Urak ini, lac tukvak salih bilan, bruk salih nhiệt độ, độ ẩm lac lagaih ka vi sinh vật cak rok patagok. Dalam nan, hu dom virus ngak brei ruak tangin, takai, cambuai, ngak brei aih craoh, kan suak yawa…Tuk  rup uranaih njom virus nyu lagaih ka dom vi khuẩn njom tame rup, ngak jeng ruak nhiễm trùng hadei di nan. Yau nan min, sa bruk njauk caik hatai nan lac tukvak ini, hadei di tuk njauk ruak Covid-19 ye rilo baoh sang takik caik hatai tal bruk pametai anek ruak, rao tangin, ngak brei hacih sa-at rup pabhap uranaih. Ini lac bruk ba tal uranaih njom ruak tagok glong. Kayua dalam tukvak pacang ruak Covid-19, sa binah lac uranaih  oh nao tal sang bac, sa binah karei lac bhap bini iek praong bruk khik hacih sa-at ka uranaih nan ye trun biak rilo ruak jalan tung pruac, virus…

Bác sĩ Trương Thị Hoài - Khoa Nhi Sang iek ruak 199 Đà Nẵng lac: “ Jalan pacang caga praong di dom ruak njom mbak oh hagait karei dut saong dom jalan pacang caga Covid-19 yau ye bhian rao tangin  meng ia jru sát khuẩn, cuk pataik pacang mbaok, rao tangin ala ia nduac hadei di tuk nao jaman, dahlau di tuk brei uranaih mbang huak. Ame maik jeng brei pabak prein pacang ruak ka anek tapa bruk brei anek ndih ginup, mbang huak ginup asar dinh dưỡng, pabak asar kẽm, vitamin C tui tacei pato di gru jru. Tuk uranaih ruak ye njauk brei uranaih daok karei atah dom uranaih karei dalam sang. Ngak brei hacih dom pandap panda, gai pan pabah mbang, rao hacih abih janih pandap uranaih bhian pan, pandap ma-in…

Langiu di bruk pacang caga ruak ye bruk taong njauk ruak, samar drah jeng hu makna biak praong. Abih di nyu lac ruak tangin takai cambuai. Ruak bhian mboh pandiak, pandik  tarakon, saluah dalam pabah saong kalik bhian pandung baoh ia dalam plak tangin, plak takai, akok ta-uk, tok.  Jaik abih dom urang ruak bhian hanjol. Yau nan min, hu dom urang ruak trak, ba tal ruak viêm glo akaok - màng não, ruak baoh hatai, barah phổi ba tal metai  nan ye brei samar thau, taong ruak sumu.

Dom bác sĩ kakei lac, meyah uranaih njauk ruak njom mbak, tuk mboh pandiak glong, glaok ta-ok oh mbang hagait hu, uraniah mboh glaih glar, klak mam, mbang menyum oh tame, ndih bet, kan medeih, kan suak yawa, patuk rilo, patuk hu la-bar, handoh rup, tagok baoh ia ala kalik…ye dom amaik ame  brei ba anek nao tal dom labik y tế. Urak ini daok lac bilan ruak tangin, takai, cambuai, yaom lac ruak bhian mboh di uranaih min ruak meda trak tuk tagok glo akok saong baoh hatai nan ye amaik ame brei caik hatai. Meyah mboh uranaih tatuak drei, huac 2 mbang dalam 30 minit atau uranaih nao mbleng mblang, mbuan labuh brei ba nao iek ruak chip. Ngan haong dom uranaih pandiak hu tagok baoh ia ye brei nao iek ruak piah bác sĩ pasang iek saong hu jalan taong ruak siam di abih ka anek./.

Urang lang: Ai Nghiêm – 02/06/2022