Thun ini umo 67 thun, ong Lò Văn Thoong lac rai ka 5 di urang hu buh pren yava padang jeng bản Mường Và urak ini. Sang ong daok khik hu ralo janih pandap meng ong kaok ong kei caik veik, yau cồng, chiêng, tượng Phật, kiếm saong ao di urang dak padang bản mường. Dalam yaok mbang lễ tết, abih di nyu nan lac tuk xên bản xên mường, dom pandap nan hu ba tabiak ngak lễ saong hu abih menuac dalam bản iek praong.

          Ong jeng lac menuac thau ralo ilamu di urang Lào như: Tamia Quan Tang, tamia Lăm Vông, daoh Đối, tamia Xòe.v.v. Ragu tamia Quan Tang bhian hu ba tabiak piah salam uan dom lễ hội xên mường, tết Khẩu Hó saong tết Nguyên đán. Tuk salah bruk ngak nong, menuac sioa dalam palei hu lahaiy, ong bhian tacei pato veik ka anek kamuan, adei sa-ai kumei dalam bản. Sa-ai Lò Thị Tuyết lac: "Harei lễ, harei hội ye dom adei sa-ai kumei saong urang tahat mai sang ong tamia. Tamia di sang ong Chẩu sửa ye ong pato veik ka anek kamuan tamia tui, ngak tui".

Sa dalam dom ilamu praong di urang Lào daok di Mường Và lac lễ hội xên mường. Lễ hội ini bhian hu ngak di kreh bilan 2 saka ia bulan yaok thun, brei mboh veik dom adat cambat, dom ilamu di bangsa Lào.

          Dalam saman mesruh metak, lễ hội xên mường oh ngak hu yaok thun. Mbiah tal thun 1998, hadei di tuk ong Lò Văn Thoong padeih công tác, mai daok veik dalam bản, ong meng ginum biai haong dom urang taha praong thun dalam bản brei padang ngak veik lễ hội piah hadar tal dom urang hu buh pren ngak jeng bản mường. Meng nan tal urak ini, lễ hội hu peih ngak yaok thun. Dom bruk ilamu, daoh tamia, dom kadha me-in meng kan jeng hu padang veik.

          Ong Lò Văn Thoong brei thau: "Gheih abih di bangsa Lào daok di bản Mường Và lac lễ hội xên mường. Bangsa Lào pak halei jeng hu, min di bản Mường Và ini peih ngak karei. Kayua ka sa lac, di bản Mường Và ini hu baoh tháp; ka dua lac hu baha, hu tượng Phật".

Bruk dak padang saong patagok bản Mường Và kak kajap haong tháp Mường Và. Tháp hu ramik pasiam veik 2 mbang, jeng daok khik hu kiến trúc klak ngan saong bingu la ndung bak kiến trúc di urang Lào. Urak ini, lac Chẩu sửa – nan lac menuac dang akaok lễ hội di but pajaih, ong Lò Văn Thoong saong bhap bini daok pak ini tuk halei jeng iek praong bruk khik ramik tháp, tượng Phật. Ong Lò Văn Bóng brei thau: "Kayua drei lac Chẩu sửa, makna lac gru ieu yang, nan ye ong dalam ndom puac, dalam bruk ngak ong njauk pilih ruah, oh lac ngak habar jeng hu. Ong brei khik tháp ini njauk adat cambat, tanarakun. Ong ngak yau nan piah khik ka bản mường diukrai hu tani tanat, siam mekre, salamat"./.