Urang hu adat brei tame negar Viet Nam ngak bruk katut panak harei, dalam nan hu: urang tame piah pambuak bruk, ngak bruk karja; urang tame negar oh lac piah pambuak bruk, ngak bruk  karja,  yau urang buh jien tame ngak mbang, urang ilamu, urang ngak hu ilamu glong, urang khik iek D.N, pablei salih, duah thau darak pasar gam saong gauk gar haong dom urang tui thỏa thuận saong yaok negar; dom urang hu taom gaok haong urang tame negar katut panak harei dalam tuk ngak bruk di Viet Nam.

Tui nan, urang tame negar oh brei daok karei tui iek y tế, min brei ngak tui catang saong ginup dom bruk ba tabiak ka pacang caga jit Covid-19, oh taom gaok urang gah langiu. Đơn vị, tỉnh, ban, puk palei brei khik salamat ka urang tame negar saong dom urang hu taom gaok, oh caik ka ruak njom mbak meng urang ini tapa urang diah dalam tuk ngak bruk saong oh njaom mbak tabiak bhap bini. Meyah urang tame negar kuhria ngak bruk di rilo palei, ye njauk hu karja palei brei adat.

Gam haong nan, urang tame negar katut panak harei saong urang taom gaok haong urang tame negar brei ngak ginup 5 paka di Mintri Y tế, eng drei tui iek prein yawa. Meyah mboh patuk, pandiak, pandik tarakong atau kan suak yawa ye khan brei jabat khik iek saong y tế palei thau.

Mentri Y tế jeng kakei lac, urang tame negar katut panak brei hu Bảo hiểm y tế  dunya atau jabat, kapol nyaom da-a brei sanya bayar jien taong ruak meyah hu njom ruak Covid-19. Meyah tamat tukvak ngak bruk blaoh, min urang negar langiu khin daok veik Viet Nam, ye brei ngak tui dom bruk ba tabiak ka bruk tame, tabiak negar saong bruk pacang caga jit ruak.

Ngan saong urang hu klauk ginup vaccine atau abih ruak Covid-19: Tamat tukvak ngak bruk dahlau 3 harei kuhria meng harei tame negar, ye brei eng drei tui iek prein  yawa di labik daok mbiah tal harei ka 3, oh brei tabiak truh labik daok.

Langiu di nan, urang tame negar brei dut iek vi rút SARS-CoV-2 meng RT-PCR di harei ka 3 kuhria meng harei tame negar. Meyah dut iek mboh am tinh ye brei tui iek prein yawa tal abih 14 harei. Meyah urang tamat tukvak ngak bruk  hadei di 3 harei saong dut iek mboh RT-PCR am tinh di harei ka 3 ye urang daok negar langiu mai brei tui iek prein yawa tal abih 14 harei, ngak tui 5 paka di Mintri Y tế. Meyah mboh patuk, pandiak, kan suak yawa, pandik tarakong brei khan ka y te pak nan thau.

Ngan saong urang negar langiu oh ka klauk jru atau klauk oh ginup: Tamat tukvak ngak bruk dahlau 7 harei kuhria meng harei tame negar njauk brei daok karei di labik daok tal abih harei ka 7. Dut iek vi rút SARS-CoV-2 meng RT-PCR di harei ka 3 saong harei ka 7 kuhria meng tuk tame negar. Meyah dut iek mboh âm tính brei patui iek prein yawa tal abih 14 harei./.

Urang lang: Ai Nghiem - 4/1/2022