Ong Đoàn Văn Khanh, umo 70 thun, 50 thun tame Ndang, di xa Song Thuận, huyen Châu Thành, tinh Tien Giang, yaom sa urang hu thun umo glaong, prein yava jeng oh daok khang kadang min jeng daok ngak yam ndok kong ti TNHH Long Thuận – doanh nghiep ngak baoh kruac bung saong dom pandap panda meng kruac bung, baoh li-u sap ngak tabiak jeng pandap mbang, pandap jru hu kein lagaih ka raidiuk. Langiu di bruk ngak gru jru, ong Đoàn Văn Khanh daok iek arak, kuac jru gha hareik daong rahra. Meng dom bruk rik daong di drei, ong Khanh taduan hu harak pok meyaom di Thu tuong Rajaei, di Kapul urang ngak nong saong lac sa urang ngak nong camereip dalam taneh ia hadah mbaok hu sang bac Đại học Florida (Mỹ) pabak harak brei angan Tiến sĩ hadah mbaok mata ka gah jru meng kal, Ong Đoàn Văn Khanh brei thau:

“Urak in drei ngak tabiak rilo pandap siam, tani tanat prein yava, oh ngak kanjak jhak tal alam langik tasik. Drei jeng lac sa urang ngak nong, ye dom phun mbang baoh dalam bein yau kruac bung saong dom janih baoh kayau karei ba tame ngak tabiak pandap panda siam, siam ka prein yava; ka dua lac drei jeng sa urang gru jru nan bruk sangka ieik glang prein yava ka rahra lac sa bruk caik dahlau. Tukvak masa anak tal jeng patui veik ngak siam pandap panda piah tuk hu darak pasar brei pablei ye drei hu pandap panda piah pablei dalam saong langiu taneh ia.”

Ong Lê Văn Thủy (umo 65 thun) – sa urang ndang praong thun daok di xa Mỹ Tịnh An, huyen Chợ Gạo, tinh Tien Giang urak ini ngak po bein pala phun thanh long haong taneh pala praong 1,8 ha. Meng thun 2012, hu bruk tacei ba di gah ngak nong, ong Thủy pala thanh long tui tanut chuan Viet GAP blaoh tal Global GAP. Kayua tari taring, kham merat saong thau pandar ba ilamo tame bruk pala phun nan ye bein thanh long di sang ong tuk halei jeng paik hu rilo baoh thanh long saong baoh thanh long siam bingi. Kuhria yaok thun paik hu meng 50-60 tấn baoh.

 Oh lac ngak mbang naih joi bo ong Lê Văn Thủy daok ngak Akaok Kapul Urang ngak nong palei Mỹ Khương, xa Mỹ Tịnh An, biak abih tung abih tian haong dom danak dak, bruk ngak pahla dalam bhum palei yau ye daong urang kathaot rambah, padang ngak tatua saong jalan mbak nao mai. Ong Nguyễn Văn Năm, Bi thu Ndang uy xa Mỹ Tịnh An ndom lac:

 “Ong Lê Văn Thủy lac urang ngak nong naih joi, ngak dom bruk pala phun thanh long VietGap hu siam lagaih biak glaong. Mikva urak ini jeng taong yaom biak glaong ka ong Thủy, ini lac sa urang hu angan jie kreih camin. Ong biak kham merat patagok dalam ngak mbang jeng yau bruk ngak hu Chi bo, mikva taong yaom saong anit ranam. Bruk ngak di ong Thuy lac bruk kreih camin bo mikva mai bac megru , dom urang di bhum palei karei jeng mai tal rivang ieik saong bac hu biak rilo”.

Daok di tinh Ben tre, urak ini hu labaih 13.000 urang praong thun umo hu mbaok tame politit, dom kapul dalam labik daok; dalam nan hu jaik 70% lac urang ndang praong thun. Dom urang ndang praong thun umo hu paglaong hatai ba akaok nao dahlau, dalam yaok danak dak bruk ngak cách mạng di bhum palei lac kreih camin hadah piah rahra ngak tui.

   Daok biak rilo, biak rilo urang ndang “praong thun hu angan jie” di Bhum taneran kraong Cuu Long jeng biak chreih chrai dalam bruk ngak mbang saong bruk xa hoi, tuk halei jeng brei mboh bruk “thun umo praong – angan jia hadah” gam rik daong padang palei pala, taneh ia gam ngak kreih camin ka rai hadei ngak tui. Dom urang ndang tuk halei jeng brei mboh bruk siam di drei, jaik taphia, pato tacei jalan, ngak kreih camin ka rai hadei ngak tui piah patui veik ngak bruk padang palei pala, taneh ia dak harei dak siam makre, hadah hadai jang, ginup meda, kajap takai khang yam tame jaman pok drei patagok di bangsa./.