Kreh dalam ban medin raya chreih chrai, ky su Nguyễn Ngọc Thạnh, Yam ndok Kongti TNHH Kong nghe sinh hoc MEGA, hu ngak tabiak “kaoh pulao hijao” tui mbaok binguk Aquaponics – pagam raong ikan saong pala njam pasang iek meng ia dalam majam payeng kandauk. Janih tathuak meng ikan hu sinh vat salih jeng janih siam ka phun kayau, cagar pableih di nan mboh phun ngak pahacih brei ka ia, oh pandar khak drak hoa hoc atau jru pacang halak haling, patakik ia saong siam ka alam langik tasik.

Di taneh 5m², yaok baoh sang meda mek hu 80kg ikan saong 2,5kg njam yaok bilan. Meng bruk ngak iek dahlau, Aquaponics hu rilo baoh sang rahra di Pur Meraong negar pandar, dalam nan mboh lac labik taneh sit ganik.

MEGA daok patagok Aquaponics ia mbak saong ia meteh mbak meteh taba, pandar ia tasik manuac urang drei dang ngak eng saong njam dang hu ia mbak. Baoh mực meng bhum Kreh negar hu ram caih baoh, raong dalam danao payeng saong salih ka urang ngak nong, akaok meti anek muenj praong tagok tani tanat, takik jit ruak, trak hu 200kg, yaom pablei glaong jang dut haong iakan, hadang bhian karei.

Ong Thạnh ndom mayai lac, bruk ini peih tabiak kein lagaih “raong kaya tasik angaok tambok”, hu rilo bruk duah jien, pasiam he sinh thai gah ngak nong ban medin saong ba mai bruk siam gheih dalam bhap bini tuk rahra pandar ilamo ngak kong jaik taphia, siam mekre saong njauk lagaih:

 “Bruk ngak ini ieu lac majam payeng vil kandauk, oh tathuak nerak saong pandar patruh dom janih siam. Pagap yau, dom nitơ ba tame majam brei hu ta-eng salih tapa ralo ikan, drei ikan, blaoh phun kayau, saong harei hadei patui veik gavang payeng bo oh ngak njom nerak alam langik. Jang di nan, bruk mek hu meng bruk ini biak glaong tok meng 1 m³ meda raong meng 58kg ba tagok. Meyah peih ngak praong, yaok kaom kinh te ba mai biak rilo.”)

Dalam tuk nan, di xa Phước Hòa, Ban raya Ho Chi Minh (tinh Binh Duong klak), labik raong menuk Lê Thảnh khik tani tanat yaok rituh ribau drei menuk khang kadang saong mek hu siam glaong, yaom lac jit ruak kum menuk ada daok rah tabiak. Taong abih bruk brei mbang, pasiam bruk ngak pandiak la-an, tahtah, pabak ia jeng hu ngak ta-eng, khik kajap tapol menuk diuk dalam kein lagaih siam abih. Meng bruk pasang iek catang meng drei pajaih tal bruk pablei tabiak, labik raong menuk ada Lê Thảnh jeng labik naih gheih gah raong glang kong nghe glaong, brei mboh ilamo kong nghe pagam haong ky luat sinh hoc daong pacang caga jit ruak siam lagaih, pacang khik tapol menuk, gam haong nanpaglaong bruk ngak hu saong siam lagaih kinh te. Sa-ai Nguyễn Thanh Tùng lambaok ka labik raong menuk, ndom meyai lac:

 “Di ini raong menuk tui jalan ngak kong pakat glaong daong patakik prein ngak bruk rilo. Salih ka jalan ngak kong jamraik klak njauk brei tuh haleik, pahacih sa-at saong pasang iek meng tangin, urak ini hu majam silo saong jamraik njuk pajeng ba kaya mbang, majam brei mbang ta-eng tok brei pa-um sa tanut pandar. Meng nan, urang ngak kong patrun bruk ngak meng tangin saong hu rilo tukvak sangka tapol menuk.”

Ban raya Ho Chi Minh, ban medin praong abih dalam negar, daok pamaong tal bruk ngak nong ilamo jamraik ngak kong glaong piah lagaih haong bruk ngak jeng ban medin samar saong taneh sit ganik. Ban raya maong bruk ngak nong bahrau lac jalan nao njauk ngak piah paglaong bruk ngak hu, asar siam, yaom kaom tagok, gam haong nan ngak jeng bruk meda peih praong tabiak dom bhum palei.

Tal thun 2030, Ban raya Ho Chi Minh pamaong tal 70% gah ngak nong ngak kong pakat glaong, yaom kaom ngak bruk meng kong nghe glaong hu 75–85%, brei yaom kaom 900 trieu – 1 ty dong/ha/thun, brei mboh bruk di pasak ngak iek saong jao salih ilamo ngak  kong, padang gah ngak nong bahrau, hijao, karo kajap./.