Phaok akaok So Jien padai Ban HCM Hoàng Vũ Thảnh brei thau, dalam 10 bilan blaoh tapa, dom kadha brei thau ka bruk ngak mbang kinh te – rah ra di ban raya patui khik jalan pasiam saong cak rok patagok. Taong abih tanut pablei le pandap panda saong mek tame meng bruk pablei salih tagok 15%; dom gah rivang jirah ma-in, pajeng ba jeng mboh mek hu baoh jeng siam mekre. Jian mek tame kadung jien Karja jaik 94% tui kuhria dahlau di HĐND TP jao, tagok labaih 15% dut haong tukvak ini thun dahlau; jien gilang pariak brei mesre cak rok patagok tani tanat. Ong Hoàng Vũ Thảnh brei thau:  "Bruk langyah brei ka phun jien karja tabiak daok biar, tal harei 24/10 bahrau mek hu 52,7% danak dom bruk pakat Trung uong jao, caong khin kham merat biak rilo dalam dom bilan puac thun ini. Bruk langyah harak ba-ar ka gah taneh riya hadei di ramik, dak padang gilac jamraik dom pakat xã daok karung karang kayua urang jakar dang ngak rilo bruk oh ka tapa pato pathram ka nyu siam gheih."

Ong Nguyễn Khắc Hoàng, Akaok pataom yaok TP.HCM khan brei thau, 10 bilan blaoh tapa, bruk ngak mbang di ban raya jeng daok khik jalan cak rok patagok “min kurang dom pren khang piah yam tagok, ngak salah blaoh dom bruk ngak hu ba tabiak dalam thun”. Bruk buh jien tame ngak mbang mboh cak rok patagok, brei mboh tapa bruk dom doanh nghiep bahrau dak padang bahrau – tah klak meng tanut 10/8 trun daok 10/6. Yau nan min, dua pren khang di ban raya nan lac pablei tabiak negar langiu saong buh jien tame ngak jeng daok biar.  

Tui jalan cak rok patagok 8,5% brei ka dalam sa thun, 3 bilan puac thun di ban raya HCM njauk taduan mek hu tanut cak rok patagok tal 12,4%. Ini lac sa cuang kandah biak prong. Tui ong Hoàng, TP njauk brei pataom tame pren khang di bruk blei pandar dalam negar piah ngak jeng “jalan payeng” di bruk ngak tabiak - jien mek tame - blei pandar.

 “Pren khang gah blei pandar nan lac jalan ngak biak njauk di urak ini, njauk pataom tame pachreih bruk blei pandar puac thun angaok labik dhua bahrau, pachrei bruk pablei salih online, jhul patagok hatai caong khin saong pandap panda. Saong tok hu blei pandar meng brei ngak tabiak, bhap bani hu jien mek tame saong cagar veik meda daong gilac meng bruk blei pandar.”

Ong Nguyễn Khắc Hoàng, Akaok pataom yaok TP.HCM jeng khang panuac lac njauk jhul khang bruk peih mek phun jien karja, pasang iek veik saong tacei tabiak dom bruk ngak prong, peih ngak siam drap ar karja, peih talaih kan kandah ka doanh nghiep, grap tanat jamraik karja dua pakat ngak bruk ka nyu siam mekre. Praong abih dalam nan, tui ong Hoàng ieu lac, ngan haong tukvak peih ngak yau urak ini, piah mek hu danak dak bruk ba tabiak, dalam dua bilan puac thun, Ban raya langyah brei ka phun jien karja ngan yaok bilan jaik 24% taong abih phun jien hu jao brei. Ini lac bruk ngak oh njauk lac mbuan meyah oh hu jalan ngak cambaih laih, samu haong tukvak ba tabiak.

Phaok Akaok UB Bhap bini Ban raya Ho Chi Minh Nguyễn Văn Dũng khang panuac lac:  “Peih mek langyah brei ka phun jien karja, kuhria rah tapa 40 daok veik, yaok harei TP njauk peih mek langyah bahu 2.000 ty ndong nan ka meng salah blaoh bruk ngak langyah brei dalam thun ini. Ini lac sa bruk ngak biak prong.”

Akaok So Dak padang TP.HCM Trần Quang Lâm brei thau, dalam 10 bilan, TP hu ngak salah blaoh 4 danak dak brei ka sang daok rah ra gam labaih 2.600 baoh sang. Tui kuhria dalam thun ini meda ngak salah blaoh jaik 9.900 baoh, mek hu jaik 76% dalam danak bruk ba tabiak. Bruk panduan ba, ba-yar jien sang daok angaok kraong ribaong jeng mek hu njauk tukvak ba tabiak ngan haong jaik 4.500/6.500 baoh, pataom tame di dom du an kraong Xuyên Tâm, gah ar Barak kraong rabaong Kenh Đôi…

Phaok akaok bhian iek UB Bhap bini Ban raya Ho Chi Minh Nguyễn Văn Thọ ndom mayai lac njauk peih talaih dom tavak tavaiy, ralo abih di nyu lac bruk pambuak gauk di dom so, jabat, puk palei ngan haong hatai saneng “Bruk hagait ngak siam paje ye njauk ngak ka nyu siam jang; bruk hagait kan kandah tavak tave ye pataom prein tame peih talaih piah ngak siam, ngak salah blaoh dom bruk ngak hu ba tabiak dalam thun”./.