Sap gru saih ndom tui kadha pato yava tagok dalam tuk bac sap Angle di sang bac THCS Nguyen Binh Khiem. Tal bac rah tabiak gam tani tanat, gam chreih chai bui sambai. Tui anai gru Phan Thị Đỗ Uyên, kadha pachreih prong abih nan lac dom dom anek saih thei thei jeng chreih mekre, caik hatai tui bac megru.

Kanar hadhar panuac pato kakei di Wa HO brei ka bruk pala manuac: “Pato siam – bac gheih”, mai meng dom harei akaok mereip dang pato anai gru Uyên oh padeih kham merat bac megru, paneh tabiak saong khik kajap dalah apui ranam bruk ngak. Yaok blah giao an, yaok kadha pato, yaok tuk bac jeng lac mek hu baoh jeng siam mekre ngan haong hatai caong khin dom anek saih meda pandar hu sap Angle yau sa pabah mbang pamaong tal harei hadei.

Dalam bruk ngak di drei, anai gru Uyên oh padeih roh duah, duah thau saong pandar dom jalan pato bahrau. Meng thun 2011, tuk rilo gru pato oh ka taom gaok hu haong ilamu, gru Uyên hu ngak iek ba ilamu tame dalam bruk pato piah patagok kadha pachreih bac saong khik iek tal bac ka nyu siam mekre. Tal harei ini, anai taom gaok saong ngak po dom ung dung yau: PowerPoint, Canva, Quizizz… piah “pasalih” tuk bac sap Angle jeng dom tal bac biak chreih chai bui sambai.

Bruk ba akaok nao dahlau di anai gru Uyên hu brei angan hadah krah ka bruk pandar dom janih pandap taka daong ka anek saih pathram bac di sang saong pak di sang bac. Gru Uyên khan lac, piah ka anek saih taom gaok hu haong jalan pato bahrau caong khin hu bruk tacei ba biak tani tanat saong ba brei ka anek saih chreih chai, oh ba caik, oh kateik gheik:  

"Pagap yau khaol drei njauk kuhria caga hagait, brei kadha ngak mbai tagok yau habar, peih tame blah web, jalan ba tagok nyu yau habar… Meyah dom anek saih caong khin hu daong hagait ye hu taka phon di anai gru piah tacei pato. Brei adat tui jalan ngak pachreih, meyaih dom ayut hu nop mbai ba tagok ye hu brei mbluak ndiem jang dalam kadha pasang iek, daok meyaih oh hu jeng oh hu hagait".

Piah pamedeih hatai pachreih bac saong bruk ta-eng drei takre bac di anek saih, nai gru Uyên hu rilo jalan ngak hadah krah, salih bahrau, yau bruk jao ka anek saih ta-eng drei thaot video ndom sap Angle di dom labik yau mblang bein, darak, khu inem mek. Dom tuk bac di anai gru blaoh hu jeng vaktu bo dom anek saih chreih mekre. Adei Trần Nguyễn Nhã Trúc anek saih bac tal 8/5 Sang bac  THCS Nguyen Binh Khiem ndom mayai lac:

"Meng Jalan pato di anai gru biak mbuan sin dom, kadha nan ngak ka khaol dahlak pal kajap ilamu. Anai gru oh ngak tui jalan ngak ba caik bblaoh pandar tui tame dom hagait daok rah tabiak, taphia di nan dalam dom tuk bac di gru Uyên tuk halei jeng hu kadha bui sambai, brei mboh oh hu njauk ap luc atau iek prong gah ilamu."

Tui meng jalan pato bac bahrau, hadah krah, gru Uyên brei ka anek saih nao bac thuc te blaoh thaot binguk veik, javap jalei, khan brei thau, hadei di nan ta-eng drei ngak tabiak pandap pathau khan gam gam dua sap piah yaih khan haong ayut sahabat di dunya.

Dom danak dak “Ndong Nai, kadha hadah mbaok di dahlak” atau “Bhap bani adei sa-ai Ndong Nai” hu taong yaom biak siam saong njauk caik hatai sangka nan jeng lac kayua anek saih sang bac THCS Nguyen Binh Khiem peih ngak hu bhap bani taduan mek tapa dom jalan ba angaok internet. Rilo anek saih mboh jia tame rup drei jang, khang hatai jang dalam bruk pandar sap Angle piah ndom biai nao mai.

Dom kareih camin naih gheih yau anai gru Phan Thị Đỗ Uyên daok ngak brei pambak prong kadha: bac megru tui Wa Ho oh njauk lac di pak halei atah, bo bac dom hagait daok rah tabiak dalam rai diuk yaok harei, piah yaok urang hu jeng sa kareih camin hadah krah dalam rahra. Daok hu yaom jang tuk dalam rai pala manuac di drei, gru Uyên tui veik pabam pajaih bruk bac megru saong ngak tui Wa Ho piah ka rai rah harei hadei patui veik./.