Sa-ai kamei K’Điệp lac sa mbaok meta randap saong hu anit ranam di palei Thực Nghiệm, xa Nam Ban Lâm Hà, tinh Lam Dong. Ini ieu lac bhum palei hu 210 baoh sang haong labaih 950 urang, dalam nan mikva urang bangsa takik labaih 75%. Ngan haong bruk lac Phaok bi thu chi bo, Akaok Mban ngak bruk Mat tran saong Bi thu chi ndoan palei, sa-ai kamei K’Điệp hu brei dom lagaih dalam bhap bini.

Meng tuk daok sit, K'Điệp hu kham merat ba drei tame dom danak dak ngak pah hala saong pacang khik alam langik, daong dom urang kan kandah palam mbon palei. Meng dom bruk ini hu daong adei urang K’Ho oh khang hatai jeng sa urang dara ndung bak hatai khang, hu bhap bini je anit ranam saong hu karja taduan. Bilan 3/2020, sa-ai hu hadah mbaok hu dang dalam dom urang Ndang.

Lac sa urang ndang naih gheih jeng ye sa urang pok ranam Po Ysa, anit ranam taneh ia, sa-ai K’Điệp tuk halei jeng duah jalan halai saong pambak raidiuk “gheih ghang siam mekre”. Ngan haong bruk naih gheih, thau tanat hatai di bhap bini, sa-ai hu duah rilo jalan ngak siam lagaih piah khan jalan di Ndang, hukum di Karja tal rahra biak dui pachreih, mbuan si thau.

Tuk hu je tame urang jakar, mikva dalam palei daong prein padang jalan mbak palei pala hacih, hijao, gheih ghang, daong pabak hatai gul pataom gauk taong abih bangsa adei sa-ai di labik pakat palei.

Ndih tapui saong praong tagok di bhum atah bayah, sa-ai kamei K'Điệp thau tani tanat bruk oh lagaih di dom uranaih oh hu jien nao bac atau gaok kan kandah kayua oh ka thau tani tanat sap Viet. Kayua yau nan, oh ka hu tapa sang bac pato pakai gah gru pato, min meng thun 2020 tal ini, sa-ai halan tian peih tal pato akhar huroh, pato Katih saong sap Viet ka labaih 500 uranaih bangsa takik dalam yaok mbang bilan pandiak hè. Sa-ai jeng bhian pato oh mek jien ka dom adei meng tal 1 tal tal 9 di baoh sang kan kandah.

Tuk danak dak “Rahra bac lek taka so” hu peih ngak, sa-ai kamei K'Điệp patui veik lac urang tabiak ngak dahlau, “nao yaok jalan, khan yaok sang, tavei ba yaok urang”. Sa-ai kamei pandar Zalo, Facebook piah pambuak bruk saong bhap bini, pambak dom yaom kaom siam gheih, pabak khau tin ka an ninh siam mekre, pacang caga jit ruak, gam haong nan dil samu meraik haong dom khau tin oh njauk. Sa-ai ndom meyai lac: “Bruk salih lek taka so brei daong ba Mat tran mai jaik rahra, dil samu pang panuac ndom meyai hatai caong di rahra”.

Gam labaih 15 thun ngak bruk y te mbon palei saong rilo bruk karei gauk dalam dom kapul, sa-ai kamei K'Điệp hu ngak tabiak sa majam pambuak bhap bini biak hu siam lagaih.

Dom kham merat oh padeih di sa-ai hu dom pakat taduan mek. Sa-ai hu Tinh ndoan Lam Dong alin brei angan “Dam dara naih gheih ngak tui panuac Wa Ho” tukvak thun 2022-2024, Kapul Urang kamei alin harak pok meyaom “Urang dalam Kapul naih joi dalam bruk bac megru saong ngak tui jalan, ilamo di Ho Chi Minh” tukvak thun 2021-2024. UB Bhap bini xa Nam Ban Lâm Hà jeng gam alin sa-ai harak pok meyaom kayua hu jak jeng naih joi dalam danak dak kacah anit ranam taneh ia negar tukvak thun 2020-2025.

Sa-ai kamei K’Điệp lac sa urang kumei naih gheih ka tal urang ndang dam dara urang bangsa takik, jeng sa talei pambuak karo kajap daong padang majam politit labik dak harei dak karo kajap./.