Tok taih tame dom akhar “detox” di mangaok google, meda hu yaok triệu kết quả dalam ka oh tal sa minit. Dalam nan, nyaom detox piah cuh lamek trun kilo meng en mbang, manyum ia kruac aik that, atau menyum ia tabau haong ia maraik yamen, cà phê, ia sara... taduan hu rilo panuac ndom biai nao mai di manuac sia.

Njauk caik hatai lac, hu dom thaot menuac biak tuk peih ngak detox taduan hu rilo bruk tui iek di rilo urang. Dom jalan detox ini hu pok mayaom lac daong tathuak tabiak dom janih ngak jhak ka rup pabhap, giải độc gan, daong pasiam dom ruak di talang, tathuak lamek di tian, tangin saong pha biak siam, gam tui di nan trun kilo jeng biak siam, meda pacang caga hu ruak ung thư.

Ndem njauk hatai di rilo urang, bruk jak gauk detox samar drah pambak tabiak ngak ka rilo menuac jia tame saong ngak tui, min siam lagaih di bruk ngak ini tal halei jeng ka oh thau cambaih.

Njauk duh hatai lac, bruk thải độc meng jalan tathuak đại tràng meng ia, cà phê atau meng janih ia krei... jeng daok hu dom urang pandar. Min, tui dom chuyên gia y tế, bruk tathuak đại tràng njauk kayua bác sĩ hu ilamo ngak tui panuac tacei di y khoa, kayua mayah eng drei ngak atau ngak biak rilo meda ngak ka đại tràng mbuan njauk kan kandah, mbuan nhiễm trùng biak glaong.

Langiu di nan, dom chuyên gia y tế jeng kakei lac, bruk pandar biak rilo jru xổ ngak jhak rilo ka prein yava. Langiu di bruk jak gauk detox meng dom jalan ngak nan, ye thải độc tapa bruk tok mayum ia atau ia baoh kayau, njam patam, atau bruk pandar thực phẩm chức năng daong detox jeng hu pandar biak rilo di urak ini.

Langiu di bruk pandar ia kruac aik saradang piah halang rup pabhap hu kakei lac oh siam tal jalan tung pruac, yau ye ngak harao tian, bruk chuyển hóa hấp thu meng pandap mbang tame meda njauk kan kandah, dom pandap labaih oh chuyển hóa hu meda jeng pandap jru mek saong rup pabhap meda ngak bruk rilo jang piah tathuak tabiak dom janih jru mek ini.

Tui PGS-TS-BS Nguyễn Thị Bay, Khoa Y học cổ truyền, Sang iek ruak Đại học Y Dược TPHCM, bhian di nyu rup pabhap giải độc tapa jalan ma-ik, thận halang tabiak tui jalan nao ruak tian, tagok ia hauk saong jalan suak yava. Nan lac dom jalan bo rup pabhap meda giải độc tabiak gah langiu saong dom chuyển hóa hu rah tabiak siam lagaih, njuan njac jang dalam dom bruk ngak; daong ka dom labik dalam rup pabhap, abih di nyu nan lac hệ thống miễn dịch, tagok prein pacang caga haong ruak kik, daong ka jalan tung pruac, gan mật, thận, suak yava, gilo akaok ngak bruk hu siam lagaih jang, oh lac gam gam ngak bruk piah pacang caga haong dom janih jru mek daok pataom di dalam rup pabhap. Bác sĩ Nguyễn Thị Bay ndom lac: “Jalan detox siam ka prein yava di abih lac mbang ndih daok dang biak siam piah daong ka rup pabhap khang kadang dalam dom bruk ngak”.

Tui dom chuyên gia y tế, halang rup pabhap oh lac jalan ngak piah trun kilo bo lac piah giải độc rup pabhap. Trun kilo njauk caik hatai tal bruk mbang huak, pasram pahat rup. Bhian pahat rup meda oh ngak taha nao, jang yau patakik dom ruak kik. Gam haong nan lac mbang huak siam lagaih, ndih ginup piah ka rup pabhap hu tani tanat, padeih padai, pasiam veik hadei di dom maong ngak bruk, bac taa glaih glar./.