Nao rivang bruk ngak mbang pala phun timun dalam sang majam carmin di diu pasang saai Huỳnh Việt Trung haong saai Phạm Thúy Liễu di palai Long Hòa, xa Tân Long, ban Ngã Năm oh pacang hu rup catuak drei. Di bhum taneh kaluk njom ia khun di xa Tân Long, dalau diah ngak nông daok ralo kan, min dua diuk pasang saai Trung, haong saai Liễu ba hatai pandar jalan ngak nông meng ilamu glaong piah patagok glaong yaom kinh te. Khan brei thau bruk pala timun dalam sang kreih carmin di sang drei, saai Huỳnh Việt Trung lac:

"Bruk ini drei ngak tui jalan ngak nong harum pataom mek panak patut raong masa atah. Camareip di nyu Jabat Kinh te ha tang kakai ban Ngã Năm pato jao ilamu ky thuat pala 500m2 sang majam halam luoi. Tuk ngak mboh jeng drei brei papraong taneh pala. Piah hu timun pablei jao dalam thun ye drei pala tui jalan paying vil."

Meng ngak ieik 500m2 pala dalam sang kreih carmin, tal ini, saai Trung ba hatai peih praong sang kreih carmin pala labaih 5000 m2. Tui saai Trung, piah mek hu baoh luac thun brei ka darak pasar, gait pala tui jalan paying vil, parabha ralo mbang pala, yaok mbang atah di gauk meng 10-15 harei. Tui di nan, yaok thun saai pala labaih 36.000 talei, mek hu labaih 70 tan sa baoh sa thun, urang mai tal labik blei hu yaom 35.000 dong/kg, yaok thun duah hu glaong labaih 240 trieu dong. Muk Đinh Thị Hằng, akaok Kapul urang ngak nông xa Tân Long, ban Ngã Năm lac:

"Bruk pala timun dalam sang kreih carmin di sang saai Trung meng 4-5 thun ini mai mboh biak jeng. Saai Trung pala gam gam, baoh timun mbang biak bingi, bam ai sanang hatai urang mbang, kayua di nini pala di dalam sang kreih carmin meng khak phun hala oh buh khak jru hoa hoc."

Thau mbiah lac, xa Tân Long, ban Ngã Năm ieu lac bhum taneh kaluk, njom ia mbak ia khun yau nan ye ngak padai oh hu yaom glaong. Diuk pasang saai Trung dak harei dak brei salih tapa pal drak janih hu yaom jang.

Urak ini sang saai Trung daok cakrok bruk pala di angaok taneh 10 ha. Dalam nan, langiu di 5 công taneh pala timun luoi, saai daok pala 18 công la-u gam haong ralo janih phun hu yaom glaong karei yau ye baoh uac, durian, pa-aok... Dalam nan hu baoh uac Ruby daok brei baoh pablei hu jien, mada hu makheik. Piah khik siam ndap nda pablei tabiak, saai Trung haong saai Liễu pilih khak hữu cơ pandar piah hu yaom brei ka ndap nda baoh karaoh di drei. Piah tukik jien buh tame ngak, saai Trung kham bac magru ngak khak huu co pien buh ka phun mbang baoh.

Ieu lac sa urang nong daok dam daok anaih, jak jeng haong thau ba abih hatai ngak mbang saai Trung tuk halei jeng parabha ilamu bruk ngak di drei brei ka mikwa urang caik hatai ngak mbang meng khah huu co, brei karo yaom baoh karaoh drei ngak tabiak./.