Ktuê hdră gru hmô pla mjing, lu ƀĭng ngă lŏ hma, knuă druh mtrŭt mjhar bruă lŏ hma dŭm čar Lăn Dap Kngư ƀuh jăk êdi hŏng klei kiă kriê đang pla mjing hŏng êlan bi kƀĭn. Mơ̆ng kriê dlăng mta jăk, krih êa truh kơ krih êa drao dưi ngă hrăm mbĭt, mâo klei đru mơ̆ng masin mrâo mrang, kdrăp mrô leh anăn klei đăo knăl yan adiê. Nguyễn Văn Một, sa čô pla durian ti să Quảng Phú, čar Dak Lak brei thâo, klei ñu ƀuh êdah êdi jing gru hmô amâodjŏ  hưn mdah hdră mnêč mdê hjăn ƀiădah mkŏ wĭt wăt hdră mkra mjing. Ƀĭng ngă lŏ hma dưi ƀuh klă anăn boh tŭ dưn ti đang pla mjing čiăng hriăm leh anăn yua hlăm boh sĭt.

“Dŭm thŭn êgao pô mjing boh siam, phung blei amâo mâo ruah ôh, êa drao pô krih djŏ wưng. Pô nao hriăm thiăm čiăng dưi mkra jăk hĭn. Ƀuh sơnăn jing hơ̆k mơak êdi, pô mâo thiăm lu klei hriăm čiăng ngă bruă.”

Hlăm wưng boh durian leh anăn kphê Lăn Dap Kngư dôk tlăp anăp hŏng dŭm klei lông dlăng msĕ si yan adiê amâo mâo jăk, mnơ̆ng ngă leh anăn dŭm klei čuăn ktang phĭt mơ̆ng anôk ba čhĭ, bruă mkŏ mjing dŭm gru hmô nao mbĭt hŏng ba jao kdrăp mrâo dưi dlăng jing êlan nao čiăng êdi.

Nai prĭn Phan Việt Hà, K’iăng khua anôk bruă lŏ hma mnơ̆ng hlăm dliê Lăn Dap Kngư brei thâo, gru hmô dưi mkŏ mjing hluê êlan mđĭ hnơ̆ng hdră mkra mjing hrô kơ bi kƀĭn hlăm bruă mdê mdê. Mta knăm jing kiă kriê ana pla mjing kluôm, yua êa tŭ dưn, răng mgang lăn, ksiêm dlăng êa drao hlăm boh mnga leh anăn ba yua kdrăp mrâo mrô hlăm klei kiă kriê mkra mjing.

Mta kñăm knhal tuč amâodjŏ knŏng mđĭ hnơ̆ng ƀiăda lŏ đru kơ ƀĭng ngă lŏ hma bi hrŏ ênoh bi liê, mđĭ ai dưi djŏ guôp hŏng klei mlih yan adiê leh anăn bi mâo djăp klei čuăn mnia mblei. Hluê si Nai prĭn Phan Việt Hà, anei jing dŭm klei bi klă čiăng kơ dhar bruă durian leh anăn kphê đĭ kyar hơĭt kjăp hlăm wưng sui.

“Dŭm đang pla mjing hmei yua lu hdră mnêč. Hmei mâo leh sa hdră mtô mkra mjing durian hơĭt kjăp. Anei jing  gru hmô hmei čiăng mkŏ 4 sang. Hlăm gru hmô anei, hmei lŏ dơ̆ng mkŏ jih jang dŭm hdră êlan kreh knhâo mơ̆ng phung ƀĭng hgŭm mdê mdê.”

Sa klei năng mđing mơ̆ng gru hmô jing klei nao hgŭm mơ̆ng lu tĭng, mơ̆ng anôk bruă kiă kriê Knŭk kna, anôk bruă ksiêm duah klei kreh knhâo leh anăn mtrŭt mđĭ bruă lŏ hma leh anăn dŭm êpul đru mkra mjing. Klei mkŏ anei dưi hmăng hmưi srăng bi hrŏ êwang kpleh plah wah ksiêm duah leh anăn boh sĭt.

 Lê Quốc Thanh, Khua anôk bruă mtrŭt mđĭ bruă lŏ hma ala čar mñă klă, sa gru hmô jăk ti anôk nao ăt dưi bi lar boh tŭ êjai dưi ba jao kluôm leh anăn mâo ƀĭng ngă lŏ hma tŭ mă, ba yua hlăm klei mkra mjing.

Hluê si Thanh, mtrŭt mđĭ bruă lŏ hma srăng mâo bruă klam mkŏ plah wah phung kreh knhâo leh anăn ƀĭng ngă lŏ hma, đru bi mrâo hdră mnêč đĭ kar ktang hĭn hŏng dŭm hdră mtô, rang mdah leh anăn mtô klă anăp ti nah gŭ. Êjai dŭm tĭng bi nao hgŭm hlăm klei bi mguôp kjăp, dŭm gru hmô ngă bruă mrâo mâo klei găl pŏk mlar leh anăn ba wĭt boh tŭ dưn klă klơ̆ng kơ phung pla mjing.

“Čiăng rơ̆ng kơ jih jang dŭm klei čuăn ktang phĭt hĭn mơ̆ng anôk mnia mblei hriê tinei ƀĭng ngă lŏ hma dưi duah hdră êlan. Hmei ăt hmăng hmưi mnuih ƀuôn sang mbĭt hŏng êpul mtrŭt mđĭ bruă lŏ hma si srăng ngă čiăng kah mbha lu hĭn dŭm klei hriăm mơ̆ng gru hmô hmei ngă leh”./.