Manei bhian lac yaok harei di urang, piah ngak hacih sa-at rup pabhap saong sahnang akaok iku hadei sa harei ngak bruk glaih glar. Min meyah manei lavik melam, ia manei biak la-an atau biak pandiak… jeng lac sa bruk ngak jhak tal rilo urang, abih di nyu nan lac di urang ruak tagok darah.

Tuk lavik melam, langiu langik la-an jang, pandiak la-an dalam rup pabhap karei gah langiu. Manei tuk pandiak la-an dalam rup pabhap biak karei haong ia meda ngak rup pabhap handok. Pagap yau meyah manei ia la-an, kalik la-an jang, baoh hatai ndaoh samar saong tagok darah katuak. Bruk ini ngak kurang darah dalam glo akaok, ngak kan kandah tal talei arak, kruak mek glo atau hu ieu lac tai biến. Bruk tai biến biar, urang ruak tok gaok having akaok, metai meteh mbaok, lagah laguai bara…Langiu di nan urang ruak meda metai tuk daok manei atau khang rup pabhap, dang baoh hatai, klaok suan tuk nao ndih hadei nan.

Karei di nan, manei ia biak pandiak, pandiak la-an cagar gauk ngak ka rup pabhap peih praong jalan darah. Jalan darah peih praong ngak trun darah, urang ruak mboh having akaok, having meta, gaok mai langek.

Manei oh njauk meda ngak kan kandah haong rilo urang, abih di nyu nan lac urang ruak tagok darah. Kayua nan, urang ruak brei caik hatai tal dom bruk yau ini:

Oh manei lavik melam: Lavik melam, langik la-an abih dalam harei. Hu rilo urang njauk kruak mek kayua darah tagok tuk manei lavik melam. Ini jeng lac tukvak rup pabhap jaik padeih padei, prein pacang caga ruak trun biar, darah nduac dalam rup takik jang. Kayua nan ye, oh manei lavik melam hadei mon 22 tuk. Meyah oh hu tukvak halei piah manei drah jang, brei manei dalam labik kandauk angin saong manei ia pandiak.

Oh manei suai: Oh manei suai meng 15 - 20 minit yaok mbang. Manei biak suai meda ngak mbuan trun darah, ngak having akaok, glaih glar, atau langek, abih di nyu nan lac ngan haong urang ruak tagok darah daok brei menyum jru.

Oh manei tuk darah daok tagok: Meyah darah dalam rup drei tagok glaong, hu mboh dom bruk yau pandik akaok, having akaok, baoh hatai ndaoh samar, siam abih juai manei tuk nan. Kayua tuk manei, rup pabhap brei pasiam pandiak la-an dalam rup piah darah nduac lagaih, bruk ini meda ngak ka darah nduac samar jang, ngak kurang darah nduac dalam glo, baoh hatai, patagok brukkruak mek, darah oh nduac tame hu dalam baoh hatai.

Oh manei hadei bahrau mbang blaoh: Hadei var mbang, darah nduac dalam gah tung pruac rilo jang piah daong ka bruk tung pruac pandap mbang. Manei hadei tuk bahrau mbang blaoh, abih di nyu nan lac ia pandiak ngak darah tabiak truh gah tung pruac rilo jang, ngak kan kandah tal bruk tung pruac pandap mbang, ngak mbuan pandik tian, kan tung pruac. Kayua nan, mikva brei cang takik abih 30 minit tal sa mon hadei tuk mbang blaoh meng nao manei.

Ruah labik manei: Labik manei biak hu makna praong ka prein yava di urang ruak darah tagok glaong. Labik manei hu angin yak, baok tathah meda ngak ka rup pabhap mbuan la-an, ngak kan kandah tal darah nduac dalam rup. Gam haong nan, sang janal, oh hu gai pambak jeng ngak mbuan mebuh, abih di nyu nan lac haong urang praong thun umo hu ruak pambuak tal baoh hatai. Kayua nan, brei ruah labik manei kandauk angin, hacih sa-at, brei padang dom gai pambak, plaih kandah mebuh./.