Bi thu Tinh uy Tra Vinh ong Ngô Chí Cường hadar gilac, tuk bahrau padang, Tra Vinh ieu lac sa di dalam dom tinh kathaot abih di Bhum Taneran kraong Cuu Long, hu jaik 20% baoh sang daok eik, 40% baoh sang kathaot; bruk ngak mbang daok dang  biak biar saong oh lagaih; jalan mbak, sang bac, gom hadah saong balai di ban saong palei pala jeng oh ka hu kajap ginup… Meng hatai kham merat chinh tri glaong, hatai kham merat di grauk taong abih Ndang bo, bol lin saong rahra, tinh Tra Vinh hu rilo bruk patagok khang. Tal puac thun 2024, bruk cakrok di GRDP kuhria rah tapa hu  94,36 trieu dong/urang/thun, tagok jaik 130 mbang dut haong thun 1992.

Dalam jalan patagok, Tra Vinh brei mboh danak dak padang palei pala bahrau lac banah njauk brei ngak samar chip dalam jalan patagok klau banah: gah ngak nong – urang ngak nong – palei pala. Hu peih ngak dalam thun 2010, danak dak samar chip hu pambak praong, brei kein lagaih ka dom palei pala uak drei tagok.

Meng daok biak kan kathaot, kuhria rah tapa di dom xa oh ka hu tal 5 asal kadha dalam 19 asal kadha tui Bo asal kadha palei pala bahrau tuk nan; dalam nan, hu tal 24 xa, 52 palei biak kan kandah daok dalam Danak dak 135 di Rajaei. Yau nan min, ngan saong hatai kham merat glaong di taong abih he thong tal ini, dalam tinh hu taong abih xa mek hu tanut palei pala bahrau, 60 xa palei pala paglaong, 9 xa palei pala bahrau kieu mau; taong abih huyen, ban sit, ban praong salah blaoh bruk padang palei pala bahrau; dua huyen Cầu Kè saong Tiểu Cần mek hu tanut palei pala bahrau paglaong. Tra Vinh jeng tinh ka 6 dalam taneh ia lac tinh akaok meti dalam bhum Taneran kraong Cuu Long hu Thu tuong Rajaei mbaoh tangin salah blaoh bruk padang palei ngak nong bahrau.

Bruk ngak jak jeng ini brei mboh ka jalan ngak njauk di Ndang, Karja haong dom sarak hadah krah, lagaih haong bruk rah tabiak di langiu, ba mai kein lagaih ka rahra. Gam haong di nan bruk patani tanat, pato tacei lagaih di dom pakat karja, saong hu makna abih lac bruk sa hatai, ba gauk rik prein di rahra.

Taphia haong bruk padang palei pala bahrau, Tra Vinh pataom tame rilo jalan langyah piah patagok kinh te drah samar saong karo kajap; dalam nan, hu makna abih lac pandar siam dom kein lagaih kinh te tasik saong tapen tasik; ngan haong hatai kham merat ba Tra Vinh jeng sa pasak kinh te tasik, gam haong nan lac sa labik hu rilo ngak bahrau nang luong di bhum Taneran kraong Cuu Long.

Ngan haong kein lagaih ka labik taneh hu 65 km jalan tapen tasik, Tra Vinh hu kein lagaih praong piah patagok ndien angin saong ndien ia harei. Akaok UB Bhap bini tinh Tra Vinh ong Lê Văn Hẳn brei thau, tinh urak ini hu 5 danak dak ndien angin hu taong abih kong suat 322 MW saong 1 danak dak ndien ia harei hu kong suat 140 MW hu ba tame pablei salih, pambuak tame ndien negar. Dom danak dak ini hu daong ba banah tanut cakrok patagok kinh te tinh Tra Vinh thun 2024 hu labaih 10%; dang di ka 8 dalam negar saong dang akaok bhum Taneran kraong Cuu Long.

Jak jeng di 33 thun tinh Tra Vinh mek hu lac mai meng hatai gul pataom dalam rahra, bruk kham merat glaong di sa majam chinh tri, gam haong mât maong ka jalan ngak di dom urang pan akaok “khin sahneng khin ngak”, hadah krah dalam bruk padang ngak. Nan jeng ieu lac bruk brei mboh ka prein khang di sa bhum palei kan kathaot meng kal dahlau, min hu padeih bruk uak drei tagok meng caong takre salih bahrau saong patagok karo kajap./.