Mphŭn mkŏ mjing hŏng 9 čô, truh kơ ară anei Êpul hgŭm bruă lŏ hma – mnia mblei Tơ Tung (să Tơ Tung, kdriêk Kbang, čar Gia Lai) đĭ kyar mâo 67 čô hgŭm hlăm bruă pla mjing leh anăn mkra mjing plăng êa drao. Hluê si amai Nguyễn Thị Thanh Hương, khua êpul hgŭm bruă, êlâo dih mnuih ƀuôn sang knŏng pla ana hbei ƀlang leh anăn ana ƀiă hruê. Mơ̆ng thŭn 2019 truh kơ ară anei, kyua klei bi hmô pla plăng, phung hgŭm hlăm Êpul bruă mâo prăk hrui wĭt hơĭt. Êpul hgŭm bruă ară anei dưi mkŏ mjing anăn knăl êa drao plăng mâo ênŭm OCOP 3 mtŭ gưl čar, hŏng anôk ba čhi hơĭt ti đa đa anôk čhĭ mnia prŏng leh anăn sang čhĭ êa drao. Amai Nguyễn Thị Thanh Hương brei thâo:

 “Êjai dưi bi klă mnơ̆ng dhơ̆ng, hnơ̆ng tŭ jăk srăng đĭ hĭn. Hmei gĭr hluê djŏ hnơ̆ng čuăn OCOP čiăng ênưih ba mnơ̆ng dhơ̆ng hlăm anôk mnia mblei, mkŏ mjing klei đăo knang kơ phung blei ba yua. Ară anei, êpul hgŭm bruă mâo Knơ̆ng bruă êa drao leh anăn kdrăp mdrao mgŭn Đà Nẵng ba čhĭ brei mnơ̆ng dhơ̆ng, hŏng hnư hrui wĭt kah knar 50 – 60 êklăk prăk sa ha grăp thŭn.”

Hlăm krĭng riêng gah mơ̆gn Wăl anôk kriê pioh Kon Čư̆ Răng, đa đa knơ̆ng bruă mphŭn duh bi liê mbĭt hŏng mnuih ƀuôn sang kdriêk Kbang ba yua klei găl kơ ana êa drao. Msĕ si ti să Đăk Rong mâo 2 hdră pla ana êa drao  ti ƀuôn Kon Trang leh anăn ƀuôn Kon Lanh Te, hŏng ênhă kluôm giăm 40ha. Ăt msĕ sơnăn, ti dŭm să Sơn Lang, Kon Pne, Sơ Pai, leh anăn Krong (ăt ti kdriêk Kbang) mâo leh giăm 240ha sa nhân tím, sâm đá, đương quy, đinh lăng leh anăn kñĭt dưi pla sa anôk amâodah ti gŭ êpui dliê. Ngô Văn An, k’iăng khua bruă sang čư̆ êa să Đăk Rong, hmăng hmưi dŭm hdră pla ana êa drao drăng đru bi mlih klei hdĭp mnuih ƀuôn sang jing mnuih djuê ƀiă:

 “Hŏng dŭm hdră ti ƀuôn Kon Trang (7ha) leh anăn ƀuôn Kon Lanh Te (30ha), srăng mkŏ mjing thiăm lu bruă mă kơ mnuih ƀuôn sang hlăm să. Dŭm knơ̆ng bruă srăng mkăp brei mjeh, mnơ̆ng yua leh anăn bi klă klei kuôl kă ba čhĭ mnơ̆ng dhơ̆ng hŏng mnuih ƀuôn sang hlăm wưng kơ anăp.”

Mơ̆ng hruê mâo Hdră mtrŭn mrô 09-NQ/TU mơ̆ng Êpul khua bruă Đảng čar Gia Lai gưl 15 thŭn 2019 kjơ bruă kriê pioh leh anăn mđĭ kyar ana êa drao, truh kơ ară anei, kluôm čar dưi mđĭ kyar êbeh 4200ha ana êa drao. Gia Lai mâo leh 55 mta mnơ̆ng dhơ̆ng ana êa drao dưi tŭ yap OCOP (hlăm anăn mâo 9 mnơ̆ng dhơ̆ng 4 mtŭ). Čar mâo 4 săng măi mrka mjing êa drao, rơ̆ng thâo klă phŭn agha, mbĭt anăn ksiêm dlăng kjăp mơ̆ng klei pla mjing truh kơ mkra mjing. Mbĭt hŏng anăn, ară anei Gia Lai mâo 4 hdră mđĭ kyar ana êa drao dưi bi klă, hŏng ênoh hlăm brô 497 êklai prăk, leh anăn 10 hdră hlăm hră anăn iêo mthưr klei duh bi liê hŏng ênoh prăk mĭn tĭng êbeh 7.272 êklai prăk.

Nguyễn Văn Hoan, Khua knơ̆ng bruă lŏ hma leh anăn mđĭ kyar krĭng ƀuôn sang čar Gia Lai brei thâo, čar mkŏ mjing klei găl kơ dŭm knơ̆ng bruă duh bi liê hlăm bruă mkra mjing êa drao.

 “Bi kơ klei iêo jak duh bi liê, hmei srăng mkŏ mjing klei găl hĭn kơ dŭm knơ̆ng bruă ksiêm dlăng dŭm krĭng dưi pla mjing ana êa drao găl guôp hong grăp mta ana êa drao. Dŭm hdră êlan srăng hưn mdah kơ knơ̆ng bruă dŭm krĭng dưi ngă hdră êlan. Boh nik hmei hmăng hmưi knơ̆ng bruă ba dŭm sang măi mkra mjing wĭt hlăm čar”.