Ba kol dahlak hulin nao ravang bein dâu tằm praong 1 ha, sa-ai Nguyễn Thị Hồng Mơ (umo 37 thun, daok di ấp 3, xã Thạnh Hòa, huyện Phụng Hiệp) brei thau, meng janih phun ini bo raidiuk sa-ai hu hadah hadai jang. Hadar veik thun 2020, bala laik trun, abih 2 urang anek di sa-ai jeng njauk ruak ung thư ngak ka sang sa-ai laik tame kan kandah. Karja xã brei harak sang kathaot saong diuk pasang sa-ai nao mesraiy labaih 1 tỉ đồng piah taong ruak ka anek.

Min tal thun 2022, sa-ai Mơ bayar veik harak sang kathaot tuk sraiy bayar hu labaih meteh, abih di nyu lac hu jien mek tame rilo meng phun dâu tằm. Sa-ai Mơ chreih chrai lac: "Dahlau daih, dahlak pala pa-ok Đài Loan, dom thun camereip jien mek tame hu 100 triệu sa thun, min hadei di nan dak harei dak laik yaom, gaok tuk mai oh hu thei blei. Urak ini, pala dâu tằm, mboh lac mbuan lagaih jang, jien mek tame 1 vụ hu rilo jang 1 thun pablei pa-ok".

Tukvak sa-ai Mơ pala dâu tằm, dalam xã Thạnh Hòa oh ka hu urang halei pala, nan ye sa-ai jeng huac, tok blei 5 phun pajaih meng Đà Lạt mai pala iek. Gam haong pala dâu, sa-ai daok hu palao 5.000 drei ikan tai tượng trun danao piah ka ikan mbang hala. Nan ye, tuk mbang dâu tằm camereip bak baoh, sa-ai saong mikva jaik taphia thei jeng tatuak drei.

Amuk Đoàn Thị Thu Ba, urang paik baoh dâu tằm mbang pah ka sa-ai Mơ khan lac: "sahneng lac baoh dâu tằm oh tamuh hu min nyu lagaih haong langik tasik, taneh riya labik ini. Paik mboh hawa, phun bak baoh, baoh halei jeng catang, jangaih, maong biak mekre mata. Meng bruk ini bo urang di palei yau dahlak hu bruk ngak, hu jien mek tame 200.000 đồng sa harei".

Hadei di rilo mbang mek hu siam mekre, kein laba, sa-ai Mơ blei veik dom pluh phun pajaih mai raong pala blaoh cakak dhar ngak jeng phun anek pambak praong bruk ngak. Urak ini, labik bein di sa-ai hu labaih 700 got dâu tằm, anak tal meda peih praong jang.

Phun dâu tằm lac janih rup kayau, 6 bilan nyu tabiak baoh, dak praong dak hu rilo baoh jang. Phun meda brei baoh luac thun, yaok vụ dalam 1 bilan meteh. Min miền Tây hu langik pandiak thu, tapa rilo mbang ngak iek, sa-ai Mơ mboh lac tok caik veik baoh 2 bilan hu năng suất glaong abih, lac meng bilan 10 saka ia bulan tal jaik tết saong hadei tết (suan bilan), tukvak daok veik ye raong pala pasiam phun.

Sa-ai Mơ brei thau: "Dâu tằm pablei biak nduac, urang di Cần Thơ, Sóc Trăng, Kiên Giang, Cà Mau jeng kakei blei. Urak ini yaom sỉ 50.000 đồng/kg, pablei lẻ 70.000 đồng - 80.000 đồng tui tukvak. Kuhria rah tapa yaok vụ, dahlak mek hu labaih 2 tấn meteh sa ha, kaoh abih phun jien buh tame ngak, daok laba hu 100 triệu đồng sa vụ, nan lac labaih 200 triệu đồng sa thun”.

Tui sa-ai Mơ, pala dâu tằm abih takik prein iek glang. Sa mùa vụ hu peih tabiak meng bruk laik hala, pruh ia, buh khak hữu cơ pachreih phun praong, ngak hareik. Ruak njauk caik hatai lac “rệp sáp”. Hu jalan ngak lagaih ye phun brei baoh samu gauk, meng sambo bhong meriah tapa bhong jhuk lac paik hu. Urak ini, sa-ai Mơ pambuak bruk raong takuh hamster haong raong ikan tai tượng. Ikan mbang pandap labaih meng takuh, mùn cưa raong takuh ye pandih ngak khak hữu cơ buh ka phun, daok phun ye tamuh hala ka ikan mbang. Tui nan, oh klaak saoh pandap mbang halei.

Ong Ngô Phước Lành, Bí thư Chi bộ ấp 3 ndom lac, bruk pala dâu tằm di sa-ai Mơ lac bruk biak bahrau di palei, ba mai kein laba glaong. Bruk njauk caik hatai di abih lac tame mbang laik hala atau paik baoh, sa-ai hu ba bruk ngak brei ka 8 tal 10 urang ngak. Karja jeng daok jak ba sa-ai pabam pajaih phun ngak bhum nguyên liệu brei ka mikva hu hatai caong ba gauk salih janih phun pala./.