Bein njam di sang amuk Phạm Thị Loan praong jaik 3.500 m² di ban sit Thanh Bình hu pala dalam sang halam nyuel kandauk siam hijao. Dahlau daih, sang amuk Loan bhian pandar khak jru vo co saong jru hóa học pacang caga khik njam katam oh njauk ilamo ky thuat, yau nan ye pandap nda njam katam di gait oh ba mai siam lagaih brei ka bruk ngak mbang patagok kinh te. Hadei di tuk hu Pasak Yitvu Ngak nong huyen Bù Đốp ruah ngak bruk pala njam huu co karo tani tanat, baoh sang amuk Loan meng hu mboh siam lagaih daong paglaong prein yava urang pala saong urang blei pandar. Langiu di nan daok ieu lac, bein njam brei siam tani tanat saong jien mek tame yaok bilan labaih 15 trieu dong.

Tui amuk Loan, piah ngak tabiak njam tui jalan huu co, bruk ngak haluk taneh njauk caik hatai. Taneh brei hu drak cun, drak dom janih khak limo, khak menuk hu pagam pagam haong langyah bamao vi sinh Trichoderma, pagam haong pruh dinh duong pabak ka njam. Dalam bruk pala, meyah hu halak mbang ye brei ngak pahacih bein phun, patom dom phun, hala bluk tame sa labik piah palahik bruk njom mbak ruak. Langiu di nan, baoh sang daok pala dom janih njam karei piah patakik khat khut ka mbang pala njam hadei di nan. Dom thun tapa, meng tuk pala njam huu co, njam patam di sang amuk Loan hu urang blei pandar dalam bhum palei. Jaik abih dom mbang pala njam tal tukvak yuak paik jeng hu pablei abih. Yaom kaom jeng hu glaong jang njam karei, min tapi njam di baoh sang amuk Loan hu tuai blei pandar biak takre.

Daok bein njam di sang ong Lại Văn Bảy di xa Thanh Hoà jeng pala tui khak huu co jien mek tame jaik 30 trieu dong/bilan. Bein njam mbang hala labaih 4.000 m2 rilo meng lac pala dom janih yau: cải hijao, cải yamein, xà lách, njam mlang..., hu pala bak dalam sang tak halam nyuel.

Ong Bảy brei thau: Dahlau daih, baoh sang ong diuk pambak tame phun amraik kalu. Min tapi, amraik kalu oh ba mai siam lagaih ka jien mek tame sang ong. Thun 2010, tuk hu maong iek rilo bruk pala njam, ong salih tapa bruk pala tablak muluk njam huu co. Hadei tuk duah thau ka ilamo ngak sang halam nyuel, pala, sangka saong yuak paik dom janih njam mbang hala, baoh sang ong buh jien tame padang sang nyuel ngak bruk pala njam huu co karo jang.

Tui ong Lại Văn Bảy, bruk pala njam dalam sang halam nyuel hu pacang oh brei ka anek dien anek ruak tame mebaoh, daong ka patakik hu bruk halak haling mbang njam dalam yaok mbang pala. Pala dalam sang nyuel halam tui jalan huu co mboh gheih ghang, buh takik prein sangka, njam patam mek hu ralo jang dut haong dom njam oh pala tui bruk ngak. Ngan haong bruk pala njam huu co karo dalam sang halam nyuel, kuhria rah dalam 3 thun blaoh, baoh sang ong mek hu jien laba labaih 150 – 180 trieu dong/thun.

Ngan haong bruk pala tui jalan huu co karo kajap, ba mai gah pabak njam hacih sa-at ka urang blei pandar saong hu jien mek tame tani tanat brei ka rahra, rilo baoh sang urang ngak nong di tapen negar huyen Bù Đốp dak harei dak mboh ralo tapa pala njam dalam sang halam nyuel.

Thạc sĩ Nguyễn Hữu Đức, Pasak Yitvu Ngak nong huyen Bù Đốp brei thau: Tanut praong abih akaok meti piah pala njam karo brei caik hatai tal dom asal kadha taneh saong ia. Langiu di nan, urang pala oh hu brei pandar jru barau halei, oh pandar khak jru hóa học, jru pacang khik njam meng hoá học, abih tih mai meng huu co hu yau ye tapa langyah. Daok jru pamatai halak haling jeng brei ngak meng huu co. Kayua bruk pala, sangka tani tanat yau nan phun njam hu siam, hu urang blei pandar takre. Urak ini, Pasak Yitvu Ngak nong daok peih praong bruk ini haong hatai caong dalam tukvak masa meng anak brei hu rilo baoh sang salih tapa pala njam tui jalan huu co piah khik kajap prein yava ka manuac urang ngak saong urang blei pandar./.