Urak ini, di bhum urang bangsa takik saong bhum ceik tinh khanh Hoa hu labaih 30 kapul pambuak bruk saong HTX daok ngak bruk siam lagaih tui majam dom gah: Ngak nong, ngak glai, jitvu taong abih, jirah rivang bhap bini saong ngak kong sit.

Yau di dom xa Khánh Sơn, Tây Khánh Sơn, Đông Khánh Sơn, Nam Khánh Vĩnh saong Tây Khánh Vĩnh hu kein lagaih langik, taneh riya lagaih nan hu maong yau lac “labik pasak pala rilo” phun mbang baoh siam glaong di tinh Khanh Hoa.

Njauk caik hatai sangka, rilo ndap nda phun mbang baoh hu brei angan OCOP; rilo taneh durian di urang ngak nong hu brei angan ma so bhum pala piah pablei tabiak tapa nagar Trung Quoc. Hadei tuk pagam labik karja, 3 xa hu ngak jeng 11 HTX saong 28 THT, pataom tame rilo abih di pala phun hu angan, pabak jitvu akaok tame, pablei kaya nong.

Amuk Lê Thị Kim Thanh – Yam ndok HTX Ngak nong hijao Khánh Trung, xa Tây Khánh Vĩnh, tinh Khanh Hoa brei thau, hadei di rilo thun pabam, sangka, langiu di kruac bung kanduh hijao rilo phun mbang baoh karei yau baoh ia tasau Mica, baoh uas Ruby jeng hu pala ralo. Thun 2024, HTX hu 2 ndap nda brei angan OCOP 3 patuk. Taong abih phun pala jeng hu sangka tui jalan huu co, oh pandar janih ia jru hoa chat atau khak hoa hoc.

Di palei Bố Lang, xa Nam Khánh Vĩnh, HTX Ngak nong hijao Sơn Thái hu padang tabiak meng hatai kham merat di dom urang dalam bhum palei ngan haong hatai caong padang sa bruk ngak nong karo kajap, pagam bhap bini saong brei bruk ngak tani tanat ka mikva bhum urang bangsa takik. Dalam langik lagaih, taneh riya siam, HTX hu pandar dom kein lagaih hu dahlau, pambuak haong jalan pala drak bahrau piah ba tabiak darak pasar dom ndap nda ngak nong siam glaong, karo salamat sron mbon.

Ong Hà Ben – Yam ndok HTX Ngak nong hijao Sơn Thái brei thau: Gam saong bruk daong ka ilamo ky thuat, pato pasram, urang ngak nong dak harei dak hu pandar bruk ngak mbang karo kajap, patakik pandar janih jru hoa chat, pamaong tal bruk ngak nong siam mekre brei ka alam langik. Tapa di nan, mikva paglaong bruk ngak mbang, siam glaong ndap nda, khik ramik hu bruk samu gauk sinh thai saong ilamo pagam saong bruk ngak nong bhum palei…

Tukvak tapa, dom HTX bhum urang bangsa takik saong bhum ceik tinh Khanh Hoa hu karja sangka daong tapa rilo sarak. Langiu di nan, rilo bruk ngak jeng meng roh duah ilamo khoa hoc dalam ngak nong jeng yau dom so, dom gah jao ka dom HTX labik palei pala, bhum ceik, yau ye: Roh duah dom pajaih bahrau, luac jalan ilamo ngak kong, hadah krah dalam ky thuat, jalan langyah ilamo kong nghe bahrau… daong patakik jien buh tame, patagok kein laba saong ba mai siam lagaih kinh te glaong jang.

Njauk khan mayai lac, hu dom kadha KHCN duh tapak ka dom HTX bhum urang bangsa takik saong bhum ceik mbuon, yau kadha “Salah blaoh jalan ngak saong padang bruk ngak phun patei lagaih haong bruk pala di Khanh Hoa” daong padang saong ngak jeng 2 kapul pambuak ngak tabiak saong pablei patei di xa Suối Dầu saong xa Suối Hiệp. Kadha “Pandar KHCN patagok phun kruac xoàn angaok bhum tinh Khanh Hoa” saong ngak iek bruk pala bahrau phun kruac xoàn di HTX Khánh Hưng, xa Bắc Khánh Vĩnh…

Ong Nguyễn Trung Dũng – Akaok Lien minh HTX tinh brei thau: Yaom lac mek hu rilo bruk jak jeng, dom HTX saong THT di bhum ceik jeng daok rilo kan kandah. Kayua yau nan ye, tukvak anak tal, Lien minh HTX tinh brei patui veik pambuak haong gah karja daong taoh talaih dom kan kandah, tavak tavaiy piah brei kein lagaih siam di abih ka dom HTX, THT patagok./.