Saai Đào Minh Hiền khan lac, sang saai hu labaih 3 hécta taneh, pala ralo janih yau ye: amraik kalu, panat, kandiuk siem, durian... Saai pala ralo janih brei ganap jien tame mai meng ngak nong oh karo janih pablei tabiak yau jaman ini. Dalam, amriak kalu ieu lac sa janih phun pala asal gait pala meng lavik thun mai.

Tuk bein amraik kalu hu brei asar jeng njauk tuk yaom amraik kalu trun biar, min tapi saai oh kok klak phun. Phun amraik kalu oh mbuan ieik glang. Nyu ruak mbuan si matai drah matai samar oh mbuan padam ruak. Gam haong bruk bac magru ieik glang phun amraik kalu gait daok buh prein yawa, buh jien pala pabuh tambah phun jaik si matai.

Kayua amraik kalu pala ralo dalam bein yau nan ye tuk yaom kom nyu trun, jien mek tame kurang biak ralo. Thau raong pabaiy dalam bein daong patagok jien mek tame, saai blei papaiy pajaih brei pamanek wan jeng ralo labaih 60 drei/sa mbang laih yau ye ini.

Tui saai Hiền, dalam bein hu hala di dom gok kayau ngak gang ka amraik kalu so tagok brei ka pabaiy mbang. Sang bein buh prein hasit piah paik hala brei ka nyu mbang oh bih jien. Buh jien tame raong pabaiy oh bih ralo, sang bein jeng hu kayau glai, phun kreim piah ngak wan. Anek raong ini oh ralo tamuh ruak jit yanan ye oh jamao gauk dalam raong glang.

Saai Hiền lac, meng tuk gam pala amraik kalu gam raong pabaiy, sang bein hu khak piah pal phun. Saai chrau khak pabaiy haong bau, pabam haong kam labaih kurang sa bilan ka jeng khak ba nao pala ka phun dalam bein. Nyu daong brei kurang jien buh tame ka oh bih ralo jien blei khak ka pala phun. Min siam lagaih di nyu kayua lac pandar khak hữu cơ, siam ka ndap ngak tabiak hu ralo urang darak pasar takre blei. Langiu di nan, pandar khak hữu cơ, jeng hu siam ka phun pala, thun di phun kayau jeng glaong, baoh karaoh di nyu jeng hu siam.

Langiu di nan, daok hu ralo janih cara ngak brei ka siam makre karo oh bih jien ralo. Saai daok pala phun xoan piah ngak gang ka amraik kalu, hala di nyu brei raong pabaiy. Dut haong gang meng bê tông, pala phun hu halui bilan pandiak thu, tuk phun amraik kalu daok sit, hala di nyu cang pahalui ngak ka laan taneh bein. Bilan ribuk, saai drah laneng hala, mada koh hujung piah ka phun oh jaleih jeng ye brei ka phun laneng lanoi piah uak rup chrao tagok siam.

Tui saai Hiền, hu paralo phun pala gam haong raong glang, gait hu jien tame mai meng ngak mbang raong glang dalam thun. Yaok mbang paik asar amraik kalu, gait oh pablei chip bo cang mbiah puac bilan meng pablei hu yaom glaong jang. Meng akaok thun tal ini, mada hu tuk yaom amraik kalu tagok jaik 200 rbau đồng/kg.

Urak ini yaom pabaiy tal wan hu meng 110-120 ngàn đồng/kg, glaong jang 2 mbang dut tui yaom yau masa tuk wak thun blaoh. Yaom ini ieu lac siam glaong di abih. Gam haong yau ini, urang raong glang biak sanang hatai patagok paralo anek raong di drei./.