Ngan haong uranaih njauk ruak pandiak tabiak darah meda hu meng oh mboh hagait lac ruak, atau mboh lac ruak hanjul tal ruak trak. Kayua hu tal 4 janih ruak pandiak tabiak darah Dengue, nan ye sa urang meda njaom ruak tal 4 mbang. Dalam dom harei camereip di ruak pandiak tabiak darah bhian lac meng hanjul tal mbiah nan ye biak mbuan meluk haong dom janih ruak pandiak karei, yau cúm mùa, COVID-19.... Kayua yau nan ye, uranaih brei hu tui iek saong samar mboh dom kadha brei thau lac njauk sốc, piah samar ba tame sang iek ruak, taong ruak piah patrun metai lahik.

Meyah uranaih njauk ruak njuan tok brei iek ruak di sang, brei uranaih padeih padei saong menyum jru trun pandiak. Amaik ame meda pandar jru patrun pandiak acetaminophen/paracetamol; oh brei pandar jru Ibuprofen piah patrun pandiak. Jaik abih uranaih meda siam veik pren yava hadei di tuk abih pandiak. Tuk urang prong njauk ruak pandiak tabiak darah, bruk bhian gaok nan lac trun tiểu cầu (nduac darah), daok ngan haong uranaih sit, bruk bhian gaok nan lac sốc. Kayua sốc nan ye uranaih mbuan njauk ruak jalan suak yava, nduac darah, ứ dịch saong trun chức năng rilo labik dalam rup babhap, ba tal metai..

Bác sĩ Đỗ Anh kakei lac: “Tuk amaik ame mboh uranaih hu dom kadha yau: pandik hatian, glaoh ta-aok; rup babhap tuk la-ar tuk pandiak; uranaih nduac darah di idung, cambuai, tabiak darah dalam aia me-ik, dalam khak atau kalik mbok baleic; tangin takai uranaih la-ar; pandik hatian, gan prong tabiak, kateik tame mboh pandiak labik hatian” ye njauk ba uranaih nao tame sang iek ruak chip. Bhian di nyu, ruak meda rah tabiak haong 4 vaktu, lac: vaktu ủ ruak meng 5-7 harei; pandiak; mbuan ba tal metai lahik saong siam veik. Uranaih meda pandiak meng 2-7 harei gam haong pandik cơ, pandik meta, pandik khớp, pandik tarakon, pandik akaok, glaoh ta-aok; tagok mban di kalik, ndong tanut darah di kalik...

Ruak pandiak tabiak darah meyah oh hu tui iek saong taong ruak njauk, meda ba tal ruak trak. Uranaih meda abih pandiak meng di harei ka 3, min meyah oh caik hatai tal bruk nguy hiểm yau ndih rilo, takik me-ik, hia caok, glaoh ta-aok, pandik hatian, nduac darah idung, darah di lin tagei, gloang tabiak darah, nao juak glai khak juk, darah tabiak rilo tuk jak dalam rup, uranaih mbuan njauk ruak trak saong mbuan ba tal metai lahik.

Kayua yau nan ye, tuk uranaih njauk ruak pandiak tabiak darah, bruk biak praong lac amaik ame njauk tui iek ka nyu cambaih lalaih nhiệt độ dahlau saong hadei di tuk brei ka anek menyum jru patrun pandiak. Bruk pandar jru patrun pandiak tui njauk panuac tacei pato di gru jru meda mek hu siam mekre saong pasang iek ruak hu siam jang. Ngan haong uranaih dahlau diah bhian njauk pandiak glaong atau cako ndaoh, ye bruk tui iek ini brei hu ngak ka nyu gam gam jang, kayua lac tuk uranaih njauk ruak pandiak ye mbuan ba tal cako ndaoh. Ruak pandiak tabiak darah jeng hu mboh biak dreih haong dom janih ruak pandiak karei./.

Urang lang: Jasi