Bruk jhik, pet bingu la angaok khan bai di urang Dao bhong hu dom urang kamei ngak biak tani tanat

Dalam hatai saneng di urang Dao palei Bản Lục, anek kamei tuk hu manek tabiak yau dom baoh bingu di puk palei, dom paduhri di ceik glai. Sang halei hu anek kamei jeng hu dom amuk, dom amaik pet brei dom baoh ndon, yaok blah khan, ao … mekre di abih piah cuk.

Dom urang kamei umo 9, 10 thun hu dom amuk, dom amaik pato jik pet. Tuk bak dara, umo 18 - 20  thun, jeng lac tuk urang kamei nan thau jik ka drei dom blah khan ao meng kan.

Khan ao meng kan di urang kamei Dao bhong hu suek kak akaok, ao, khan, talei ka-ing saong pandap cuk meng pariak. Meng duah palak tangin gheih, akaok saneng hadah krah, urang kamei bangsa Dao bhong hu pet tagok blah khan ao dom bingu la meng talei marai rilo sambo màu, ngak ka khan ao hu dom bingu hala hadah tanjak, mekre meta.

Sambo màu jeng lac sa dalam dom kadha njauk ndom tal angaok blah khan ao di urang kamei Dao bhong. Meng dom sambo màu bhong, hijao, patih mbong, kanjik katam, jhuk... dalam nan, samboh màu bhong hu pandar rilo di abih. Meng 9 baoh bingu bhong, biak prong meng bara ao trun tal talei ka-ing ngak brei blah ao hadah tanjak. Dom urang kamei pak ini ndom lac, sambo màu bhong nyu pachreih urang caik meta maong tame, abih di nyu lac dom urang likei umo jaik khin kamei. Urang mong tame khan ao di urang kamei ye thau hu bruk gheih tangin, tari taring di urang kamei nan.

Piah khik ramik bruk siam gheih dalam khan ao di bangsa drei, hadei di dom tukvak ngak bruk langiu hamu apuh, dom urang yau adei Bàn Thị Phương, Phùng Thị Choáng, Bàn Thị Hiền hu klah rabha brei ka gauk dom ilamu, paglaong tangin jhik pet, menyim ngak jih dalah meng kan.

Adei Phùng Thị Choáng khan lac: "Dalam palei, khaol adei hu mbaok tame kapul daoh tamia. Yaok tuk nao daoh tamia, dom urang dalam kapul palih ruah ka drei blah khan ao meng kan siam gheih di abih saong ma-in dom kadha daoh tamia di bangsa drei piah meyaih khan tal manuac sia. Khaol adei biak hadah mbaok, abih di nyu lac tuk bingu la angaok khan ao meng kan di urang Dao bhong hu brei angan lac inem krung ilamo phi vật thể pakat negar"./.

Urang lang: Jasi – 20/10