Ong Trần Văn Công, xa Tan Xuan, tinh Vinh Long brei thau, meyaih lac dahlau diah urang ngak nong nao tabiak rivang hamu ba tui sa janih jalein, min urak ini baoh phon thong minh nan lac janih pandap ngak nong oh kurang hu saong hu jeng janih pandap biak kein laghaih ka urang nong. Meng tuk hu jamraik brei thau dahlau ka halak halin di laok hamu di baoh sang, ye bruk ngak hamu ngak apuh mboh mbuan laghaih jang.

Yaok harei dom so lieu meng jamraik khan brei thau ka taong abih dom thong so ka halak halin, dut mbak, langik tasik… saong dom kadha kakei dahlau di gah jakar puk palei piah ka urang nong mong iek dahlau. Urang nong tok khin nao tabiak rivang hamu ye meda pasang iek hu, meng nan thau hu phun padai caong khin buh khak, pruh jru pacang caga halak halin… yau habar. Urak ini, hu bruk khan brei thau dahlau di jamraik thong minh, urang nong ngak padai oh daok huac kanda rilo jang, jien buh tabiak ngak hu patrun, padei mek tame gilac patagok, katung ba kein laba tagok glaong dut haong dahlau diah. Gam haong nan, mai meng bruk ba mac moc tame dalam bruk ngak, nan ye jien buh tabiak ngak yaok vu patrun meng 40 - 50%.

Ong Đoàn Văn Trung, xa Tan Xuan brei thau, dahlau diah phun jien buh tabiak ngak biak prong. Kuhria rah tapa, yaok 1.000 m2 pala padai abih meng 2,5 - 3 trieu ndong. Urak ini, mai meng bruk ba mac moc tame ngak, pambuak haong bruk pathau khan brei thau dahlau halak halin “jak krah”, daong buh khak ginup, pacang caga hu halak halin daong patrun phun jien buh tame ngak daok meng 1,2 - 1,5 trieu ndong 1.000 m2 sa vu.

Peih ngak gah ngak nong pambuak pagam haong bruk panduan salih taka di puk palei, thun 2022, xa Tan Xuan dak padang labik ngak tabiak padai "jak krah" pataom rilo di puk Phu Thanh, ngan haong mblang taneh 40 ha, hu 62 baoh sang hu mbaok tame ngak. Mai meng phun jien daong panduan salih taka, pul palei hu mek pagam blaoh jamraik khan brei thau dahlau halak halin di mblang hamu pataom puk Phu Thanh, ngan haong taong abih phun jien 540 trieu ndong; dalam nan hu phun jien buh tamee ngak 490 trieu ndong, binah daok veik kayua bhap bani rik daong. Jamraik ini daong ka urang nong pasang iek halak halin angaok mblang hamu, pabak brei thong tin ka langik tasik dalam harei, cam bien angin, dut iek nhiet ndo, ndo am, pataom abih aia hajan…, taong abih hu pambuak pagam haong baoh phon thong minh, computer di mikva.

Langiu di nan, puk palei jeng buh jien tame ngak jamraik khan brei thau dahlau ka bruk njaom mbaak mbak thong minh piah pacang caga haong bruk “salih langik tasik” dak harei dak catang, ngak brei patrun khat lahik saong patrun yaom jien buh tame ngak ka urang nong.  

Tui So Ngak nong saong Moi truong tinh Vinh Long, dalam tinh hu labaih 110.000 ha taneh ngak padai. Rilo bruk ngak padai pandar ialmu kong nghe bahrau ngak brei salih bahrau akaok saneng, tanarakun ngak tabiak, paglaong akaok saneng di urang nong dalam bruk panduan salih taka. Dom bruk ngak ini daok ba mai baoh jeng siam mekre ngak brei paglaong rai diuk di bhap bani. Urak ini, gah karja peih ngak pambak prong dom bruk ngak mek hu baoh jeng siam mekre tal dom puk palei karei dalam tinh, pamong tal bruk ngak nong saim gheih saong khang kajap./.