak hu dom bruk mbuan ba tal ndot quy, manuac dalam sang brei krein hu saong maong iek sumu, abih di nyu nac lac dalam tukvak makna:

- Ieu phon drah samar tal Tong ndai daong iek ruak samar chip 115 atau dom sang iek ruak hu ilimo taong ruak ndot quy di labik jaik taphia drei.

- Caik manuac ruak ndih trun, daok saong peih cadu talei ka-ing, ao tapha piah darah nduac hu lagaih.

- Oh eng taong ruak camreip saong veih manuac nao labik karei di tuk oh ka bac magru di ka bruk daong taong ruak camreip ndot quy kayua ngak oh njauk nan mbuan ngak kanjah jhak tal rup pabhap manuac ruak.

Trieu chung darah tagok glaong di baoh hatai

- Mboh pandik tada, kateik trak, pandik yuek dalam tada, bhian mboh tuk daok padeih padei.

- Kan thuak yava, thuak yava mboh glaih, baoh hatai ndaoh samar, having akaok.

- Glo akaok catang, susah hatai, patuh ia hauk.

- Mboh pandik takatuak di tangin, palak tangin, ka-ing…tui guan.

Ngan haong dom bruk mboh manuac njauk darah tagok glaong di hatai baoh, manuac dalam sang ieu phone ka labik daong taong ruak drah samar. Dalam tukvak cang urang y te, dom gru jru hu pachreih manuac sang ngak tui dom jalan daong camreip tapak di labik, dalam nan hu:

- Khik ka manuac ruak daok hu lagaih.

- Thuak ao khoac tabiak, ca vat piah patrun bruk thuak yava, glaih glar.

- Mayai haong urang ruak saneng bui sambai.

- Aip hatai baoh di langiu tada atau ho hap nhan tao tuk mboh hatai baoh padeih ndaoh, padeih thuak yava. Min ini lac jalan ngak hu bac magru tani tanat saong manuac daong iek ruak hu ilimo di bruk ni.

Di Ban raya Ho Chi Minh, Sang iek ruak Hoàn Mỹ Sai Gon lac sa dalam 17 labik hu So Y te Ban raya HCM taduan brei harak lac labik hu jalan iek ruak ndot quy pabak, dalam nan hu: mek darah, palahik arak darah, taong ruak glo akaok, blaic raih arak glo akaok saong vat li tri lieu hadei ndot quy. Yaok thun labik hu daong taong ruak ka rabau urang saong taong ruak hu jak jeng ka yaok ratuh urang ndot quy daong patrun trak damak ka baoh sang saong xa hoi.