Meng pasak ban sit U Minh mai tal xa Khánh Lâm, huyen U Minh meng jalan tuh menyek praong 8m, dua gah jalan lac dom baoh sang daneing haluk khang kajap taphia taphia gauk. Gah likuk di nyu hu dom mblang hamu padai - danao hadang, ba mai jien padai mek tame tani tanat, atah atah hu glai gràm, kayau keo lai hijao. Taong abih ngak jeng sa binguk thaik thaot gheih ghang brei ka bhum taneh U Minh dhaong, labik di Khu uy, Trung uong Kuk gah Meraong meng kal dahlau.

Ong Huỳnh Văn Chiến (daok hu angan ieu lac ong Năm Chiến) urang du kích xã Khánh Lâm jaman mesuh metak taong Amirik Mỹ khan lac, labik ini meng tuk kalin kan balai khamang hu padang di 4 gah, yaok sa mbang khamang ba bol lin mai taong ye blaoh hadei nan, phao khamang di dom balai saong dom gilai mesuh metak gah langiu tasik cuh tame, angaok glaong ye ahaok par palao mbom trun gam gam. Thun bilan atah, labik ribaong Dớn Hàng Gòn taduan mbom siu ngak tayah tayac yau nan. Pandik harao ralo abih hu di thun 1969, tuk kapal ahaok B52 di khamang palaik mbom ngak ka 65 urang metai, labaih 100 urang njauk rambuac jaoh jro.

Bruk pandik harao oh ngak ka dom urang di ini laman hatai, mikva salih bruk pandik harao jeng sa prein khang, dak harei dak pambuak pagam saong kapul bol lin peih paha, kham merah taong jayah kol khamang.

Harei ini raidiuk di rahra xa Khánh Lâm dak harei dak hu tagok glaong, jien mek tame kuhria tui yaok urang urak ini hu 59 trieu dong/urang/thun. Thun 2010, dom baoh sang kathaot dalam xa daok labaih 30%, urak ini trun takik daok 5%. Ong Lê Thanh Mãi, Phaok Akaok UB Bhap bini xa Khánh Lâm brei thau, hadei tukvak kalin kan, bhum taneh ini daok rilo kan kandah min kapul Ndang, karja saong rahra hu patui bruk patagok bruk katmang di bhum taneh anh hùng jayah piah uak drei tagok.

“Xa Khánh Lâm ieu lac xa angan anh hùng, jeng lac xa karo salamat hu bol lin pasang iek. Raidiuk daok dang mbang ngui di rahra dak harei dak hu tagok. Gah kinh te hu jalan mbak hu buh jien tame padang hu labaih 90%, kraong ribaong ye hu kuac kuah piah khik kajap ka mikva patagok bruk ngak mbang. Dut haong dahlau daih ye urak ini xa hu cakrok tagok rilo”.

Harei ini, glai hijao hu tamuh ram kapal, pagam haong nan lac bruk ngak labik ka dalko mai ngak sruh – lac bruk Drap ar ilamo oh mboh di meta pakat negar; daok hu ribaong gheih ghang nduac tapa, dom bein phun tràm tamo hu kein lagaih ka bruk patagok bruk jirah rivang sinh thai saong jeng lac sa labik mai me-in dui pachreih tuai damuai. U Minh dhaong jeng hu rilo kein lagaih piah patagok bruk ngak kayau, gam haong lac ngak rilo bruk gah ngak nong saong kaya ikan dalam ia.

Ong Trần Quốc Sự, Phaok chánh Jabat UB Bhap bini huyen U Minh ndom lac huyen U Minh harei ini jeng cuk tame rup sa blah khan ao bahrau: “U Minh urak ini jeng daok paralo bruk di drei, brei mboh bruk njauk gauk, sa hatai dalam bruk patagok. Bhum palei jeng daok dak harei dak patagok, bau tal U Minh urang daok bau tal labik ngak kong Khí - Điện - Đạm Khánh An, ini lac sa dalam dom labik ngak kong praong di tinh, di bhum taneran kraong Cuu Long. Langiu di labik ngak kong ini ye huyen jeng sangka tal bruk patagok kinh te – xa hoi, cakrok di huyen jeng khik kajap dom tanut ngak siam ngak jeng".

U Minh dhaong, meng kal rambah rambeip yau ye daok di “guk dunya” ini hu medeih khang, jeng sa bhum taneh hu rilo kein lagaih. Kinh te – xa hoi di huyen U Minh daok patagok ginup rilo gah. Dom baoh sang kathaot, thun 2008 di huyen lac 16,7%; tal puac thun 2024 huyen daok 723 baoh sang kathaot, hu 2,7%. Kadha ka bhum taneh glai U Minh dhaong uak drei tagok, oh lac brei mboh ka prein khang di hatai anit ranam taneh ia, hatai gul pataom saong hatai kham merat uak drei tagok di rahra bhum taneh glai bo daok lac di rahra “Bhum taneh gah Meraong abih di hujung idung negar” – Ca Mau./.