Sang iek ruak Nhi Trung ương saong gah pasang iek ruak njaom mbak mboh hu 3 urang njauk ruak Whitmore, dalam nan hu 2 uranaih di Thanh Hóa saong 1 urang praong di tỉnh Đắk Lắk. Urak ini, 1 uranaih di Thanh Hóa metai bloh. Mintri Y tế kuhria mboh dahlau lac, anak tal, daok hu dom urang njauk ruak di rilo tỉnh, ban, nan ye mikva njauk caga pacang ruak. Dalam kadha “urang iek ruak” adit ini, da-a mikva saong taong abih gauk duah thau dom panuac kakei di Mintri Y tế piah caga pacang ruak Whitmore.

Uranaih umo 15 thun njauk ruak daok di xã Mai Lâm, ban sit Nghi Sơn, tỉnh Thanh Hoá njauk ruak Whitmore metai di melam 11/11 meng bloh, dalam rup mboh suy đa tạng, bruk tung. Dahlau di nan, adei nan hu ba tal sang iek ruak Nhi TW di harei ka 12 hadei di tuk tamuh ruah trak; phổi tổn thương, kan suak yava, daok hu ndaih baoh tabiak darah di 2 palak tangin, adei daok hu suak yava meng mac, khik bruk vận mạch, pandar IVIG, brei halang darah, dut iek duah makna. Dom bác sĩ tapa pasang iek mboh lac adei njauk shock nhiễm khuẩn/suy đa tạng/Whitmore. Yaom lac dom bác sĩ abih hatai iek glang, taong ruak, min adei oh tapa truh...

Anak bruk kan kandah di ruak ini, Mintri Y tế hu ba tabiak panuac kakei  7 jalan ngak piah pacang caga ruak Whitmore:

Mikva brei khik hacih sa-at rup pabhap, bhian rao tangin haong sabon saong ia hacih, abih di nyu lac dahlau saong hadei di tuk ngak pandap mbang, hadei meng nao jaman ruak tian, hadei meng nao ngak hamu, dahlau di tuk mbang.

Mbang tasak, menyum ia riak jru caik la-an, pandap mbang hacih sa-at, oh sik ngak ralow, oh mbang ralow menuk ada, athur njauk ruak metai.

Takik gaok tapak haluk, ia nerak, abih di nyu lac di dom labik njaom nerak trak. Oh menei, caluai di dom bingun, danao, kraong jaik labik njaom nerak.

Pandar pandap khik rup pabhap yaok harei yau: takhaok, ủng, harum tangin… meyah bhian ngak bruk di langiu langik, bhain gaok taneh, haluk saong ia nerak.

 Tuk laka hu pabah atau pandung, brei palaih gaok haluk atau ia njaom nerak. Meyah oh plaih taom gaok hu, brei pandar băng pacang njaom ia saong brei hu rao hacih.

Dom urang hu ruak dalam rup yau ye ruak me-ik saradang, ruak gan, thận, phổi mạn tính, trun prein miễn dịch..., brei hu iek glang, khik caga dom labik laka piah pacang njaom anek ruak.

Tuk mboh medil lac njaom ruak, brei nao tal labik y tế piah hu tacei jalan, pasang iek piah thau saong hu taong rauk samar drah./.