Dalam jaik 10 thun tapa, Dong Thap lac sa labik dalam dom bhum palei nao dahlau di bhum Taneran kraong Cuu Long dalam brei dak gilac gah ngak nong. Patui di nan, mek hu rilo jak jeng dalam bruk roh duah, pandar cong nghe sinh hoc tame bruk ngak. Bruk pandar cong nghe sinh hoc tame dalam bruk ngak nong daong brei pasiam phun pala, anek pajaih, salih bahrau cong nghe raong, pasang iek siam lagaih ruak di tapol anek athur raong; bruk pilih ruah saong parilo pajaih dom pajaih phun pala bahrau mek hu siam lagaih, duh rilo ka bruk ngak Sarak brei dak gilac gah ngak nong.

"Sa-ai kamei Nguyễn Phượng Hằng daok di xa Long Hưng B, huyen Lấp Vò ieu lac sa urang yau baoh kreih camin hadah jak jeng dalam bruk pabam raong mô. Bruk ini daong sa-ai Hằng mek hu jaik 200 trieu dong yaok thun. Tui sa-ai Hằng, langiu di dom bruk langik tasik, ia taneh, ky thuat raong phun…ye phun pajaih siam ba tui pandap panda ngak nong siam".

Ngan haong phun pala di langiu langik, tapa bruk parilo pajaih rilo mbang ye meda kurang, lahik bruk meng camereip di nyu. Atau tapa brei pablak gauk raong, caik, thụ phấn ye bruk camereip di nyu jeng lahik rah. Drei pambak tame bruk raong tam mô phục tráng veik bruk siam di phun; ngak ka phun anek abih ruak, khang kadang. Tuk nan, phun hu ginup prein pacang caga di langiu langik; gam haong nan patagok samar drah meng hu dom bruk pacang caga.

Di bhum taneran kraong Cuu Long, bruk ngak bahrau pajaih phun pala tapa cong nghe sinh hoc hu brei tabiak rilo pajaih phun hu patagok haong prein pacang caga halak halin siam jang, daong brei paalo baoh karaoh paglaong nang suat saong asar padai brah siam.

Di dalam nagar drei, hadei di phun padai, phun tangei jeng hu yaom glaong dalam bruk pala drak. Bilan 4 thun 2015, pajaih tangei salih yen mbang camereip hu ba mai tal tangin mikva urang ngak nong, cih nem thun akaok meti pala pajaih phun tangei ini, hadei di tuk Mentri Ngak nong saong Patagok Palei pala brei pajaih phun tangei salih gene mbang akaok meti di Viet Nam. Jak jeng hadei 10 thun pala tangei salih gene brei mboh bruk saong prein daong ba di cong nghe sinh hoc dalam bruk ngak mbang pala drak.

Di bruk roh duah di drei, PGS-TS Nguyễn Hữu Ninh, Phaok Vụ trưởng Vụ Khoa học Công nghệ saong Môi trường (Mentri Ngak nong saong Patagok Palei pala) hu ndom khang tal bruk patagok samar drah di cong nghe sinh hoc dalam dunya hu meng rilo makna yau urang menuac tagok rilo, hatai caong an ninh salamat pandap mbang brei khik kajap, langik salih, gaok bala saong jit ruak. Yau nan, asal kadha ba tabiak ka bruk ngak nong dalam jaman bahrau brei pandar cong nghe ngak tabiak dom pajaih bahrau piah ngak tabiak pandap panda ba mai siam lagaih jang ka rahra, ngak njauk hatai caong ka salamat karo pandap mbang.

"Akaok meti asal kadha hukum brei hu tantu cambaih laic. Brei hu adat cambat gah krieng piah brei kein lagaih ka kapul urang ngak mbang hu mbaok tame dom bruk ngak patagok pandap panda cong nghe sinh hoc. Gah urang menuac ngak jeng brei hu Pato pakai piah samu haong dom negar dalam dunya. Ka bruk katut harei, brei hu dom kadung jien daong dom urang ngak khoa hoc dalam bruk pambuak roh duah, abih di nyu nan lac pambuak haong dunya piah hu mbuan pandar dom cong nghe, ky thuat bahrau".

Dang di anak bruk oh kao di dalam langik tasik saong haong jit ruak tamuh, tui rilo urang chuyen gia, bruk salah blaoh jih krieng harak gal adat hukum piah pabak khau tin, yaih khăn dom pajaih bahrau, phun pala bahrau ngak tui cong nghe sinh hoc lac biak caong hu piah khik kajap salamat pandap mbang saong patagok bruk ngak nong khang kajap. Dalam nan, bruk tacei ba di Karja lac biak hu makna piah dom Mentri, dom gah, bhum palei, urang ngak nong hu pandar cong nghe sinh hoc samar drah di abih, caik hatai eik caga siam jang saong pacaga jit ruak tamuh bahrau./.