Klei êa lêč ka tuôm mâo hlăk knhal jih mlan 11/2025 ngă êngăp êa ƀuôn pla mnga djam Bình Ngọc, čar Dak Lak, jing ƀuôn dôk ti krah 2 hnoh krông Đà Rằng leh anăn krông Chùa. Êa lêč đĭ pral leh anăn êlam đung mđuĕ leh lu ngăn dŏ mnuih ƀuôn sang, hlăm anăn mâo sa sào mnga lay ơn mrâo rah mjeh sa hruê kăm mơ̆ng gŏ sang Bùi Thị Hồng. Thŭn leh khua, diñu ăt gĭr pla djam mtam, pla mnga duh ƀơ̆ng amâo mâo jưh knang kơ anak čô. 2 êklăk prăk blei mjeh mnga êa đung đuĕ hŏng ñu amâo djŏ ênoh prăk ƀiă ôh. Ñu brei thâo:

"Pla hruê 23 hruê mlan blĕ, tru hruê 1 êa mŭt. Mrâo čăt êa hlŏng đung jih mkrah sào, leh êa lêč pô lŏ wĭt pla.”

Adiê bi luč brei lăn čiu, leh êa hrŏ, mnuih ƀuôn sang ƀuôn Bình Ngọc lŏ bi kčưm kơ bruă mkra mjing. Lăn lu mơ̆ng êa lêč lŏ bi jing kơ lăn leh anăn đru kơ ana djam, ana mngă čăt đĭ pral hĭn. Dŭm hruê anei, ai êwa mă bruă msĕ si mtuk mtak hĭn. Êbeh 40 ha lăn ktuê hang krông dưi luôm mtah hŏng djam, hŏng ana mnga. Ƀĭng ngă lŏ hma hnêč bi pruê hbâo, krih êa kơ dŭm mnuôr mnga kčưm mâo knuh. Lê Văn Đệ, pô pla mnga ti alŭ Ngọc Phước, ƀuôn pla mnga Bình Ngọc brei thâo:

"Djŏ tết amâodah hơăi anăn jing klei pô amâo thâo đăo ôh, bi bruă mă jing ênưih hin hŏng thŭn mrâo anei, kyua pô mă leh êa lêč, mơ̆ng pla mjing truh kơ dlăng kriê ênưih hĭn hŏng êlâo.”

Êjai anăn, hŏng dŭm mta mnga pla hlăm tŏ jing dleh dlan hŏng mkă hŏng grăp thŭn. Aduôn Phạm Thị Kim Liên, pô đang mnga Đinh Tiên Hoàng, ƀuôn hgŭm  Tuy Hòa, čar Dak Lak brei thâo:

 “Knuh mnga êmưt prŏng kyua hmăi mơ̆ng yan adiê. Mnga cúc blang hnưm, bi quất ară anei kăn siam, kyua hmăi mơ̆ng yan adiê ngă. Sŭng gơr ară anei kñĭ jih.”

Mngă hlăm tŏ dleh jing sa klei, anôk mnia mblei kriêp ngă kơ phung pla mnga dôk amâo mâo hơĭt. Phung ƀĭng ngă lŏ hma mbruă hrô kơ duh bi liê pla hlăm hbŭ prŏng hŏng ênoh mơ̆ng 1 êklăk prăk ară anei mlih jing dŭm mta mnga ƀiă hruê, tŏ điêt, ênoh êlưih, dŭm pluh truh kơ dŭm êtuh êbâo. Amai Phạm Thị Kim Liên, pô đang mnga Đinh Tiên Hoàng, ƀuôn hgŭm  Tuy Hòa, čar Dak Lak brei thâo:

 “Anôk čhĭ mnia thŭn anei ênoh ăt dleh mơh. Grăp thŭn mmông anei phung hriê blei lu sơnăk thŭn anei ăt mâo êdeh ƀiădah knŏng ƀiă, jing pô čhĭ ênoh êlưih. Msĕ tŏ mnga grăp thŭn čhĭ 70,80 êbâo prăk ară anei pô čhĭ mă 50 êbâo mnga tŏ prŏng, tŏ điêt hlăm brô 40, bi mnga điêt knŏng čih 15,20 êbâo prăk. Kyua klei êa lêč ngă, grăp čô dleh sơăi”.

 Bi Lê Văn Đệ, pô pla mnga Lay ơn tết Bình Ngọc hmăng hmưi:

"Ară anei hmăng hmưi mâo ênoh brei kơ mnuih ƀuôn sang mâo hnư hrui wĭt”.

Knŏng adôk sa hruê kăm truh yơh Nguyên đán Bính Ngọ. Mmông anei, ti dŭm đang pla mnga tết nah Ngŏ čar Dak Lak msĕ si Tuy Hòa, Bình Kiến... dŭm huôm Quất, Cúc leh anăn dŭm mnuôr mnga Lay Ơn dôk bi blang mnga, hưn kơ sa yan mnga dôk wĭt. Khădah găn sa thŭn dleh dlan kyua yan adiê ngă, ƀiădah mnuih ƀuôn sang ăt gĭr găn hgao leh anăn đăo knang sa thŭn mrâo tŭ jing - angĭn êbŭ găn hgao leh, lăn lŏ bi mnga.