Y- Tuân Ksơr, Khua dlăng bruă Đảng Ƀuôn Pa, să Čư̆ Prao, kdriêk M’Drak brei thâo: Lăn ala leh anăn yan adiê ti krĭng anei amâo mâo jăk găl msĕ hŏng krĭng mkăn hlăm kdriêk. Kbâo ti krĭng mkăn mâo 100 tôn hlăm sa ha jing klei msĕ yăng đar, bi tinei mâo mă 80 tôn jing lu êdi leh. Sa ha ana akasi 7 thŭn ti anôk mkăn mâo ênoh 100 êklăk prăk, bi tinei knŏng mâo mă 70 êklăk prăk. Ƀuôn Pa mâo 93 gŏ êsei, hlăm anăn mâo mkrah wah jing gŏ sang ƀun ƀin. Êdah êdi hlăm hdră kpưn đĭ tlaih ƀun jing ung mô̆ ayŏng Y-Tai Niê. Ară anei gŏ sang mâo 20ha ana akasi mơ̆ng 2 – 4 thŭn, leh anăn 8ha kbâo. Wưng mrâo anei kbâo mâo giăm 600 tôn, kbâo mâo ênoh, kyuanăn leh mă jih prăk bi liê ăt mâo prăk mnga êbeh 350 êklăk prăk. Y-Tai brei thâo, gŏ sang ayŏng lĭng čan mơ̆ng knơ̆ng prăk Bruă lŏ hma leh anăn mđĭ kyar krĭng ƀuôn sang mơ̆ng êbeh 10 thŭn hŏng anei. Tơdah čiăng blei hbâo pruê kơ đang kbâo amâodah blei mjeh ana akasi, mưn mnuih mă bruă pla dliê srăng čan prăk mơ̆ng knơ̆ng prăk. Truh kơ yan hrui êmiêt pô tla wăt prăk čan leh anăn prăk mnga. Ayŏng Y-Tai brei thâo, dưi mâo hĕ msĕ ară anei, sa kdrêč kyua mâo prăk lĭng čan mơ̆ng knơ̆ng prăk.

 “Mơ̆ng ênoh prăk hmei lĭng čan, mnuih ƀuôn sang hmei mâo prăk duh bi liê mkra mjing. Mâo pô čan prăk pla kbâo, pla ana kyâo, mâo pô blei êmô wĭt rông. Klei hdĭp mnuih ƀuôn sang hmei mâo leh lu klei mlih, đĭ kyar mkă hŏng êlâo dih”.

Y-Lhu Ƀuôn yă, mnuih djuê êna Êđê ti ƀuôn Kŏ Êmông, să Ea Bhô̆k, kdriêk Čư̆ Kuiñ ară anei mâo leh sang dôk kdrăm kơah plah wah đang kphê, đang durian mtah. Êlâo dih êngao kơ bruă pla kphê, ñu lŏ rông thiăm truh kơ 40 drei êmô. Klei hdĭp mda gŏ sang mâo klei đĭ kyar, anak čô dưi nao sang hră truh tơl.

 “Mnuih ƀuôn sang hmei ti dŭm ƀuôn hlăm să Ea Bhô̆k, kdriêk Čư̆ Kuiñ, čar Dak Lak. Mơ̆ng sui leh lĭng čan ngăn prăk mơ̆ng knơ̆ng prăk čiăng rông ŭn, rông mnŭ, blei hbâo priê kơ ana pla mjing. Klei hdĭp mnuih ƀuôn sang hmei mâo klei hơĭt leh anăn đĭ kyar kyua mâo ênoh prăk lĭng čan mơ̆ng knơ̆ng prăk”.

Sa čô êdah êdi kơ bruă bi mdrŏng kơ pô leh anăn đrui kơ lu gŏ sang mkăn hlăm ƀuôn dưi tlaih mơ̆ng klei ƀun ƀin jing Y- Phơi Ƀuôn yă, mnuih djuê ana Mnông ti ƀuôn Drêñ A, să Dak Liêng, kdriêk Lak. Y-Phơi mâo đang pla mjing prŏng truh kơ 15ha, hlăm anăn mâo 10 ha durian leh anăn 4 ha tiêu truh wưng hrui pĕ. Thŭn 2020 Y-Phơi jhŏng čan 3 êklai prăk mơ̆ng knơ̆ng prăk čiăng duh biê kriê dlăng đang pla mjing leh anăn pla mrâo 1.400 phŭn ana dổi (Săm đrao), sa ana pla mjing guôp găl hŏng krĭng lăn anei leh anăn mâo hnư hrui wĭt lu. Y- Phơi brei thâo, ênoh lĭng čan 3 êklai prăk mơ̆ng hnơ̆ng prăk hlăk thŭn 2020, ară anei kyua hrui pĕ durian dưi tla leh 2 êklai prăk.

 “Kâo čoh bruă ngă hma đĭ kyar kyua mâo ênoh prăk lĭng čan mơ̆ng knơ̆ng bruă Lŏ hma. Mâo mmông kâo čan truh 3 êklai prăk čiăng dih bi liê kơ bruă pla mjing. Ênoh prăk anăn kâo duh bi liê kơ ana pla mjing, lu hĭn jing ana durian. Kâo ăt đru kơ dŭm gŏ sang ti ƀuôn Drêñ A leh anăn Drêč B kơ klei pruê hbâo kơ ana pla mjing. Kâo mưn 9 čô hlăm ƀuôn mă bruă kluôm thŭn kơ kâo.”

Vương Hồng Lĩnh, Khua kiă kriê knơ̆ng prăk Agribank anôk bruă ti Dak Lak brei thâo: Truh ti hruê 31/7/2023, ênoh prăk brei čan mđĭ kyar bruă duh mkra ti Agribank Dak Lak mâo 17 êbâo 746 êklai prăk, đĭ 801 êklai prăk, đĭ 4,7% mkă hŏng akŏ thŭn.

 “Knơ̆ng prăk Agribank anôk bruă Dak Lak brei čan êbeh 2 êbâo êklai prăk hŏng mnuih djuê biă, hŏng 10 êbâo gŏ sang lĭng čan. Hŏng ênoh prăk anei mnuih ƀuôn sang dưi mâo prăk đru kơ bruă mkra mjing mnia mblei leh anăn lŏ wĭt ngă bruă. Mnuih ƀuôn sang dưn kyua klei kreh knhâo mrâo mrang čiăng mđĭ hnơ̆ng tŭ jăk mnơ̆ng dhơ̆ng, mđĭ boh tŭ dưn hlăm bruă mkra mjing bruă lŏ hma, mnơ̆ng hlăm dliê leh anăn rông mnơ̆ng. Mnuih ƀuôn sang yua prăk anei čiăng mđĭ hnư hrui wĭt. Hlăm dŭm krĭng êrô êbat kbưi, Agribank mâo leh dŭm anôk hiu brei čan hŏng êdeh ôtô. Bruă Agribank mkăp brei ngăn prăk dưi rơ̆ng kơ boh tŭ dưn leh anăn hnơ̆ng tŭ jăk, đru kơ mnuih ƀuôn sang tlaih mơ̆ng klei ƀun ƀin, bi hrŏ ƀun hŏng klei kjăp.”