Barah lin tagei lac ruak bhian mboh min takik hu menuac caik hatai sangka. Makna ba tal ruak barah lin tagei meda parabha jeng 2 nyaom, lac: Makna abih rup saong pak di labik.

Praong di abih lac makna mai meng oh hacih sa-at tagei, cambuai. Tuk tagei cambuai oh hacih sa-at, tagei meda hu rilo tal gam tame. Tuk ini, vi khuẩn nyu tamuh tabiak khang ngak brei khut dom labik vil val lin tagei. Meng nan hu bruk barah lin tagei. Bruk barah lin tagei trak atau hanjul di yaok urang ruak lac kayua tal gam tame rilo atau takik. Meyah oh khik ka tagei cambuai hacih sa-at, oh mek “cao răng” lac biak mbuan ba tal barah lin tagei.

Dom makna abih rup bhian gaok ba tal barah lin tagei lac dom menuac trun prein pacang ruak yau ye urang ruak ung thư, ruak me-ik saradang. Tuk ini niêm mạc cambuai oh khang saong mbuan njauk barah lin tagei jang.

Piah pasiam ruak barah lin tagei: Tuk taong ruak barah lin tagei, urang ruak meda pandar jru taong ruak abih rup saong pak di labik. Taphia nan, pambuak haong pandar ia kalung pabah siam ka bruk viêm nhiễm di cambuai. Dalam dom mbang barah lin tagei chip meda pandar kháng sinh piah luk pak di labik nan.

Piah ka ruak barah lin tagei samar thit abih, urang ruak njauk khik ka tagei, cambuai hacih sa-at, pambuak haong pandar ia klung pabah yaok harei.

Piah pacang caga ruak barah lin tagei saong takik njauk ruak tamuh veik, mikva njauk carah tagei njauk jalan. Carah tagei tui jalan payeng vil val bàn chải pak di labik, caik bàn chải 45 độ saong ginup tukvak tui panuac kakei. Carah tagei takik di abih lac 3 mbang sa harei hadei di yaok var mbang piah plaih hu tal gam tame. Bruk ngak brei mbaok tagei hacih sa-at meda patrun hu vi khuẩn tamuh tabiak. Ini lac panuac kakei hu yaom biak praong kayua bruk hacih sa-at tagei cambuai lac bruk yaok harei njauk ngak min takik hu urang caik hatai sangka. Sa thun mek “cao răng” 1 atau 2 mbang, tui bruk tagei cambuai di yaok urang.

Ngan saong dom urang ruak pandar jru abih rup yau jru trầm cảm, jru pacang histamin jeng mbuan ngak brei thu cambuai, ba tal barah lin tagei. Tuk ini urang ruak njauk khan brei bác sĩ thau piah pambuak haong dom chuyên khoa dalam taong ruak.

Meyah oh taong ruak samar drah barah lin tagei meda ba tal dom ruak karei oh siam ka prein yava.

Barah lin tagei meyah oh hu taong ruak meda ngak brei áp xe lin tagei di labik, hu laneh. Meyah áp xe lavik harei oh hu taong ruak meda ngak brei bruk labik lin brah, laka.

Brah lin tagei lavik harei oh hu taong ruak, meda mbak tal talang tagei saong vil val talang. Bruk ini meda ngak brei lahik talang, glut lin. Hu dom urang khik tagei cambuai oh hacih ba tal glut lin, huan tagei, lavik harei ba tal lahik ổ tagei. Trak jang, tuk njauk lahik talang, glut lin meda ngak brei tagei nyu megei, oh daok khang atau lahik tagei./.