Amuk Phan Thị Ngọc, gru pato padeih ngak tui sarak umur karja daok  di khu pho 43, phuong Bình Thạnh, maong “salih lek taka so” ieu lac sa “bruk kan si pandar urang umur thun taha”. Meng hu urang halan tian tacei ba, amuk rah rah ngak randap bhian haong samart phone, bac bruk bah ma angan QR, khik kandauk khau tin saong pandar bruk ngak karja, tapa di nan daong siam jang bruk Kapul Chu thap do merah saong Kapuk Pachreih bac di ban khu pho.

"Jeng hu kan kandah min hu dom urang halan tian ba abih hatai tian nan jeng ngak hu. Ini lac bruk piah dom urang praong thun umo yau khol dahlak hulin pabak ilamo ngak kong lek taka jaman 4.0, tuk halei thau pandar mek trun piah khik khau tin kandauk, thau bah ma QR. Khol dahlak hulin mboh biak siam lagaih”)

Daok tui amuk Trần Thị Bích Nga (phuong Tân Mỹ, quan 7 klak), salih lek taka so hu ba mai hatai bui sambai saong bruk pagam dalam baoh sang. Jaik umo 70 thun, pandar tani tanat Internet, padang hu kenh talei pablei ndap nda di angaok mang xa hoi, amuk Nga ndom mayai lac ilamo ngak kong lek taka so daong dui katut atah di dom rairah manuac urang.

Anek bik saong amaik ame hu bruk pagam, bui sambai jang saong hamiem phol jang kayua drei thau samu dil haong xa hoi, dom anek taco biai ka hagait drei jeng thau, ndom meyai lagaih, gaok mai thau dahlau jang anek bik. Tapa dom danak dak yau nan piah abih urang, baoh sang haniem phol salamat jang, bui sambai jang saong makna abih lac mboh drei khang jang, chreih chrai saong bui sambai jang, raidiuk hu makna)

Sa dalam dom danak dak naih gheih di Kapul Urang kamei Ban raya Ho Chi Minh dalam “Bilan gam haong urang kamei ngak bruk” thun ini ieu lac bruk “Ngak lek taka so – Pambak tabiak – Pambuak”. Tui di nan, yaok labik Kapul padang takik abih sa kenh truyen thong talei rayak lek taka so, peih 20 tal bac pasram magru ka bruk pandar ilamo ngak kong ka 2.500 urang jakar, urang dalam kapul saong 173 danak dak pathau khan online. Meng sa jalan ngak, rilo bhum palei hu hadah krah ngak bruk karei, njauk lagaih haong hagait karei dalam bhum palei.

Tui Kapul Urang kamei Ban raya Ho Chi Minh, salih lek taka so saong pandar ilamo ngak kong khau tin lac sa dalam dom bruk ngak hu makna dalam bruk ngak di Kapul. Dalam thun 2025, Kapul hu peih ngak rilo tal pato pasram ilamo pandar phan mem, harak ndien tu saong padang dom danak dak pathau khan siam gheih di lek taka so. Amuk Nguyễn Thị Ngọc Linh, Phaok Akaok Kapul Urang kamei Ban raya Ho Chi Minh brei thau:

"Dom danak dak di labik padang kapul daong urang kamei salih lek taka so hu padang di dom xa, dac khu. Kapul urang kamei jeng sangka bac pasram, tacei ba pandar ilamo ngak kong atau bayar oh meng jien mbaok ka urang kamei ngak mbang, urang pablei salih sit di dom darak. Nan lac dom kham merat akaok meti bo Kapul Urang kamei ban raya caong khin pataom tame piah salih ilamo, pachreih adei sa-ai sangka buh jien tame, khang hatai pandar ilamo ngak kong khau tin, salih lek taka so”.

Meng dom salih sit dalam jalan sahaneng, bruk ngak, urang kamei Ban raya Ho Chi Minh daok dak harei dak brei mboh bruk ngak dahlau dalam bruk lek taka so, ba ilamo ngak kong mai jaik jang haong raidiuk, pambak tabiak yava siam di dalam bhap bini. Tapa di nan daong pagam haong majam politit peih jalan ngak “salih lek taka so” – sa di dalam dom asal kadha hu makna hu buh dalam Sarak Nyaom roya Ndang mbo Ban raya Ho Chi Minh mbang ka I brei mboh, brei nen tang ka bruk patagok kinh te samar drah, taong abih jeng ye karo di dalam bagian jaman bahrau.