Thun 2006, ngan haong 10 ha kruac bung kanduh hijao, kruac bung saradang kanyik katam, sa-ai Lê Minh Sang peih mbang ngui di bhum palei. 7 thun hadei, sa-ai kham merat ba kruac bung tame dom sieu thi di bhum Đông Nam bộ. Thun 2015 sa-ai Sang gam haong dom urang ngak nong taphia peih ngak kapul pambuak gauk camereip di bhum palei haong 7 urang dalam kapul.

Meng nan tal ini, Hop tac xa Tân Mỹ hu karja daong meng harak pháp lý tal jalan ngak, urak ini dom urang hu tagok tal 22 urang dalam xa. Hop tac xa hu abih tih labaih 62 ha taneh, hu kruac bung, kruac, uas, medar, quyt, sapo…jien laba kuhria rah tâp 20 ty dong sa thun.

Oh lac ngak bruk pambuak haong dom urang dalam kapul, pambuak dom yaom glaong bo abih di nyu nan lac hop tac xa langyah hatai caong kapul mể phun jien, sarak daong siam jang ka dom baoh sang ngak nong sit. Ini lac bruk pasak ba mai siam lagaih ka bruk ngak mbang pablei salih.

Taphia brei bruk ngak ka dom urang dalam hop tac xa ini jeng brei bruk ngak tani tanat ka labaih 30 urang ngak haong jien mek tame kuhria rah tapa 8 tal 10 trieu dong sa bilan sa urang. Sa-ai Trương Thị Bông, daok di tinh Hậu Giang mai tal ini ngak bruk, brei thau: Sang sa-ai hu pagam haong hop tac xa meng dom harei akaok meti, hu bruk sangka labik mbang daok saong jien mek tame tani tanat nan biak siam mekre.

“Ngak bruk ka sa-ai Sang, adei sa-ai cong nhan tuk halei jang mboh bruk bui sambai di sa-ai. Sa-ai thau tani taanat bruk, hu ilamo nan ngak bruk jeng mbuan. Baoh sang dahlak ngak meng Binh Duong tal Binh Thuan. Ngak ka sa-ai, mboh sa-ai siam tung siam tian sangka tal adei sa-ai biak rilo, tuk halei jeng duh hatai ka adei sa-ai cong nhan.”

Yaok bruk ngak lac hu jalan ngak bahrau. Hadei rilo thun, sa-ai Lê Minh Sang khang hatai buh jien tame labik pala bahrau di huyen Tuy Phong, tinh Binh Thuan haong labaih 20ha, pala tui chuan GlobalGAP. Haong taneh pataom, kein lagaih piah pandar cong nghe, nan sa-ai Sang hu mbang tui nang luong ia harei, tuh ia pataom, tal bruk pandar jamraik mac moc pajeng ba hadei tuk yuak paik…Di bhum taneh thu lagu pandiak angin Binh Thuan, labik pala hu me-om sambo hijao di bein medar, langyah hu bruk kan kandah piah ba ia tuh labaih 3 km meng baneik ribaong mai labik pala.  

 Ong Bùi Văn Khanh, sa urang ngak nong naih joi di bhum palei brei thau: Bruk ngak labik pala ini hu ngak jeng lagiu di bruk ba mai bruk ngak, daok parilo bruk pamuak, rabha ilamo rilo jang gah ky thuat bahrau ka mikva bhum palei.

“Dalak pala phun medar 18 thun paje min daok bac megru, oh thau pang thei ye oh ngak hagait jeng. Pala phun hagait jeng khin bac tangin dom urang rai hadei kayua dak harei bruk pala dak bahrau jang. Sa-ai Sang meng Binh Duong mai tal ini pala medar saong sa-ai jeng bhian ndom biai ka ilamo pala…Sa-ai brei mboh bruk pala mek chat luong ngak asal kadha caik dahlau, di bhum Tuy Phong hu bruk ngak yau ini mikva jeng mboh chreih chrai.”

Hop tac xa phun mbang baoh Tân Mỹ hu pagap yau sa kreih camin ka bruk padang angan pambak tame bruk patagok dom yom kaom pandap panda nong hu dahlau yau phun kruac bung di tinh Binh Duong.

Sa-ai Lê Minh Sang hu maong Tuy Phong, Binh Thuan yau palei pala ka 2 di drei saong caong takre hu rik daong ka tinh Binh Thuan. Caong takre ini patui veik hu peih tabiak sa mbang tra haong jalan ngak pajeng sa hop tac xa pagam haong angan pandap panda nong di bhum palei.

“Dalam tukvak anak tal, meyah hu urang blei pandap panda ye labik pala tuk halei jeng hu prein piah ngak tabiak ka gah ikak, meyah pak chau Âu jeng yau nan. Jalan ngak di drei tuk buh jien tame hu ruah banah glaong jang mikva di bhum palei. Piah ngak tabiak bruk karei di gauk, labik pala daok padang tui jalan Globalgap piah srap gap ba baoh medar Tuy Phong tabiak darak pasar negar langiu”

 Viet Nam dalam jaman pok drei patagok anak di rilo kein lagaih min jeng daok haong rilo kan kandah. Dalam bruk patagok nan, yaok urang ngak nong Viet Nam yau sa-ai Lê Minh Sang, hu hop tac xa nong nghiep yau Tân Mỹ daok salih drei tui jalan siam, paglaong abih prein saong kein lagaih di drei piah patagok./.