Tui dom chuyên gia y tế, ruak pandiak tabiak darah bhian rahtabiak tapa 3 tukvak: tukvak pandiak, tukvak tabiak darah saong tukvak siam veik. Tuk njauk ruak pandiak tabiak darah, bruk pabak dinh dưỡng hu makna biak praong, daong paglaong prein yava, prein pacang caga ruak ka urang ruak. Urang ruak njauk mbang dom pandap lamar yau ye súp, bu. Mbang rilo dom pandap pabak janih đạm yau ye ralaow, baoh manuk, ada, ia tasau… Abih di nyu nan lac dalam tukvak siam veik, urang ruak njauk pabak dinh dưỡng piah jhul bruk thit ruak hu samar jang.

Tui TS. BS Nguyễn Thanh Danh, Viện Roh duah Dinh dưỡng TP. HCM, tukvak siam veik bhian di harei ka 7 tal harei ka 10 di ruak, bruk mbang huak di urang ruak njauk pabak parilo năng lượng saong đạm. Daok dom uranaih njauk ruak pandiak tabiak darah, ia tasau lac janih hu makna praong di abih. Njauk patui veik bruk brei ka ranaih maom amaik, parabha var mbang jeng rilo mbang saong ia manyum. Manyum rilo ia yau ye ia pandiak caik li-an, ia bai, ia njam tuk, ia baoh kayau iak mek ia...

Piah khik hu prein yava khang kadang, bruk pasiam veik dom tế bào lac hu makna biak praong. Protein brei ka rup pabhap ngak tabiak dom kháng thể bo dalam rup caong hu piah pacang veik bruk njom pambak ruak di virus saong anek ruak. Dom pandap panda hu rilo janih đạm yau ye ralaow thar, ralaow manuk ada, baoh manuk ada, ikan… meda daong ka urang ruak pandiak tabiak darah pabak hu prein yava, dinh dưỡng lahik dalam tuk njauk ruak.

Ia tasau, ia tasau matham lac pandap mbang biak siam njauk hu dalam dom pandap mbang di urang ruak pandiak tabiak darah kayua nyu hu rilo protein saong daong pabak dom janih dinh dưỡng njauk hu ka rup pabhap yau ye canxi, dom vitamin saong khoáng chất. Langiu di nan, ia tasau matham daok biak siam ka jalan tung pruac, daong khik caga jalan tiêu hóa, patagok bruk pabak tame dom janih dinh dưỡng, paglaong prein pacang caga ruak ka rup pabhap, jhul samar bruk pasiam veik prein yava hadei di tuk njauk ruak.

Súp njam patam baoh kraoh biak mbuan mbang saong hu rilo vitamin, khoáng chất, chất xơ, daong paglaong  bruk pacang caga ruak, daong ka jalan tung pruac, plaih di glaih glar hadei di tuk ruak blaoh. Urang ruak njauk pandar ia tuk talang, mek ia tuk manuk gam haong njam patam tui njauk bilan.

Pandap mbang hu rilo vitamin C yau ye baoh karuac, karuac aik, baoh uic …hu prein pacang oxy hóa khang, daong paglaong prein pacang caga ruak, ngak khang kadang rak darah, biak siam ka rup pabhap tuk siam veik ruak hadei di tuk njauk ruak pandiak tabiak darah.

Baoh dalim hu rilo janih sắt, vitamin C saong janih pacang oxy hóa, mbang atau manyum ia dalim iak nyu siam ka darah saong khik tani tanat tiểu cầu dalam darah yaok harei, lac bruk njauk ngak piah pasiam veik prein yava hadei di tuk njauk ruak pandiak tabiak darah.

Njam sabei hijao, tuk njauk ruak pandiak tabiak darah, urang ruak mbuan trun dom tiểu cầu. Njam sabei hijao lac janih njam siam abih hu rilo vitamin K daong pabak veik tiểu cầu dalam darah, tagok bruk tamuh tabiak tế bào dalam rup pabhap. Njam sabei hijao jeng hu biak rilo janih pacang oxy hóa saong khoáng chất siam ka prein yava pacang caga ruak kik. /.